მირა მურატის AI სტარტაპი Thinking Machines 1 მილიარდი დოლარის მოზიდვას და 40 მილიარდიან შეფასებას გეგმავს

ხელოვნური ინტელექტის ლაბორატორია Thinking Machines, რომელიც გასული წლის დასაწყისში OpenAI-ს ყოფილმა ტექნოლოგიურმა დირექტორმა, მირა მურატიმ დააფუძნა, 1 მილიარდი დოლარის მოზიდვაზე მოლაპარაკებებს აწარმოებს. The Information-ის ინფორმაციით, კომპანიის სავარაუდო საბაზრო ღირებულება ამ ეტაპზე მინიმუმ 40 მილიარდ დოლარად ფასდება.არსებული მონაცემებით, დაფინანსების ამ რაუნდს, შესაძლოა, კომპანიის მოქმედი ინვესტორი, Accel-ი ჩაუდგეს სათავეში. თუ გარიგება წარმატებით დასრულდა, კომპანიის ღირებულება იმაზე ნაკლები იქნება, ვიდრე Thinking Machines-ი გასული წლის ბოლოს გეგმავდა — მაშინ სტარტაპი 50 მილიარდი დოლარის ნიშნულს უმიზნებდა.კომპანიის ფინანსურ მდგომარეობასთან დაახლოებული წყაროს ცნობით, Thinking Machines-ის წლიური შემოსავალი (annual revenue run rate) ამჟამად 100 მილიონ დოლარს აჭარბებს. აღნიშნული მაჩვენებლის გათვალისწინებით, 40 მილიარდიანი შეფასება შემოსავალთან მიმართებით არაჩვეულებრივად მაღალ მულტიპლიკატორზე მიუთითებს. ამ საკითხთან დაკავშირებით Accel-სა და Thinking Machines-ს ოფიციალური კომენტარი ჯერჯერობით არ გაუკეთებიათ.მიმდინარე წლის ივლისში კომპანიამ წარადგინა Inkling — ღია წონის (open-weight) მოდელი, რომელიც შემოსავალს Tinker-ის პლატფორმაზე კორპორაციული მონაცემების ადაპტაციისთვის გამოთვლითი რესურსების გამოყენების საფასურით აგენერირებს.სტარტაპის წინა დაფინანსების რაუნდი ისტორიაში ერთ-ერთი ყველაზე მასშტაბური იყო — კომპანიამ 2 მილიარდი დოლარი მოიზიდა, რის შედეგადაც მისი ღირებულება 12 მილიარდ დოლარად შეფასდა. აღნიშნულ ინვესტიციას Andreessen Horowitz-ი ხელმძღვანელობდა, მასში ასევე მონაწილეობდნენ Nvidia, GV, Lightspeed და Conviction Partners. ინვესტორების მხარდაჭერა დიდწილად მირა მურატისა და მასთან ერთად OpenAI-დან წამოსული მკვლევრების პროფესიულ რეპუტაციას ეფუძნებოდა.მიუხედავად ამისა, Thinking Machines-ი ბოლო პერიოდში რამდენიმე მაღალი რანგის თანამშრომელმა დატოვა. ზოგიერთი თანადამფუძნებელი, მათ შორის ლილიან ვენგი და ლუკ მეტცი, კვლავ OpenAI-ს დაუბრუნდნენ.