Google-ის სარეკლამო მიმართულების ხელმძღვანელმა UCP-ის გაფართოება და AI Mode-ის ახალი რეკლამები წარადგინა

Google-მა AI Mode-ის სარეკლამო ფორმატების ტესტირება დამატებით კატეგორიებში დაიწყო და Direct Offers-ის ფუნქციონალი გააფართოვა. ამიერიდან, ამერიკელ მომხმარებლებს AI Mode-სა და Gemini-ში შერჩეული საცალო მოვაჭრეებისგან პროდუქციის შეძენა პირდაპირ შეუძლიათ.

Google-ის რეკლამისა და კომერციის მიმართულების ვიცე-პრეზიდენტმა, ვიდია სრინივასანმა, ყოველწლიური წერილი გამოაქვეყნა, სადაც 2026 წლისთვის დაგეგმილი აგენტური კომერციის (agentic commerce) განახლებები, AI Mode-ის სარეკლამო გაფართოება და კრეატორებისა და ბრენდების დაკავშირების ახალი ინსტრუმენტები მიმოიხილა.

თავის მესამე ყოველწლიურ მიმართვაში სრინივასანმა დეტალურად აღწერა, თუ როგორ აპირებს კომპანია რეკლამის, კომერციისა და ხელოვნური ინტელექტის ინტეგრირებას Search-ში, YouTube-სა და Gemini-ში. წერილი ეხება ისეთ საკითხებს, როგორიცაა AI-ზე დაფუძნებული სარეკლამო ფორმატები, პარტნიორობა კრეატორებთან და კრეატიული ხელსაწყოები. რამდენიმე განცხადება ეფუძნება იმ ფუნქციებს, რომლებიც Google-მა იანვარში NRF 2026-ზე წარადგინა და 2025 წლის მეოთხე კვარტლის ფინანსური ანგარიშის დროს განიხილა.

რა არის სიახლე?

UCP-ის დანერგვა

წერილში დადასტურებულია, რომ Universal Commerce Protocol (UCP) უკვე უზრუნველყოფს შესყიდვებს Etsy-სა და Wayfair-დან აშშ-ში მცხოვრები მომხმარებლებისთვის Search-ისა და Gemini-ს AI Mode-ში. Google-ის განცხადებით, UCP-ის გაშვების შემდეგ ინტერესი ასობით წამყვანმა ტექოლოგიურმა კომპანიამ, საგადახდო პარტნიორმა და რითეილერმა გამოხატა.

როდესაც Google-მა UCP პირველად წარადგინა NRF-ზე, აღინიშნა, რომ პროტოკოლი Shopify-სთან ერთად შეიქმნა და მას მხარი 20-ზე მეტმა კომპანიამ დაუჭირა. Google-ის თქმით, UCP-ის პოტენციალი „სცილდება საცალო ვაჭრობის ფარგლებს“ და წარმოადგენს საფუძველს აგენტური გამოცდილებისთვის ყველა კომერციულ კატეგორიაში.

AI Mode სარეკლამო ფორმატები

სრინივასანის თქმით, Google ტესტავს ახალ სარეკლამო ფორმატს AI Mode-ში, რომელიც გამოყოფს კონკრეტული საძიებო მოთხოვნის შესაბამის რითეილერებს და მათ „სპონსორობულად“ (sponsored) მონიშნავს. ეს ფორმატი მომხმარებლებს ყიდვის მოსახერხებელი ვარიანტების პოვნაში ეხმარება, ხოლო რითეილერებს ხილვადობას უზრუნველყოფს გადაწყვეტილების მიღების ეტაპზე.

ასევე ნახსენებია Direct Offers — სარეკლამო პილოტი, რომელიც ბიზნესებს საშუალებას აძლევს, პერსონალიზებული შეთავაზებები გაუზიარონ მომხმარებლებს AI Mode-ში. Google გეგმავს Direct Offers-ის გაფართოებას და ფასდაკლებების გარდა, მასში ლოიალობის ბენეფიტებისა და პროდუქტების პაკეტების (bundles) ჩართვას.

კრეატორებისა და ბრენდების დაკავშირება

სრინივასანმა YouTube-ის კრეატორები „დღევანდელობის ყველაზე სანდო გემოვნების განმსაზღვრელებად“ მოიხსენია, რასაც Google/Kantar-ის კვლევაც ადასტურებს. წერილში ხაზგასმულია AI-ზე დაფუძნებული ახალი ინსტრუმენტები, რომლებიც ბრენდებს კრეატორთა თემებთან აკავშირებს კონტენტისა და აუდიტორიის ანალიზის საფუძველზე. Google-მა ეს პროცესი „ღია მოწვევის“ (open call) ფუნქციით დაიწყო და 2026 წელს მის კიდევ უფრო განვითარებას გეგმავს.

კრეატიული აქტივების სტატისტიკა

Google-ის შიდა მონაცემებით, 2025 წელს Gemini-ს მიერ გენერირებული აქტივების რაოდენობა სამჯერ გაიზარდა. მხოლოდ მეოთხე კვარტალში AI Max და Performance Max კამპანიებში თითქმის 70 მილიონი აქტივი იქნა გამოყენებული. სრინივასანმა ასევე აღნიშნა, რომ Veo 3, Google-ის ვიდეო გენერაციის ინსტრუმენტი, უკვე ხელმისაწვდომია Google Ads Asset Studio-ში, ადრე გაშვებულ Nano Banana-სთან ერთად.

AI Max-ის ეფექტურობა

სრინივასანის განცხადებით, AI Max „ხსნის მილიარდობით სრულიად ახალ ძიებას“, რომლებსაც რეკლამის განმთავსებლები ადრე ვერ წვდებოდნენ. AI Max წარდგენილი იყო, როგორც Search კამპანიების გაფართოების ინსტრუმენტი, რომლის ეფექტურობაც 2025 წლის მეოთხე კვარტლის ანგარიშშიც იქნა განხილული.

რატომ არის ეს მნიშვნელოვანი?

ეს წერილი გვიჩვენებს ერთიან სურათს, თუ როგორ ხედავს Google-ის ხელმძღვანელობა ამ სხვადასხვა კომპონენტის ურთიერთქმედებას. სრინივასანის თქმით, ეს არის წელი, როდესაც აგენტური კომერცია კონცეფციიდან რეალობად იქცევა, სადაც UCP მოქმედებს როგორც დამაკავშირებელი ფენა შოპინგს, გადახდებსა და AI აგენტებს შორის.

რეკლამის განმთავსებლებისთვის მნიშვნელოვანია Direct Offers-ის გაფართოება და AI Mode-ის სარეკლამო ფორმატების ტესტირება მოგზაურობის (travel) სფეროში. ელექტრონული კომერციის მაღაზიებისთვის კი Etsy-სა და Wayfair-ის მაგალითი ადასტურებს, რომ UCP checkout რეალურ ტრანზაქციებს ამუშავებს. თუმცა, კვლავ პასუხგაუცემელი რჩება კითხვები Merchant Center-ის კონტროლის, ჩართვის (opt-in) მექანიზმებისა და რეპორტინგის შესახებ.

მომავლის გეგმები

წერილში არ არის მითითებული კონკრეტული თარიღები იმ ფუნქციებისთვის, რომლებიც წლის ბოლოსთვის იგეგმება. სავარაუდოდ, უფრო დეტალური განცხადებები Google Marketing Live-ზე, კომპანიის ყოველწლიურ სარეკლამო ღონისძიებაზე გაკეთდება, რომელიც გაზაფხულზე იმართება.