Google-ის ჯონ მიულერი: უფასო სუბდომენების ჰოსტინგი SEO-ს ართულებს

Google-ის წარმომადგენელი, ჯონ მიულერი, განმარტავს, თუ რატომ იზიდავს უფასო სუბდომენების ჰოსტინგის სერვისები სპამს და რატომ უშლის ეს ხელს ლეგიტიმურ საიტებს საძიებო სისტემებში ხილვადობის მოპოვებაში. უფასო სერვისები ხშირად ხდება დაბალი ხარისხის კონტენტის თავშესაფარი, რაც საძიებო სისტემებისთვის საიტის ხარისხის შეფასებას მნიშვნელოვნად ართულებს.

ახალი ვებგვერდები, რომლებიც კონკურენტულ თემებზე იქმნება, ხილვადობისთვის დიდ წინააღმდეგობას აწყდებიან, მიუხედავად იმისა, თუ რომელ დომენს აირჩევენ. მიულერის თქმით, ძიების შედეგებში გამოჩენა არ უნდა იყოს პირველი ნაბიჯი ახალი გამომცემლებისთვის; ნაცვლად ამისა, პრიორიტეტი პრომოუშენსა და აუდიტორიასთან პირდაპირი კავშირის დამყარებას უნდა მიენიჭოს.

ჯონ მიულერი აფრთხილებს ვებოსტატებს, რომ უფასო სუბდომენების ჰოსტინგი ქმნის ზედმეტ SEO გამოწვევებს მაშინაც კი, როდესაც საიტი ყველა სხვა მიმართულებით გამართულად მუშაობს. ეს რჩევა გაჟღერდა Reddit-ზე გამოქვეყნებული პოსტის საპასუხოდ, სადაც მომხმარებელი ჩიოდა, რომ მისი საიტი Google-ის ინდექსშია, თუმცა ძიების სტანდარტულ შედეგებში არ ჩანს. აღნიშნული საიტი იყენებდა Digitalplat Domains-ს — უფასო სუბდომენის სერვისს, რომელიც Public Suffix List-შია შეტანილი.

რა ხდება სინამდვილეში

მიულერმა საიტის მფლობელს განუმარტა, რომ პრობლემა, სავარაუდოდ, არა ტექნიკურ შეცდომებში, არამედ შერჩეულ გარემოშია. მისი თქმით:

„უფასო სუბდომენების ჰოსტინგის სერვისი იზიდავს უამრავ სპამსა და დაბალი ხარისხის კონტენტს. ვებგვერდისთვის ხარისხის მაღალი თამასის შენარჩუნება დიდ შრომას მოითხოვს, რისი უზრუნველყოფაც რთულია, როდესაც ამაში არავინ იხდის ფულს.“

მთავარი პრობლემა ასოციაციაში მდგომარეობს. უფასო ჰოსტინგის პლატფორმებზე განთავსებული საიტები იზიარებენ საერთო ინფრასტრუქტურას სხვა ნებისმიერ კონტენტთან, რომელიც იქ ქვეყნდება. საძიებო სისტემებს უჭირთ ხარისხიანი კონტენტის გარჩევა იმ „ხმაურისგან“, რომელიც მას გარს აკრავს.

მიულერმა ეს მდგომარეობა საცხოვრებელ გარემოს შეადარა: „თქვენ, ფაქტობრივად, ხსნით მაღაზიას ისეთ ადგილას, რომელიც სავსეა პრობლემური 'მეზობლებით'. ეს საძიებო სისტემებს უთულებს საიტის საერთო ღირებულების გაგებას — არის ის სხვების მსგავსი, თუ პოზიტიურად გამოირჩევა მათგან?“

მან ასევე გააფრთხილა მომხმარებლები იაფი TLD-ების (ზედა დონის დომენების) გამოყენების შესახებ მსგავსი მიზეზების გამო. იგივე დინამიკა მოქმედებს მაშინაც, როდესაც მთლიანი დომენური ზონები ივსება დაბალი ხარისხის კონტენტით.

