Google-ი ძიების მომავალს ცვლის: AI მიმოხილვა და სასაუბრო რეჟიმი ერთიანდება

Google-მა დაიწყო ახალი ფუნქციის ტესტირება, რომელიც მის საძიებო სისტემაში ორ მნიშვნელოვან კომპონენტს — AI მიმოხილვასა (AI Overviews) და AI რეჟიმს (AI Mode) — ერთმანეთთან აერთიანებს. ეს ცვლილება მიზნად ისახავს მომხმარებლებისთვის ინფორმაციის მოძიების პროცესის გამარტივებას და მას უფრო ინტუიციურ, სასაუბრო ფორმატში გადაყვანას.

აქამდე ეს ორი ფუნქცია ერთმანეთისგან განცალკევებული იყო. მომხმარებელი ძიების შედეგების თავში იღებდა ხელოვნური ინტელექტის მიერ გენერირებულ მოკლე მიმოხილვას, მაგრამ თუ თემის სიღრმისეულად შესწავლა ან დამატებითი კითხვების დასმა სურდა, მას სპეციალურად უნდა გადასულიყო AI რეჟიმის ჩანართზე, რომელიც ChatGPT-ის მსგავს სასაუბრო ინტერფეისს წარმოადგენს.

ახალი სატესტო ფუნქციით კი ეს პროცესი ბევრად მარტივდება. მომხმარებლები, რომლებიც მობილურ მოწყობილობებზე მიიღებენ AI-ის გენერირებულ მიმოხილვას, იმავე გვერდიდან შეძლებენ დამატებითი კითხვების დასმას და შეუფერხებლად გადავლენ სასაუბრო რეჟიმში. Google-ის განცხადებით, ტესტირება გლობალურად მიმდინარეობს, თუმცა ამ ეტაპზე მხოლოდ მობილურ მოწყობილობებზეა ხელმისაწვდომი.

Google Search-ის პროდუქტების ვიცე-პრეზიდენტის, რობი სტაინის თქმით, მომხმარებელს არ უნდა უწევდეს ფიქრი, სად ან როგორ დასვას შეკითხვა. „ეს ცვლილება გვაახლოებს ჩვენს ხედვასთან ძიების შესახებ: უბრალოდ იკითხეთ ყველაფერი, რაც გაინტერესებთ — არ აქვს მნიშვნელობა, რამდენად გრძელი ან რთულია შეკითხვა — და იპოვეთ ზუსტად ის, რაც გჭირდებათ“, — წერს სტაინი სოციალურ ქსელ X-ზე.

Google-ის ეს ნაბიჯი კონკურენტულ გარემოსაც უკავშირდება, განსაკუთრებით მაშინ, როდესაც მისი მთავარი კონკურენტი, OpenAI, გაზრდილი წნეხის ფონზე, სხვა პროდუქტების განვითარებას აყოვნებს და ძირითად რესურსებს საკუთარი ჩატ-ბოტის გაუმჯობესებაზე მიმართავს.

სტრატეგიულად, ამ ორი ფუნქციის შერწყმა Google-ს მნიშვნელოვან უპირატესობას ანიჭებს. Google-ის ხელოვნურ ინტელექტს, Gemini-ს, ნოემბრის მონაცემებით, თვეში 650 მილიონზე მეტი მომხმარებელი ჰყავს, ხოლო AI მიმოხილვების ფუნქციას — 2 მილიარდი. მათი გაერთიანება Gemini-ის მომხმარებელთა ბაზის მნიშვნელოვან ზრდას შეუწყობს ხელს.