Hamlet TV: ახალი პლატფორმა, რომელიც ხელოვნური ინტელექტის და იუმორით ცდილობს, მოქალაქეები ადგილობრივ პოლიტიკაში ჩართოს

სუნილ რაჯარამანისთვის კომპანია Hamlet-ის შექმნა პირადი გამოცდილებიდან დაიწყო. 2022 წელს ის კალიფორნიის პატარა ქალაქის საბჭოში იყრიდა კენჭს. მიუხედავად იმისა, რომ არჩევნებში დამარცხდა, ამ პროცესმა სამუდამოდ შეუცვალა წარმოდგენა როგორც საკუთარ ქალაქზე, ისე ზოგადად ადგილობრივ მმართველობაზე. „ვცდილობდი, უკეთესი კანდიდატი გავმხდარიყავი. მინდოდა გამეგო, როგორ მუშაობდა ჩემი ქალაქი, რა გადაწყვეტილებები მიიღებოდა, რატომ, ვინ რას ამბობდა. მაგრამ ამის გარკვევა ვერ შევძელი. ეს სრულიად გაუმჭვირვალე სისტემაა, თითქოს განზრახ დახურული“, – იხსენებს ის.

COVID-19-ის პანდემიის შემდეგ აშშ-ის მასშტაბით ქალაქებმა თავიანთი სხდომების ჩაწერა და ონლაინ გამოქვეყნება დაიწყეს. ამან რაჯარამანს ახალი იდეა მისცა: შეექმნა კომპანია, რომელიც ადამიანებს დაეხმარებოდა, გაეგოთ, რა ხდებოდა ადგილობრივ თვითმმართველობებში. სწორედ 2022 წელს მან დააარსა Hamlet-ი. „ხელოვნურ ინტელექტს ვიყენებთ, რომ ქალაქის საბჭოებისა და დაგეგმარების კომისიების ათასობით საათის ვიდეოჩანაწერი დავამუშაოთ და ისეთ ინფორმაციად ვაქციოთ, რომლის გამოყენებაც რეალურად შეუძლიათ“, – ამბობს ის. მისი თქმით, ვიდეოჩანაწერები ბევრად სჯობს სხდომის ოქმებს, რადგან დოკუმენტები მხოლოდ ვიღაცის ინტერპრეტაციაა, „ვიდეო კი არ იტყუება“.

თავდაპირველად რაჯარამანი მედია კომპანიის შექმნაზე ფიქრობდა, მაგრამ მალევე მას უძრავი ქონების დეველოპერებმა და პოლიტიკურმა კომიტეტებმა მიმართეს. ის მიხვდა, რომ კერძო კომპანიებსაც უწევთ ადგილობრივ მთავრობებთან ურთიერთობა და მათაც სურთ, მეტი იცოდნენ საბჭოს სხდომებზე მიმდინარე პროცესების შესახებ. Hamlet-ი კორპორატიულ კლიენტებს ეხმარება, თვალი ადევნონ დღის წესრიგს, მიიღონ შეტყობინებები მათთვის საინტერესო თემებზე და უყურონ შეხვედრების შეჯამებას, რათა საათობით ვიდეოების ნახვა არ მოუწიოთ. პლატფორმა ასევე საშუალებას აძლევს მათ, მოძებნონ ვიდეო არქივში, მაგალითად, როდის და რა კონტექსტში ახსენეს კონკურენტი კომპანია.

დღეისათვის Hamlet-მა დაახლოებით 10 მილიონი დოლარის ვენჩურული დაფინანსება მოიზიდა ისეთი ინვესტორებისგან, როგორებიც არიან Slow Ventures, Crosslink Capital, Banana Capital და Kapor Capital. „ჩვენ გვინდა, ამ სფეროს „ბლუმბერგი“ გავხდეთ“, – აცხადებს რაჯარამანი. ამ მიზნის პარალელურად, მან ახალი პროექტი, Hamlet TV წამოიწყო, რათა რიგითი მოქალაქეებიც იყვნენ ინფორმირებულები.

Hamlet TV არის სტრიმინგ-არხი TikTok-ზე, YouTube-ზე, AppleTV-სა და Instagram-ზე, რომელიც ფოკუსირებულია ქალაქის საბჭოების, კომისიებისა და სკოლების მმართველობის სხდომების მნიშვნელოვან მომენტებზე. რაჯარამანის თქმით, მისმა კომპანიამ უკვე დაამუშავა ათასობით საათის ჩანაწერი. „გვინახავს სხდომები, რომლებიც 15 საათზე მეტხანს შესვენების გარეშე გაგრძელებულა“, – ამბობს ის. ამ პროცესში გუნდმა სახალისო მომენტების შეგროვება დაიწყო და გადაწყვიტა, იუმორი გამოეყენებინა დემოკრატიის მიმართ ხალხის ინტერესის გასაღვივებლად. „ადამიანებს პროცედურული ვიდეოები რომ აჩვენო, უბრალოდ არ დაინტერესდებიან. მაგრამ თუ რამე სახალისოს შესთავაზებ, აუცილებლად უყურებენ“.

ყველაზე მოულოდნელი, რაც მისმა გუნდმა Hamlet TV-ზე ნახა, იყო მოქალაქე, რომელიც ქალაქის საბჭოს წინაშე მავნებლების პრობლემაზე სასაუბროდ ტარაკნის კოსტიუმში გამოცხადდა. თუმცა, რაჯარამანის თქმით, გასაკვირი მხოლოდ სასაცილო მომენტები არ არის. „გასაოცარი ისაა, თუ რამდენად მნიშვნელოვანია ეს შეხვედრები და ამავდროულად, როგორი უხილავი რჩება საზოგადოებისთვის“. მაგალითად, მან მოიყვანა ტუსონის ქალაქის საბჭოს გადაწყვეტილება, რომელმაც Amazon-ის 3.6 მილიარდი დოლარის ღირებულების მონაცემთა ცენტრის პროექტი დაბლოკა. ეს გადაწყვეტილება თვეების განმავლობაში მზადდებოდა, მაგრამ სავარაუდოდ, ძალიან ცოტამ უყურა ვიდეოებს იმის გასაგებად, თუ რატომ მოხდა ეს.

ეს რაჯარამანის პირველი ბიზნესი არ არის. ის იყო ანალიტიკური პლატფორმის Scripted-ის თანადამფუძნებელი და ასევე ხელმძღვანელობდა გამოცემას The Bold Italic, რომელიც მოგვიანებით Medium-ს მიჰყიდა. მან იცის, რომ Hamlet TV, სავარაუდოდ, მომგებიანი არ იქნება და აღნიშნავს, რომ ამას დემოკრატიულ პროცესებში ხალხის ჩართულობის გაზრდის მიზნით აკეთებს. ის ასევე გეგმავს, Hamlet-ის ინსტრუმენტები ადგილობრივ ჟურნალისტებს უფასოდ შესთავაზოს. „მონაცემები კარგია, მაგრამ კონტექსტს უდიდესი მნიშვნელობა აქვს“, – ამბობს ის.

მომავალში კომპანია გეგმავს სამთავრობო უწყებებთან, ადვოკატირების ორგანიზაციებთან და განახლებადი ენერგიის დეველოპერებთან თანამშრომლობას. რაჯარამანის საბოლოო მიზანი კი მარტივია: „დემოკრატია უკეთ მუშაობს, როცა მას აკვირდებიან. ჩვენ ვცდილობთ, ეს დაკვირვება შესაძლებელი გავხადოთ“.