მარკეტინგული პლატფორმა Nectar Social-მა Menlo Ventures-ისგან $30 მილიონიანი ინვესტიცია მოიზიდა

ხელოვნურ ინტელექტზე დაფუძნებულმა მარკეტინგულმა პლატფორმამ, Nectar Social-მა, ხუთშაბათს A სერიის დაფინანსების რაუნდის დასრულების შესახებ გამოაცხადა. კომპანიამ 30 მილიონი აშშ დოლარი მოიზიდა, რაუნდს კი სათავეში Menlo Ventures და მისი Anthology Fund-ი ედგნენ, რომელიც Anthropic-თან თანამშრომლობით შეიქმნა.

კომპანია, რომელმაც გასულ წელს დაასრულა სატესტო რეჟიმში მუშაობა, მარკეტოლოგებისთვის განკუთვნილ „აგენტურ ოპერაციულ სისტემას“ წარმოადგენს. Nectar Social იყენებს ავტონომიურ AI აგენტებს, რომლებიც ბრენდებს სოციალური აქტივობების, მოდერაციის, კრეატორებთან მუშაობის პროცესების, კონკურენტული დაზვერვისა და კომერციული კომუნიკაციების სრულყოფილად მართვაში ეხმარება.

პლატფორმას გაფორმებული აქვს პარტნიორობა მონაცემთა გაცვლის შესახებ ისეთ კომპანიებთან, როგორიცაა Meta და Reddit. ეს Nectar-ის აგენტებს საშუალებას აძლევს, სხვადასხვა პლატფორმიდან მიღებული მონაცემები ერთ სივრცეში გააერთიანონ. შედეგად, ბრენდებს აღარ უწევთ სხვადასხვა ხელსაწყოების გამოყენება თითოეული სოციალური ქსელის ცალ-ცალკე სამართავად.

Nectar Social დებმა, მისბაჰ და ფარაჰ ურაიზებმა დააფუძნეს, რომლებიც მანამდე Meta-ს თანამშრომლები იყვნენ. კომპანიის აღმასრულებელი დირექტორის, მისბაჰ ურაიზის თქმით, მიღებული ინვესტიცია კომპანიას გაფართოებასა და ახალი კადრების აყვანაში დაეხმარება, განსაკუთრებით გამოყენებითი ხელოვნური ინტელექტის, ინჟინერიისა და ბაზარზე გასვლის (go-to-market) მიმართულებებით.

„ყიდვის პროცესმა სოციალურ ქსელებში გადაინაცვლა და ვერცერთი ადამიანური გუნდი ვერ შეძლებს ყველა იმ პლატფორმაზე ყოფნას, სადაც ეს ხდება. ჩვენ ვაძლიერებთ ჩვენს ლიდერობას იმ ოპერაციული სისტემის შექმნაში, რომელიც ბრენდებს ყველგან ყოფნის საშუალებას მისცემს“, — განაცხადა მისბაჰ ურაიზიმ.

კომპანიის ინფორმაციით, მათ კლიენტებს შორის არიან ისეთი ცნობილი ბრენდები, როგორიცაა Liquid Death, Figma და e.l.f Beauty. დაფინანსების რაუნდში ასევე მონაწილეობდნენ გვინეთ პელტროუს Kinship Ventures, GV და True Ventures.