Google-ის AI Mode-ს უკვე ფრენების ფასების მონიტორინგი და სასტუმროების დაჯავშნა შეუძლია

Google-მა თავის სასაუბრო საძიებო სისტემაში, AI Mode-ში, მოგზაურობის დაგეგმვისა და დაჯავშნის ახალი შესაძლებლობები დაამატა. მომხმარებლებს უკვე შეუძლიათ ხელოვნურ ინტელექტს ფრენების ფასების მონიტორინგი, სასტუმროების შერჩევა და მგზავრობის ღირებულების ქულებით ან მილებით (miles) ნახვა სთხოვონ.

ეს განახლებები მიუთითებს იმაზე, რომ Google ცდილობს AI Mode ერთგვარ ვირტუალურ ტურისტულ აგენტად აქციოს. სისტემა აღარ შემოიფარგლება მხოლოდ ინფორმაციის მოძიებით და უკვე უშუალოდ მოგზაურობის დაგეგმვისა და დაჯავშნის პროცესებში ერთვება.

ფრენების ფასების მონიტორინგი

მომხმარებლებს შეუძლიათ AI Mode-ს აღუწერონ, თუ როდის და სად სურთ გამგზავრება. ინსტრუმენტი ავტომატურად აჩვენებს საუკეთესო ვარიანტებსა და განახლებულ ფასებს 300-ზე მეტი ავიაკომპანიიდან და ტურისტული საიტიდან. დაჯავშნისთვის მზადყოფნის შემთხვევაში, მარშრუტის შედგენა პირდაპირ AI Mode-შია შესაძლებელი.

იმ შემთხვევაში, თუ მომხმარებელს ფასების კლებამდე მოცდა სურს, მას შეუძლია გამოიყენოს ბრძანება: track these flight prices for me (აკონტროლე ჩემთვის ამ ფრენების ფასები). ფასების ცვლილებისას, მითითებულ მიმართულებასა და თარიღებზე მომხმარებელი მიიღებს შეტყობინებას ელექტრონულ ფოსტაზე. ფრენების ფასების მონიტორინგის ფუნქცია უკვე ხელმისაწვდომია 180-ზე მეტ ქვეყანაში.

სასტუმროების დაჯავშნა AI Mode-ის მეშვეობით

სასტუმროების აღმოჩენა და დაჯავშნა ახლა უკვე ხელოვნურ ინტელექტთან დიალოგის რეჟიმშია შესაძლებელი. მომხმარებელმა AI Mode-ს უნდა მიაწოდოს ინფორმაცია მომავალი მოგზაურობისა და სასტუმროს მიმართ პრეფერენციების შესახებ, რის შემდეგაც მიიღებს ვარიანტების ჩამონათვალს მიმოხილვებთან და ძირითად მახასიათებლებთან ერთად.

სასურველი სასტუმროს შერჩევის შემდეგ, დაჯავშნის პროცესი შემდეგნაირად მიმდინარეობს:

• მომხმარებელი სთხოვს AI Mode-ს დაჯავშნაში დახმარებას.
• ირჩევს ოფციას Continue on Google (გაგრძელება Google-ზე), რომელიც გამოჩნდება ინტეგრირებული პარტნიორების (სასტუმროების ქსელები და ტურისტული საიტები) გვერდით.
• ირჩევს სასურველ ნომერს.
• ეცნობა დეტალებს, როგორიცაა გაუქმების პოლიტიკა.
• ასრულებს დაჯავშნას Google Pay-ს გამოყენებით.

ტექნოლოგიური გიგანტი განმარტავს, რომ უშუალოდ დაჯავშნის პროცესსა და მომხმარებელთა მომსახურებას თავად სასტუმრო ან დაჯავშნის პლატფორმა უზრუნველყოფს.

სასტუმროების დაჯავშნის ფუნქცია თავდაპირველად აშშ-ში, ინგლისურ ენაზე ამოქმედდა. უახლოეს კვირებში მასში ჩაერთვებიან ისეთი მსხვილი პარტნიორები, როგორებიცაა: Booking.com, Choice Hotels International, Expedia, Hilton, Hotels.com, IHG Hotels & Resorts, Marriott International, Priceline, Trip.com და Wyndham Hotels & Resorts.

მგზავრობის დაგეგმვა ქულებითა და მილებით

Google-ის განცხადებით, AI Mode-ს უკვე შეუძლია ფრენებისა და სასტუმროების ღირებულების ჩვენება დაგროვილი ქულებით ან მილებით. მომხმარებელს შეუძლია დასვას კითხვა, მაგალითად: „მსურს ატლანტადან (ჯორჯიის შტატი) მაიამიში გამგზავრება ჩემი AA მილების გამოყენებით. დამეხმარე პირდაპირი რეისების პოვნაში, რომლებიც მიფრინავს 9 ოქტომბერს და ბრუნდება 12 ოქტომბერს“.

საპასუხოდ, მომხმარებელი ნახავს, თუ რამდენი მილია საჭირო შესაბამისი რეისების დასაჯავშნად. ეს განახლება უკვე გლობალურად არის ხელმისაწვდომი.