ჰაკერებმა ფლორიდის ავტოსატრანსპორტო საშუალებების მონაცემთა ბაზიდან მოპარული ათასობით მძღოლის ინფორმაცია გაასაჯაროეს

ჰაკერულმა დაჯგუფება ShinyHunters-მა ფლორიდის შტატის ავტოსატრანსპორტო საშუალებებისა და მძღოლების ინფორმაციის მონაცემთა ბაზიდან ასობით ათასი ფაილი გაასაჯაროვა. ჰაკერების განცხადებით, მოპარული მონაცემები მათ საკუთარ პლატფორმაზე მას შემდეგ განათავსეს, რაც მსხვერპლმა გამოსასყიდი არ გადაიხადა და მათ მოთხოვნებს არ დაემორჩილა.დაჯგუფების წევრები ამტკიცებენ, რომ მონაცემთა ბაზაში, რომელიც ცნობილია როგორც DAVID, სექტემბრის დასაწყისში შეაღწიეს. მტკიცებულების სახით მათ გამოაქვეყნეს სკრინშოტი, რომელიც, სავარაუდოდ, გარდაცვლილი სექსუალური დამნაშავის, ჯეფრი ეპშტეინის ჩანაწერს ასახავს, რომელსაც ამ შტატში რეზიდენცია ჰქონდა.ფლორიდის ავტოსატრანსპორტო საშუალებების სააგენტომ (FLHSMV) გასულ კვირას დაადასტურა მონაცემთა უსაფრთხოების დარღვევის ფაქტი. უწყების განცხადებით, ჰაკერებმა პოლიციის ოფიცრის ავტორიზაციის მონაცემები მოიპოვეს, რომლებიც მის პირად მოწყობილობაზე ინახებოდა. სააგენტოს წარმომადგენელს ოთხშაბათს TechCrunch-ის კითხვებზე გამოქვეყნებულ მონაცემებთან დაკავშირებით პასუხი არ გაუცია.მოპარული მონაცემების ასლის მიხედვით, რომელიც TechCrunch-მა შეისწავლა, ჰაკერებმა ასობით ათასი ავტომობილის მფლობელობის მოწმობა მოიპარეს. ეს დოკუმენტები შეიცავს მფლობელების სახელებს, ასევე მყიდველებისა და გამყიდველების მისამართებს. ჩანაწერებში ასევე ფიქსირდება ავტომობილის საიდენტიფიკაციო ნომრები (VIN).ფაილების მცირე ნაწილი მოიცავს სოციალური დაცვის ნომრებს და სხვა სამთავრობო დოკუმენტებს, როგორიცაა არარეზიდენტების პასპორტები და საიმიგრაციო საბუთები. თუმცა, როგორც ჩანს, მონაცემები არ შეიცავს მართვის მოწმობებს ან ადამიანების ფოტოებს.აღსანიშნავია, რომ მძღოლების მონაცემთა ბაზის ეს დარღვევა იმავე თვეში მოხდა, როდესაც იდენტიფიკაციის ვერიფიკაციის კომპანია IDScan-ზე განხორციელებული მასშტაბური ჰაკერული თავდასხმის შედეგად, ბოროტმოქმედებმა მართვის მოწმობების 150 მილიონზე მეტი ფოტო მოიპარეს.