Google-ის რჩევა: კანონიკური URL-ები რეგისტრის მიმართ მგრძნობიარეა — „იმედი“ SEO სტრატეგია არ არის

Google-ის წარმომადგენელმა, ჯონ მიულერმა, კიდევ ერთხელ შეახსენა SEO სპეციალისტებს, რომ კანონიკური URL-ების საკითხი შემთხვევითობის ანაბარა არ უნდა დარჩეს. მისი თქმით, „იმედი“ არ შეიძლება იყოს SEO სტრატეგიის ნაწილი, რაც გულისხმობს, რომ Google-ის ალგორითმების „გამოცნობაზე“ დაყრდნობა პროფესიონალური მიდგომის არსს ეწინააღმდეგება.

HTML-ში არსებული rel=canonical თეგი ვებგვერდის მფლობელს ან SEO სპეციალისტს საშუალებას აძლევს, საძიებო სისტემას მიუთითოს, რომელი URL არის პრიორიტეტული, როდესაც რამდენიმე მისამართზე იდენტური ან მსგავსი შინაარსი არის განთავსებული. მიუხედავად იმისა, რომ Google ამ მითითებას დირექტივად არ განიხილავს, ის მას „ძლიერ მინიშნებად“ აღიქვამს და უმეტესად ითვალისწინებს.

დისკუსია Reddit-ზე დაიწყო, სადაც ერთ-ერთმა მომხმარებელმა აღწერა კონკრეტული შემთხვევა: ვებგვერდზე კატეგორიების URL-ები დიდი ასოთი იწყებოდა, თუმცა კანონიკური თეგი მისამართის ვერსიას პატარა ასოებით შეიცავდა. მიუხედავად იმისა, რომ პატარა ასოებით დაწერილი URL-იდან დიდ ასოებიანზე 301 რეიდირექტი ხდებოდა და საძიებო სისტემაში ხილვადობაზე უარყოფითი გავლენა არ შეინიშნებოდა, სპეციალისტი მაინც დაინტერესდა, რამდენად სწორი იყო ამ მდგომარეობის უცვლელად დატოვება.

მომხმარებელი წერდა: „ჩვენი URL-ები ამ ფორმატისაა: /site/Topic/topic-title/, მაგრამ კანონიკური თეგი პატარა ასოს იყენებს: /site/topic/topic-title/. ვიცი, რომ ასეთმა შეუსაბამობამ შეიძლება Google-ს არაერთგვაროვანი სიგნალები გაუგზავნოს. დეველოპერები მეკითხებიან, ვხედავ თუ არა რეალურ უარყოფით გავლენას, და ტექნიკურად პასუხი არის „არა“, მაგრამ მაინც ვფიქრობ, რომ საუკეთესო პრაქტიკის დასაცავად ამის გამოსწორება ღირს“.

ამ კითხვას ჯონ მიულერი გამოეხმაურა და დეტალურად განმარტა ტექნიკური ნიუანსები. მისი თქმით, URL-ის ისეთი ნაწილები, როგორიცაა მისამართის გზა, ფაილის სახელი და პარამეტრები, რეგისტრის მიმართ მგრძნობიარეა (case-sensitive), დომენის სახელისგან განსხვავებით. „რეგისტრის მგრძნობელობას დიდი მნიშვნელობა აქვს კანონიკალიზაციისთვის, ამიტომ ამ ნაწილში თანმიმდევრულობა საუკეთესო გადაწყვეტილებაა“, — აღნიშნა მან.

მიულერმა დაამატა, რომ თუ ორივე URL-ზე იდენტური კონტენტია, Google, სავარაუდოდ, მათ დუბლიკატებად აღიქვამს და გააერთიანებს, მაგრამ ამ პროცესის „იმედად“ ყოფნა არასწორია. მან ასევე ხაზი გაუსვა, რომ რეგისტრის მგრძნობელობა robots.txt ფაილისთვისაც მნიშვნელოვანია, რაც საიტის სკანირების პროცესზე ახდენს გავლენას.

საბოლოო ჯამში, ექსპერტების მოსაზრება ერთმნიშვნელოვანია: მაღალი კონკურენციის მქონე სფეროებში უმცირეს ტექნიკურ დეტალსაც კი გადამწყვეტი მნიშვნელობა აქვს. რაც უფრო გაუმარტივებთ საძიებო სისტემის რობოტებს საიტის სტრუქტურისა და კონტენტის გაგებას, მით უკეთეს შედეგს მიიღებთ. შესაბამისად, Google-ის „იმედად“ ყოფნის ნაცვლად, უმჯობესია, თავად უზრუნველყოთ ტექნიკური სიზუსტე.