ხალხს ურჩევნია Amazon-ის საწყობი ჰქონდეს მეზობლად, ვიდრე მონაცემთა ცენტრი

მონაცემთა ცენტრების რაოდენობის ზრდასა და მათ გავრცელებასთან ერთად, საზოგადოების მხრიდან წინააღმდეგობაც სულ უფრო მატულობს. ჰარვარდისა და მასაჩუსეტსის ტექნოლოგიური ინსტიტუტის (MIT) მიერ ჩატარებულმა ახალმა გამოკითხვამ აჩვენა, რომ სხვადასხვა ინდუსტრიული ობიექტების მშენებლობასთან დაკავშირებით დასმულ კითხვაზე, რესპონდენტთა 40% მხარს უჭერს მათ რეგიონში მონაცემთა ცენტრის აშენებას, ხოლო 32% ამის წინააღმდეგია.
Axios-ის მიერ გავრცელებული კვლევის ერთ-ერთი საინტერესო დეტალი იმაში მდგომარეობს, რომ უფრო მეტ ადამიანს ურჩევნია მეზობლად ელექტრონული კომერციის საწყობი ჰქონდეს, ვიდრე მონაცემთა ცენტრი. ნოემბერში ჩატარებულ გამოკითხვაში, რომელშიც 1000 ადამიანი მონაწილეობდა, რესპონდენტთა ორი მესამედი გამოთქვამდა შეშფოთებას, რომ მათ რეგიონში ახალი მონაცემთა ცენტრის გამოჩენა ელექტროენერგიის ფასების ზრდას გამოიწვევდა.
Axios-ის თანახმად, სამუშაო ადგილების შექმნითა და ეკონომიკური ზრდით დაინტერესება მონაცემთა ცენტრების სასარგებლო არგუმენტად გამოდგებოდა, თუმცა ეს განწყობა შესაძლოა შესუსტდეს. ამის მიზეზი ისაა, რომ მონაცემთა ცენტრების პროექტების უმეტესობა, მათი ექსპლუატაციაში შესვლის შემდეგ, ბევრ ადამიანს აღარ ასაქმებს.
კიდევ ერთმა გამოკითხვამ, რომელიც გასულ თვეში კვინიპაკის უნივერსიტეტის (Quinnipiac University) მიერ ჩატარდა და მიმდინარე კვირის დასაწყისში გამოქვეყნდა, მონაცემთა ცენტრების მშენებლობის მიმართ გაცილებით დიდი წინააღმდეგობა გამოავლინა. კვლევის მიხედვით, ამერიკელთა 65% ეწინააღმდეგება მათ დასახლებაში ხელოვნური ინტელექტის (AI) მონაცემთა ცენტრის აშენებას. გამოკითხული 1397 ზრდასრული ამერიკელიდან მხოლოდ 24%-მა დაუჭირა მხარი მსგავსი ობიექტის მშენებლობას.
ახალი გამოკითხვები მიუთითებს, რომ დებატები მონაცემთა ცენტრების ირგვლივ ჯერ კიდევ შორსაა დასრულებისგან. ამომრჩეველთა ასეთი დიდი ნაწილის უკმაყოფილება, სავარაუდოდ, კვლავაც აისახება პოლიტიკურ პროცესებზე. თუ ადრე მონაცემთა ცენტრები მეტ-ნაკლებად ჩუმად, „კადრს მიღმა“ მუშაობდნენ, დღეს ვითარება რადიკალურად შეცვლილია.