იაპონურმა AI სტარტაპმა Sakana AI-მ $135 მილიონი მოიზიდა და $2.65 მილიარდად შეფასდა

იმ ფონზე, როდესაც ამერიკული გიგანტები, როგორებიცაა Google, OpenAI და Anthropic, დიდი ენობრივი მოდელების შექმნაში ეჯიბრებიან ერთმანეთს, ისეთი სტარტაპები, როგორიცაა Sakana AI, საკუთარ ნიშას იკავებენ. ისინი ქმნიან სპეციალიზებულ მოდელებს კონკრეტული რეგიონებისთვის, ინდუსტრიებისა თუ უნიკალური მახასიათებლებისთვის. ამ მიზნით, ტოკიოში დაფუძნებულმა Sakana AI-მ B სერიის დაფინანსების რაუნდი დახურა და 20 მილიარდი იენი (დაახლოებით $135 მილიონი) მოიზიდა, რის შედეგადაც კომპანიის შეფასებამ $2.65 მილიარდს მიაღწია.

Sakana AI 2023 წელს Google-ის ყოფილმა მკვლევრებმა, ლაიონ ჯონსმა, რენ იტომ და დევიდ ჰამ დააარსეს. კომპანია ქმნის ხელმისაწვდომ გენერაციულ AI მოდელებს, რომლებიც ეფექტურად მუშაობს მცირე მონაცემთა ბაზებთან და ოპტიმიზებულია იაპონური ენისა და კულტურისთვის. ეს მიდგომა მას ბაზრის ლიდერებისგან მკვეთრად განასხვავებს.

დაფინანსების რაუნდში მონაწილეობა მიიღეს როგორც ახალმა, ისე არსებულმა ინვესტორებმა. მათ შორის იყვნენ იაპონიის ფინანსური გიგანტი Mitsubishi UFJ Financial Group (MUFG) და ისეთი გლობალური ვენჩურული კომპანიები, როგორებიცაა Khosla Ventures, Macquarie Capital, NEA, Lux Capital და In-Q-Tel (IQT).

კომპანიის გენერალურმა დირექტორმა, დევიდ ჰამ TechCrunch-თან საუბარში განაცხადა, თუ რაში დაიხარჯება მოზიდული კაპიტალი. „ჩვენ ვგეგმავთ ახალი კაპიტალის გამოყენებას არა მხოლოდ კვლევისა და განვითარებისთვის, მათ შორის AI მოდელების შემუშავებისთვის, არამედ იაპონიაში ჩვენი საინჟინრო, გაყიდვებისა და დისტრიბუციის გუნდების გასაფართოებლად“, - აღნიშნა მან.

მიმდინარე წელს Sakana-მ იაპონიაში თავისი საქმიანობა გააფართოვა და პარტნიორობა დაიწყო წამყვან ადგილობრივ საწარმოებთან, მათ შორის Daiwa-სთან და MUFG-სთან, ხელოვნური ინტელექტის გადაწყვეტილებების შესამუშავებლად. ჰა, რომელსაც Stability AI-ში, Google-სა და Goldman Sachs-ში მუშაობის გამოცდილება აქვს, აცხადებს, რომ კომპანია სამომავლოდაც გეგმავს გაფართოებას.

2026 წლისთვის Sakana გეგმავს, გასცდეს ფინანსურ სექტორს და თავისი ბიზნესი სამრეწველო, საწარმოო და სამთავრობო სექტორებზეც გაავრცელოს. გრძელვადიან პერსპექტივაში კომპანია თავდაცვის, დაზვერვისა და წარმოების სფეროებით ინტერესდება. სტარტაპი ასევე აცხადებს, რომ „აქტიურად ეძიებს სტრატეგიულ ინვესტიციებს, პარტნიორობებსა და შერწყმა/შესყიდვებს გრძელვადიანი გლობალური ზრდისთვის“.

Sakana-ს წარმომადგენლების თქმით, ისინი ხედავენ ძლიერ გლობალურ მოთხოვნას „სუვერენულ AI გადაწყვეტილებებზე“, რომლებიც „ეროვნულ კულტურასა და ღირებულებებს“ ასახავს. იაპონური სტარტაპი ამატებს, რომ მისი სტრატეგია, რომელიც კვლევისა და განვითარების ფოკუსირებას უკვე გაწვრთნილი მოდელების შემდგომ პროდუქტებზე აკეთებს, ეხმარება მას ეფექტურად შექმნას იაპონიაზე მორგებული მოწინავე მოდელები და თავი აარიდოს გიგანტების კონკურენციას.

ეს დაფინანსების რაუნდი კომპანიის A სერიის რაუნდიდან დაახლოებით ერთი წლის შემდეგ შედგა, როდესაც მან 30 მილიარდი იენი ($214 მილიონი) მოიზიდა $1.5 მილიარდიანი შეფასებით. PitchBook-ის მონაცემებით, 2025 წლის მარტის მდგომარეობით Sakana-ს ჯამში დაახლოებით $244 მილიონი ჰქონდა მოზიდული, შესაბამისად, ახალი რაუნდით ეს თანხა დაახლოებით $379 მილიონამდე გაიზარდა.