ილონ მასკი Tesla-სა და SpaceX-ისთვის ჩიპების წარმოების გეგმებს აანონსებს

ილონ მასკმა თავისი კომპანიების, Tesla-სა და SpaceX-ის თანამშრომლობით, ჩიპების წარმოების ამბიციური გეგმები წარადგინა. Bloomberg-ის ინფორმაციით, მასკმა ამ ჩანაფიქრის შესახებ შაბათს ღამით, ოსტინში (ტეხასის შტატი) გამართულ ღონისძიებაზე ისაუბრა. გავრცელებული ფოტოების მიხედვით, ობიექტი, რომელსაც მასკი „Terafab“-ს უწოდებს, Tesla-ს ოსტინის სათაო ოფისისა და „Gigafactory“-ს სიახლოვეს აშენდება.

პროექტის განხორციელების მიზეზად მასკი ნახევარგამტარების მწარმოებლების მხრიდან არასაკმარის ტემპს ასახელებს. მისი განმარტებით, არსებული ბაზარი ვერ უზრუნველყოფს ჩიპების იმ რაოდენობასა და სისწრაფეს, რაც მისი კომპანიების ხელოვნური ინტელექტისა და რობოტიკის განვითარებისთვისაა საჭირო.

„ჩვენ ან ავაშენებთ Terafab-ს, ან დავრჩებით ჩიპების გარეშე. ჩვენ კი ჩიპები გვჭირდება, ამიტომ ვაშენებთ Terafab-ს“, — აღნიშნა მასკმა.

პროექტის მიზანია ისეთი ჩიპების წარმოება, რომლებიც დედამიწაზე წელიწადში 100-დან 200 გიგავატამდე გამოთვლით სიმძლავრეს უზრუნველყოფს, ხოლო კოსმოსში — ერთ ტერავატს. მიუხედავად ასეთი მასშტაბური გეგმებისა, მასკს სამუშაოების დასრულების კონკრეტული ვადები არ დაუსახელებია.

როგორც Bloomberg აღნიშნავს, ილონ მასკს ნახევარგამტარების წარმოების სფეროში გამოცდილება არ აქვს. გარდა ამისა, მას ახასიათებს მიზნებისა და ვადების შესახებ გადაჭარბებული დაპირებების გაცემა, რაც მის პროექტებთან დაკავშირებით გარკვეულ კითხვებს აჩენს.