Microsoft-ი გაყიდვების გუნდს OpenAI-სა და Anthropic-ის პროდუქტების კრიტიკას ავალებს

Microsoft-ი ცდილობს თავისი გაყიდვების გუნდი ხელოვნური ინტელექტის ინდუსტრიის სხვა მსხვილ მოთამაშეებთან კონკურენციისთვის უფრო აქტიურად მოამზადოს. Bloomberg-ის ანგარიშის თანახმად, სამშაბათს გამართულ შიდა შეხვედრაზე კომპანიის ხელმძღვანელებმა წარადგინეს გეგმა, რომლის მიხედვითაც გაყიდვების მენეჯერებმა OpenAI-ის, Google-ისა და Anthropic-ის პროდუქტები საკუთარ პროდუქტებთან უარყოფით კონტექსტში უნდა შეადარონ.

შეხვედრა, რომელიც ახალი ფისკალური წლის სტრატეგიულ სესიად იყო გამოცხადებული, ძირითადად ფოკუსირებული იყო Microsoft-ის შიდა მოდელების ეფექტურობასა და ხარჯთეფექტურობაზე კონკურენტებთან შედარებით. კომპანიის მიზანია, ბაზარზე საკუთარი უპირატესობა სწორედ ამ კომპონენტებით დაამტკიცოს.

„ყველა დანარჩენი მხოლოდ ნაწილებს ყიდის — ჩვენ კი ვყიდით სრულყოფილ, ერთიანი ციკლის (end-to-end) სისტემას. ეს არის ის გზავნილი, რომელიც ყველამ უნდა გავაჟღეროთ 2027 ფისკალურ წელს“, — განაცხადა აღმასრულებელმა ვიცე-პრეზიდენტმა ჯეი პარიხმა შეხვედრისას.

Copilot-ის შედარება კონკურენტებთან

Copilot-ის აღმასრულებელმა ვიცე-პრეზიდენტმა, ჯეიკობ ანდრეუმ, კიდევ უფრო პირდაპირი პრეზენტაცია წარადგინა, სადაც Copilot-ი უშუალოდ Anthropic-ის ჩატბოტს, Claude-ს შეადარა. Bloomberg-ის ინფორმაციით, ანდრეუმ აღნიშნა, რომ Microsoft-ის საოფისე აპლიკაციებში მუშაობისას Anthropic-ის მოდელი იყო „უფრო ნელი, ნაკლებად ზუსტი და არ გააჩნდა სათანადო უსაფრთხოების ინტეგრაციები“.

TechCrunch-ი კომენტარისთვის დაუკავშირდა როგორც Microsoft-ს, ისე Anthropic-ს, თუმცა პასუხი ამ დრომდე არ მიუღია. აღსანიშნავია, რომ კომპანიის მიერ გაყიდვების გუნდის დატრენინგება კონკურენტების კრიტიკაზე უჩვეულო მოვლენა არ არის, თუმცა ამ შემთხვევაში ყურადღებას იქცევს სამიზნე ობიექტების ვინაობა.

პარტნიორებიდან კონკურენტებამდე

Microsoft-ი ახლა იმ კომპანიებს უპირისპირდება, რომლებზეც თავად იყო დამოკიდებული საკუთარი AI პროდუქტების შექმნისას. ეს ტენდენცია ბოლო პერიოდში სულ უფრო აშკარა ხდება. მიმდინარე თვის დასაწყისში გავრცელებული ინფორმაციით, Microsoft-მა ისეთ ფლაგმანურ აპლიკაციებში, როგორიცაა Word-ი და Excel-ი, OpenAI-ისა და Anthropic-ის მოდელები საკუთარი მოდელებით ჩაანაცვლა, რაც, ანგარიშის მიხედვით, ხარჯების შემცირებისკენ გადადგმული ნაბიჯია.

იყო დრო, როდესაც Microsoft-ი და OpenAI მჭიდროდ იყვნენ დაკავშირებულნი. წლების წინ მათ გააფორმეს უნიკალური შეთანხმება, რომლის მიხედვითაც Microsoft-ი უზრუნველყოფდა კაპიტალსა და გამოთვლით სიმძლავრეებს, სანაცვლოდ კი იღებდა ექსკლუზიურ წვდომას OpenAI-ის API-სა და მოდელებზე. თუმცა, აპრილში კომპანიებმა პარტნიორობის პირობები შეცვალეს, გააუქმეს ექსკლუზიურობის პუნქტი და OpenAI-ს საშუალება მისცეს, თავისი პროდუქტები Microsoft-ის კონკურენტებზეც გაყიდოს. სწორედ ეს შეცვლილი ურთიერთობა ხსნის გაყიდვების გუნდის ახალ, უფრო აგრესიულ მიდგომას.

ფინანსური მოლოდინები და სტრატეგია

გასული წლის განმავლობაში Microsoft-ი საფონდო ბირჟაზე არცთუ ისე ოპტიმალურ პროგნოზებს ებრძვის. ინვესტორები კითხვის ნიშნის ქვეშ აყენებენ კომპანიის მასშტაბურ ხარჯებს AI ბიზნესის მშენებლობის პროცესში. საკუთარი პროდუქტების კონკურენტუნარიანობაზე ხაზგასმა, სავარაუდოდ, მიზნად ისახავს ინვესტორების დამშვიდებას და Microsoft-ის გრძელვადიანი AI გეგმის მიმართ ნდობის აღდგენას.