Uber-მა თანამშრომლებისთვის AI-ზე ხარჯვის ლიმიტი დააწესა: წლიური ბიუჯეტი ოთხ თვეში ამოიწურა

ხელოვნური ინტელექტის გამოყენება სულ უფრო ძვირდება, რის გამოც ზოგიერთი კომპანია ხარჯების ოპტიმიზაციის მიზნით მის მოხმარებას ზღუდავს. მათ შორისაა Uber-იც, რომელმაც ცოტა ხნის წინ შიდა მოხმარების ლიმიტები დააწესა, რათა AI-ზე გაწეული გადაჭარბებული ხარჯები შეამციროს.Bloomberg-ის ინფორმაციით, კომპანიამ შემოიღო ახალი წესი, რომელიც თითოეული თანამშრომლისთვის და თითოეული აგენტური კოდირების ხელსაწყოსთვის (მათ შორის Anthropic-ის Claude Code-ისა და Cursor-ისთვის) თვეში 1,500-დოლარიან ლიმიტს ითვალისწინებს. ხარჯების კონტროლი სპეციალური შიდა პანელის მეშვეობით ხდება, რომელზეც წვდომა ყველა თანამშრომელს აქვს. თუმცა, კომპანიის განმარტებით, გარკვეულ შემთხვევებში, ნებართვის საფუძველზე, ლიმიტის გადაჭარბება შესაძლებელია.ეს გადაწყვეტილება მოულოდნელი არ ყოფილა, რადგან აპრილში კომპანიის ტექნოლოგიურმა დირექტორმა (CTO) განაცხადა, რომ Uber-მა ხელოვნური ინტელექტისთვის განკუთვნილი მთელი წლიური ბიუჯეტი სულ რაღაც ოთხ თვეში გახარჯა. როგორც The Information ადრე იტყობინებოდა, ეს მას შემდეგ მოხდა, რაც Uber-მა თანამშრომლებს მოუწოდა, AI „რაც შეიძლება მეტად“ გამოეყენებინათ და შიდა რეიტინგების მეშვეობით მათ შორის კონკურენციაც კი წაახალისა.Uber-ის საოპერაციო დირექტორმა (COO), ენდრიუ მაკდონალდმა, ცოტა ხნის წინ ეჭვქვეშ დააყენა ხელოვნური ინტელექტის გავლენა პროდუქტიულობაზე. ერთ-ერთ პოდკასტში მან აღნიშნა, რომ „ძალიან რთულია ზღვარის გავლება“ AI-ის გამოყენებასა და მომხმარებლისთვის განკუთვნილ ახალ ფუნქციებს შორის. Uber-ის მიერ ხარჯების შემცირება ხაზს უსვამს უფრო ფართო პრობლემას, რომლის წინაშეც ტექნოლოგიური ინდუსტრია დგას: მაშინ, როდესაც საწარმოები AI-ში უზარმაზარ თანხებს დებენ, სად არის რეალური უკუგება ინვესტიციიდან (ROI)?ჯერჯერობით, ხელოვნური ინტელექტის ROI მეტწილად თეორიულ ფენომენად რჩება, რომლის მატერიალიზებასაც ყველა ელოდება, თუმცა ზოგიერთი კომპანია მოლოდინის რეჟიმში აშკარად მოთმინებას კარგავს.