დომენის არჩევის გარდა, მიულერმა ყურადღება გაამახვილა კონტენტის კონკურენციაზეც. განხილული საიტი აქვეყნებდა მასალებს თემაზე, რომელიც უკვე ფართოდ არის დაფარული ავტორიტეტული გამოცემების მიერ. „თქვენ აქვეყნებთ კონტენტს თემაზე, რომელიც უკვე ძალიან კარგად არის გაშუქებული. არსებობს უამრავი საიტი, რომელიც მსგავს რამეებს სთავაზობს მომხმარებელს. რატომ უნდა აჩვენონ საძიებო სისტემებმა მაინცდამაინც თქვენი?“ — აღნიშნა მან.

რატომ არის ეს მნიშვნელოვანი

მიულერის ეს რჩევა ემთხვევა Google-ის სხვა ექსპერტების პოზიციასაც. ადრე Google-ის წარმომადგენელი გარი ილიეში ასევე აფრთხილებდა გამომცემლებს იაფი TLD-ების შესახებ. ილიეშმა პირდაპირ განაცხადა, რომ როდესაც დომენური ზონა სპამით არის გადატვირთული, საძიებო სისტემებმა შესაძლოა საერთოდ აღარ მიიღონ sitemap-ები ამ დომენებიდან.

უფასო სუბდომენების შემთხვევაში უნიკალური პრობლემა იქმნება. მიუხედავად იმისა, რომ Public Suffix List თეორიულად ეუბნება Google-ს, რომ ეს სუბდომენები ცალკეულ საიტებად აღიქვას, „სამეზობლო სიგნალი“ მაინც ძლიერი რჩება. თუ ჰოსტინგზე არსებული სუბდომენების აბსოლუტური უმრავლესობა სპამია, Google-ის სისტემებს გაუჭირდებათ თქვენი საიტის, როგორც გამონაკლისის, იდენტიფიცირება.

ეს საკითხი კრიტიკულია მათთვის, ვინც უფასო ჰოსტინგს იყენებს იდეის დასატესტად, სანამ რეალურ დომენში მოახდენდეს ინვესტირებას. თავად სატესტო გარემო ხდება ტესტის ნაწილი. საძიებო სისტემები თქვენს საიტს აფასებენ იმ კონტექსტში, რაც იმავე დომენის ქვეშ ქვეყნდება.

ასევე ყურადღებას იმსახურებს კონკურენციის ფაქტორი. ახალი საიტები უკვე ათვისებულ ნიშებში მაღალ ბარიერს აწყდებიან. მიულერის მინიშნება დამკვიდრებული გამომცემლების მრავალწლიან გამოცდილებაზე არის რეალობის შეხსენება იმის შესახებ, თუ სად უნდა იყოს მიმართული ძირითადი ძალისხმევა.

სამომავლო რეკომენდაციები

მიულერის აზრით, ძიების შედეგებში ხილვადობა არ უნდა იყოს ახალი გამომცემლების პირველი პრიორიტეტი:

„თუ გიყვართ მსგავსი კონტენტის შექმნა და დარწმუნებული ხართ, რომ ის პასუხობს მომხმარებელთა მოთხოვნებს, მაშინ სხვებსაც გააგებინეთ თქვენი საიტის შესახებ და შემოიკრიბეთ საზოგადოება პირდაპირ. პოპულარულ საძიებო შედეგებში გამოჩენა არ არის პირველი ნაბიჯი სასარგებლო და პოპულარული ვებგვერდის შესაქმნელად.“

დამწყები გამომცემლებისთვის რეკომენდებულია ფოკუსირება პირდაპირი ტრაფიკის მოზიდვაზე პრომოუშენისა და აუდიტორიასთან აქტიური კომუნიკაციის გზით. საძიებო სისტემებში ხილვადობა, როგორც წესი, მას შემდეგ მოდის, რაც საიტი სხვა არხების საშუალებით დაიმკვიდრებს თავს.