Microsoft Lens-ის დასასრული: მარტივი სკანერის აპლიკაცია ხელოვნურ ინტელექტს უთმობს ადგილს

Microsoft-ი აცხადებს, რომ მისი პოპულარული დოკუმენტების სკანერის აპლიკაცია Lens-ი, რომელიც 2015 წლიდან მილიონობით მომხმარებელს ემსახურება, 2025 წლის ბოლოს შეწყვეტს არსებობას. კომპანია მომხმარებლებს Copilot-ის ხელოვნური ინტელექტის აპლიკაციისკენ მიმართავს.

Microsoft Lens-ი, რომელიც თავდაპირველად Windows Phone-ისთვის შეიქმნა, გამოირჩეოდა თავისი სიმარტივითა და ეფექტურობით. აპლიკაცია საშუალებას აძლევდა მომხმარებლებს, ხელნაწერი დოკუმენტები, ვიზიტის ბარათები, ქვითრები და დაფაზე შესრულებული ჩანაწერები ციფრულ ფორმატში გადაეყვანათ.

ოფიციალური განცხადების თანახმად, აპლიკაცია iOS და Android პლატფორმებზე 2025 წლის 15 სექტემბრიდან შეწყვეტს მუშაობას, ხოლო 15 ნოემბრიდან App Store-იდან და Google Play-დან ამოღებული იქნება. არსებულ მომხმარებლებს შეეძლებათ სკანირების ფუნქციის გამოყენება 15 დეკემბრამდე.

სტატისტიკური მონაცემების თანახმად, ბოლო 30 დღის განმავლობაში აპლიკაცია 322,000-ზე მეტჯერ ჩამოიტვირთა, ხოლო 2017 წლის იანვრიდან მისი ჯამური ჩამოტვირთვების რაოდენობა 92.3 მილიონს აღწევს.

ექსპერტები აღნიშნავენ, რომ Copilot-ს, რომელიც Lens-ის ჩამნაცვლებლად მოიაზრება, არ გააჩნია რიგი მნიშვნელოვანი ფუნქციები, მათ შორის OneNote-ში, Word-სა და PowerPoint-ში პირდაპირი შენახვის შესაძლებლობა. ასევე არ აქვს ხელმისაწვდომობის ისეთი ფუნქციები, როგორიცაა ხმამაღლა წაკითხვა და Immersive Reader-ის ინტეგრაცია.