Meta-ს ხელოვნური ინტელექტის ასისტენტს Amazon-ზე შოპინგი აეკრძალა

კვირა საღამოს, Meta-ს ხელოვნური ინტელექტის ასისტენტის, Muse-ის მომხმარებლები უცნაურ შეცდომის შეტყობინებას წააწყდნენ Amazon-ზე ნივთების შეძენის მცდელობისას. როგორც GeekWire იტყობინება, შეტყობინებაში ნათქვამი იყო: „არაავტორიზებული AI აგენტის მხრიდან წვდომის გაგრძელება არღვევს Amazon-ის გამოყენების პირობებს, რომლებზეც ჩვენი მომხმარებლები არიან შეთანხმებულნი“.
სხვა სიტყვებით რომ ვთქვათ, Muse-ისთვის, როგორც მყიდველისთვის, Amazon-ის კარები დაიკეტა. ნებისმიერ მომხმარებელს, რომელიც ხელოვნური ინტელექტის აგენტის მეშვეობით აპირებდა პროდუქტის შეძენას, სასურველი ნივთის სხვა პლატფორმაზე მოძებნა მოუწევს.
ეს ნაბიჯი შეიძლება აღქმულ იქნას, როგორც პირდაპირი დაპირისპირება ტექნოლოგიურ გიგანტებს შორის. Amazon-ს საკუთარი ენობრივი მოდელები გააჩნია და ამასთანავე, ფლობს ინტერნეტში ერთ-ერთ ყველაზე პოპულარულ გამოთვლით (inference) პლატფორმას. მანამ, სანამ კომპანიას არ აქვს სამართლებრივი ვალდებულება, რომ Muse-ს გზა გაუხსნას, მისი მხრიდან ამის გაკეთების მოტივაცია ნაკლებია.
თუმცა, არსებობს უფრო არსებითი მიზეზებიც, რის გამოც Amazon-ს, შესაძლოა, ჯერჯერობით არ სურდეს ე.წ. „აგენტური კომერციის“ (agentic commerce) ბიზნესში ჩართვა. თუ Muse შეცდომით განახორციელებს შეკვეთას, პრობლემის მოგვარება Amazon-ს მოუწევს — მას მოუწევს გამკლავება როგორც უკმაყოფილო მომხმარებელთან, ისე გაბრაზებულ გამყიდველთან.
მიუხედავად იმისა, რომ სხვა AI მოდელებთან შედარებით Muse-ს ჰალუცინაციების ერთ-ერთი ყველაზე დაბალი მაჩვენებელი აქვს, ეს მაჩვენებელი მაინც არ არის ნულის ტოლი. მაშინაც კი, თუ Amazon ხედავს პოტენციალს ხელოვნური ინტელექტის მიერ მართულ ვაჭრობაში, კომპანიამ შესაძლოა ამ პროცესის დანერგვა რამდენიმე ტექნოლოგიური ციკლით გადაავადოს, სანამ სისტემა უფრო სრულყოფილი არ გახდება.