Google-მა Search Live ფუნქციის მნიშვნელოვანი განახლების შესახებ გამოაცხადა, რომელიც Gemini 2.5 Flash Native Audio მოდელის ინტეგრაციას გულისხმობს. ეს ცვლილება მიზნად ისახავს ხმოვანი ურთიერთქმედების გაუმჯობესებას და მის ცენტრალურ როლზე ხაზგასმას საძიებო სისტემაში, რაც ახალ შესაძლებლობებს ქმნის როგორც მომხმარებლებისთვის, ასევე SEO სტრატეგიებისთვის.
განახლება აუმჯობესებს ხმოვან ფუნქციებს Search-ის შიგნით და აფართოებს მოდელის გამოყენებას თარგმანსა და ცოცხალ ხმოვან აგენტებში. Google-ის მიზანია, ხმა ძირითად ინტერფეისად აქციოს, რომლის საშუალებითაც მომხმარებლები მიიღებენ ყველაფერს, რასაც ჩვეულებრივი ძიებით, და დამატებით შეძლებენ დასვან კითხვები მათ გარშემო არსებულ ფიზიკურ სამყაროზე.
ახალი შესაძლებლობები ასევე მოიცავს ორ განსხვავებულ ენაზე მოსაუბრე ადამიანს შორის მყისიერ ხმოვან თარგმანს. განახლებული ფუნქციონალი, რომელიც ამ კვირიდან ამერიკის შეერთებულ შტატებში გახდება ხელმისაწვდომი, Google-ის ხმოვან პასუხებს უფრო ბუნებრივ ჟღერადობას შესძენს. აღსანიშნავია, რომ პასუხების ტემპის შენელებაც შესაძლებელი იქნება, რაც განსაკუთრებით სასარგებლოა ინსტრუქციული შინაარსის მოსმენისას.
კომპანიის განცხადებით: „როდესაც Search Live-ს იყენებთ, შეგიძლიათ AI რეჟიმში ორმხრივი ხმოვანი საუბარი გამართოთ, მიიღოთ რეალურ დროში დახმარება და სწრაფად იპოვოთ რელევანტური საიტები. ჩვენი უახლესი Gemini მოდელის წყალობით, Search Live-ზე პასუხები იქნება უფრო გამართული და ექსპრესიული, ვიდრე ოდესმე.“
