მარტინ სკორსეზე ხელოვნური ინტელექტის სტარტაპის, Black Forest Labs-ის პარტნიორი და მრჩეველი გახდა

მარტინ სკორსეზე ხელოვნური ინტელექტის გამოსახულებების გენერირების სტარტაპის, Black Forest Labs-ის პარტნიორი და მრჩეველი გახდა. როგორც The New York Times-ი სამშაბათს იტყობინებოდა, მსოფლიოს ერთ-ერთი ყველაზე აღიარებული რეჟისორი ამ ტექნოლოგიას ექსკლუზიურად სთორიბორდების (storyboarding) შესაქმნელად გამოიყენებს.

„70 წელია, საკუთარ სთორიბორდებს თავად ვქმნი“, — აღნიშნა სკორსეზემ გამოცემასთან საუბრისას. მისი განმარტებით, ეს ციფრული ინსტრუმენტი ეხმარება მას, საკუთარი ხედვა ოპერატორებსა და დამდგმელ მხატვრებს ბევრად უფრო სწრაფად და ეფექტურად გაუზიაროს.

Black Forest Labs 70-წევრიანი გუნდია, რომლის სათავო ოფისი არა სან-ფრანცისკოში, არამედ გერმანიაში, ფრაიბურგში მდებარეობს. მიუხედავად უჩვეულო ლოკაციისა, სტარტაპი უზრუნველყოფს გამოსახულების გენერირების ფუნქციებს ისეთი გიგანტებისთვის, როგორიცაა Adobe, Canva, Microsoft და Meta. ინვესტორებმა კომპანია ბოლოს 3.25 მილიარდ დოლარად შეაფასეს. ინვესტორებს შორის არის BroadLight Capital-იც, რომლის თანადამფუძნებელი სკორსეზეს მენეჯერი, რიკ იორნია.

ტექნოლოგიური ფონი და უარი ილონ მასკს

Black Forest Labs დაარსებულია იმ გუნდის მიერ, რომელიც Stable Diffusion-ის შექმნის უკან დგას. Wired-ის ინფორმაციით, სტარტაპმა ბოლო თვეებში უარი თქვა ილონ მასკის xAI-სთან პარტნიორობაზე. მანამდე მათ Grok-ის გამოსახულების გენერატორზე ერთობლივად იმუშავეს, თუმცა თანამშრომლობა პლატფორმის შინაარსის უსაფრთხოების გარანტიებთან დაკავშირებული შეშფოთების გამო შეწყდა.

ჰოლივუდის დამოკიდებულების ცვლილება

მოსალოდნელია, რომ გასართობი ინდუსტრიის ზოგიერთ წარმომადგენელში ეს სიახლე გარკვეულ შეშფოთებას გამოიწვევს, მიუხედავად იმისა, რომ ტექნოლოგიის გამოყენების სფერო ამ შემთხვევაში მკაცრად არის შეზღუდული. მიუხედავად ამისა, სკორსეზეს გადაწყვეტილება კიდევ ერთი დასტურია იმისა, რომ ჰოლივუდის ოდესღაც მძაფრი წინააღმდეგობა ხელოვნური ინტელექტის მიმართ თანდათან რბილდება.