ჩრდილოეთ კენტუკის შტატში მცხოვრები იდა ჰადლსტონი და მისი ოჯახი თაობების განმავლობაში ფლობენ ფერმას, რომლის შენარჩუნების მიზნითაც მათ მრავალმილიონიან შეთავაზებაზე თქვეს უარი. გასულ წელს, „ხელოვნური ინტელექტის წამყვანმა კომპანიამ“ მათ 26 მილიონი დოლარი შესთავაზა ფერმის ნაწილის სანაცვლოდ, სადაც მონაცემთა ცენტრის განთავსება იგეგმებოდა.
ჰადლსტონმა და მისმა ოჯახმა შეთავაზებაზე უარი განაცხადეს. მათი თქმით, მათ არ სურთ, რომ მონაცემთა ცენტრი აშენდეს მათ სიახლოვეს ან მათ კუთვნილ 1200 ჰექტარ სასოფლო-სამეურნეო მიწაზე, რომელიც კენტუკის ქალაქ მეისვილის მახლობლად მდებარეობს.
„ჩვენ ძველ, სულელ ფერმერებს გვეძახიან, მაგრამ ასე არ არის,“ — განუცხადა 82 წლის ჰადლსტონმა ადგილობრივ გამოცემა WKRC-ს. „ჩვენ ვიცით, როდის ქრება ჩვენი საკვები, როდის ქრება ჩვენი მიწები და როდის აღარ გვაქვს წყალი — და ეს მოწამვლა. ჩვენ ვიცით, რომ ეს უკვე გამოვცადეთ.“
ფერმერი, სავარაუდოდ, გულისხმობდა წყლის დეფიციტისა და ნიადაგის დაბინძურების შემთხვევებს, რომელთა შესახებაც ხშირად ვრცელდება ინფორმაცია მონაცემთა ცენტრების მიმდებარე ტერიტორიებზე.
საინფორმაციო სადგურთან ინტერვიუში ჰადლსტონმა ეჭვი გამოთქვა იმის შესახებ, რომ მონაცემთა ცენტრი მეისონის ოლქისთვის სამუშაო ადგილებს ან ეკონომიკურ ზრდას მოიტანდა. „ეს თაღლითობაა,“ — აღნიშნა მან.
კომპანიამ, რომლის ვინაობაც WKRC-მ არ გაამჟღავნა, გეგმები შეცვალა და ჩრდილოეთ კენტუკიში 2000 ჰექტარზე მეტი ფართობის ზონირების შეცვლის მოთხოვნით მიმართა. ეს ნიშნავს, რომ ხელოვნური ინტელექტის კომპანიამ შესაძლოა მონაცემთა ცენტრი მაინც ააშენოს ჰადლსტონის მიწის ნაკვეთის მეზობლად.
