ილია სუცკევერის Safe Superintelligence-ი Nvidia-სთან პარტნიორობას იწყებს ხელოვნური ინტელექტის კვლევების მასშტაბირებისთვის

Safe Superintelligence (SSI) — ხელოვნური ინტელექტის ლაბორატორიამ, რომელიც OpenAI-ის ყოფილმა თანადამფუძნებელმა და „Superalignment“ გუნდის ხელმძღვანელმა, ილია სუცკევერმა დააფუძნა, Nvidia-სთან გრძელვადიანი პარტნიორობა გამოაცხადა. ორწლიანი ფარული მუშაობის შემდეგ, კომპანია განვითარების შემდეგ ეტაპზე გადადის, რაც კვლევითი რესურსების მნიშვნელოვან ზრდას გულისხმობს.

შეთანხმების ფარგლებში, რომელიც გაურკვეველი მოცულობის ინვესტიციასაც მოიცავს, SSI წვდომას მიიღებს Nvidia-ს Vera Rubin GPU პლატფორმაზე. მოსალოდნელია, რომ ეს ნაბიჯი სტარტაპის გამოთვლით რესურსებს ერთი დონით (order of magnitude) გაზრდის. Nvidia-ს ინფორმაციით, პარტნიორობა მას შემდეგ გადაწყდა, რაც SSI-მ კვლევებში მნიშვნელოვან წარმატებებს მიაღწია.

მიუხედავად იმისა, რომ ოფიციალური ფინანსური დეტალები არ საჯაროვდება, საკითხთან დაახლოებულმა პირმა TechCrunch-ს განუცხადა, რომ Nvidia-ს ინვესტიცია რამდენიმე მილიარდ დოლარს შეადგენს. Bloomberg-ის მონაცემებით კი, გარიგების მოცულობა 5 მილიარდი დოლარია. ჩიპების მწარმოებელმა გიგანტმა, რომელიც უკვე იყო SSI-ის ინვესტორი, განაცხადა, რომ ეს პარტნიორობა დააჩქარებს სტარტაპის ზრდას მას შემდეგ, რაც მათ კომპანიის მკაცრად გასაიდუმლოებულ კვლევებზე წვდომა მიიღეს.

„ჩვენ გვაქვს კვლევები, რომლებიც მასშტაბირებას იმსახურებს, Nvidia-ს მძლავრ კომპიუტერებთან წვდომა კი ამის საშუალებას მოგვცემს,“ — აღნიშნა ილია სუცკევერმა თავის განცხადებაში. „დარწმუნებულები ვართ, რომ Vera Rubin პლატფორმაზე გაკეთებული ფსონი ჩვენს საქმიანობას ახალ საფეხურზე აიყვანს.“

უსაფრთხოებაზე ორიენტირებული მიდგომა

მიუხედავად იმისა, რომ პარტნიორობის დეტალები მწირია, ამ სიახლემ SSI კვლავ ყურადღების ცენტრში მოაქცია. კომპანია მიჰყვება ე.წ. „პირდაპირი გზის“ (straight shot) კვლევით მიდგომას, რომლის მიზანია უსაფრთხო და ადამიანის ღირებულებებთან შესაბამისი ხელოვნური სუპერინტელექტის შექმნა. SSI თავს არიდებს კომერციული პროდუქტების გამოშვებასა თუ მოკლევადიან შემოსავლებზე ფოკუსირებას.

იმ დროს, როდესაც კომერციული წნეხი აიძულებს AI ლაბორატორიებს, სისწრაფის გამო უსაფრთხოების სტანდარტები დაწიონ, SSI-ის ფუნდამენტური ტექნიკების განვითარებაზე ორიენტირებული მიდგომა განსაკუთრებით აქტუალურია. ეს საკითხი კიდევ უფრო მწვავედ დადგა მას შემდეგ, რაც OpenAI-მ გაასაჯაროვა ინფორმაცია, რომ მისმა ერთ-ერთმა მოწინავე მოდელმა ტესტირებისას უსაფრთხოების გარემოდან (sandbox) გასვლა და Hugging Face-ის პლატფორმაზე შეღწევა შეძლო. ამ ფაქტმა გააჩინა კითხვები იმის შესახებ, შესაძლებელია თუ არა AI-ის სრული კონტროლი ახალი, უფრო მძლავრი მოდელების გამოშვებამდე.

თანამშრომლობა და სამომავლო გეგმები

Nvidia-ს განცხადებით, კომპანიები ასევე ითანამშრომლებენ Nvidia-ს არსებული და მომავალი გამოთვლითი პლატფორმების დახვეწაზე, სადაც გამოყენებული იქნება SSI-ის ტექნოლოგიები და მათი ხედვა ხელოვნური ინტელექტის მომავალზე. აღსანიშნავია, რომ გასულ წელს SSI-მ კვლევების გასაძლიერებლად Google Cloud-თანაც გააფორმა პარტნიორობა.

ილია სუცკევერი ხელოვნური ინტელექტის სფეროს პიონერად ითვლება. ის არის AlexNet-ის ერთ-ერთი ავტორი (ალექს კრიჟევსკისთან და ჯეფრი ჰინტონთან ერთად), რომელმაც დაამტკიცა, რომ GPU მასშტაბირება და ღრმა ნეირონული ქსელები ეფექტურად მუშაობს. სწორედ ამ ნაშრომმა ჩაუყარა საფუძველი თანამედროვე გენერაციულ AI-ს.

SSI-ის დაფუძნებამდე სუცკევერი ხელმძღვანელობდა OpenAI-ის Superalignment გუნდს, რომელიც ამჟამად აღარ არსებობს. მან OpenAI მას შემდეგ დატოვა, რაც აღმასრულებელი დირექტორის, სემ ალტმანის გადაყენების მცდელობა ჩაიშალა, რასაც თავად სუცკევერმა „კომუნიკაციის დარღვევა“ უწოდა.

PitchBook-ის მონაცემებით, SSI-მ დღემდე 7 მილიარდი დოლარის მოზიდვა შეძლო, კომპანიის საბაზრო ღირებულება კი 32 მილიარდ დოლარს შეადგენს. Nvidia-ს გარდა, ინვესტორებს შორის არიან Andreessen Horowitz, Alphabet, Lightspeed Venture Partners, GV, Sequoia Capital Partners და სხვები.