Lemonade-მა Tesla-ს თვითმართვადი სისტემის მომხმარებლებისთვის დაზღვევის ახალი პროდუქტი წარადგინა

ციფრული სადაზღვევო კომპანია Lemonade ახალ პროდუქტს სთავაზობს Tesla-ს მძღოლის დამხმარე მოწინავე სისტემის (Full Self-Driving - FSD) მომხმარებლებს. კომპანიის განცხადებით, აღნიშნული ინიციატივა განვლილ მილზე ტარიფებს დაახლოებით 50%-ით შეამცირებს. ეს არის ერთ-ერთი პირველი სადაზღვევო პროდუქტი, რომლის ფასიც უშუალოდ ავტომობილის მართვის პროგრამული უზრუნველყოფის მუშაობაზეა დამოკიდებული.

Lemonade-ის განმარტებით, პროექტი ეფუძნება ავტომობილის ტელემეტრიულ მონაცემებს, რომლებიც აქამდე ხელმისაწვდომი არ იყო. ეს შესაძლებელი გახდა Tesla-სთან ტექნიკური თანამშრომლობის შედეგად, თუმცა კომპანიას დეტალები არ დაუკონკრეტებია. Lemonade გეგმავს გამოიყენოს რისკის პროგნოზირების საკუთარი მოდელები, რათა დაადგინოს, როდის იყენებს მძღოლი თვითმართვის რეჟიმს და როდის მართავს ავტომობილს თავად, რის მიხედვითაც განისაზღვრება მომსახურების ფასი.

ახალ პროდუქტს „ავტონომიური ავტომობილის დაზღვევა“ (Autonomous Car insurance) ეწოდება. მიუხედავად იმისა, რომ Tesla-ს პროგრამული უზრუნველყოფა ამ ეტაპზე ავტომობილს სრულად ავტონომიურს არ ხდის და მძღოლი მუდმივად მზად უნდა იყოს მართვის გადასაბარებლად, ეს ნაბიჯი აშკარა ფსონია ილონ მასკის დაპირებაზე, რომ კომპანია საბოლოოდ მიაღწევს სრულ ავტონომიურობას.

„ტრადიციული მზღვეველები Tesla-ს ისე ეპყრობიან, როგორც ნებისმიერ სხვა მანქანას, ხოლო ხელოვნურ ინტელექტს — როგორც ჩვეულებრივ მძღოლს. თუმცა მძღოლი, რომელსაც 360-გრადუსიანი ხედვა აქვს, არასოდეს იღლება და რეაგირებას მილიწამებში ახდენს, არ ჰგავს სხვებს“, — განაცხადა Lemonade-ის თანადამფუძნებელმა და პრეზიდენტმა, შაი ვინინგერმა.

მისი თქმით, კომპანიის არსებულმა „გადაიხადე გავლილი მილის მიხედვით“ (pay-per-mile) პროდუქტმა მათ უნიკალური ტექნოლოგიური ბაზა მისცა რეალური მონაცემების შესაგროვებლად და ზუსტი, დინამიკური ფასების დასადგენად. დაზღვევის ახალი პროდუქტი არიზონაში 26 იანვარს ჩაეშვება, მომდევნო თვეში კი ორეგონში გახდება ხელმისაწვდომი.

Lemonade ამტკიცებს, რომ რაც უფრო უსაფრთხო გახდება FSD პროგრამული უზრუნველყოფა, მით მეტად შემცირდება ფასები. კომპანიის სტანდარტული ავტოდაზღვევა ამჟამად ხელმისაწვდომია აშშ-ის შემდეგ შტატებში:

• არიზონა
• კალიფორნია
• კოლორადო
• ილინოისი
• ინდიანა
• ოჰაიო
• ორეგონი
• ტენესი
• ტეხასი
• ვაშინგტონი

აღსანიშნავია, რომ Tesla წლებია საკუთარ სადაზღვევო პროდუქტს სთავაზობს მომხმარებლებს, თუმცა 2025 წლის ბოლოს კომპანია კალიფორნიის დაზღვევის დეპარტამენტის (CDI) მხრიდან სანქციების წინაშე აღმოჩნდა. ავტომწარმოებელსა და მის პარტნიორ State National Insurance Company-ს ბრალი ედებათ სადაზღვევო მოთხოვნებზე რეაგირების დაგვიანებაში, დაუსაბუთებელ უარებსა და ანაზღაურების არასამართლიან პრაქტიკაში. Tesla აღნიშნულ ბრალდებებს უარყოფს.