Mixup: Google-ის ყოფილი თანამშრომლების ახალი აპლიკაცია, რომელიც AI-ფოტოების შექმნას თამაშად აქცევს

კომპანია Things, Inc.-მა, რომელიც Google-ის ყოფილი თანამშრომლებითაა დაკომპლექტებული და ცნობილია 3D დიზაინის აპლიკაციით Rooms, ახალი პროექტი წარადგინა. ეს არის სახალისო ფოტო რედაქტორი Mixup, რომელიც ხელოვნურ ინტელექტზე მუშაობს და ამ ეტაპზე მხოლოდ iOS-ის მომხმარებლებისთვისაა ხელმისაწვდომი. აპლიკაცია ნებისმიერ მსურველს საშუალებას აძლევს, შექმნას ახალი, AI-ით გენერირებული ფოტოები ე.წ. „რეცეპტების“ გამოყენებით, რომლებიც ცარიელი ადგილების შევსების პრინციპზეა აგებული.

მომხმარებელს შეუძლია გამოიყენოს საკუთარი ფოტო, ტექსტი ან მარტივი ჩანახატი და „რეცეპტის“ დახმარებით სრულიად ახალი გამოსახულება მიიღოს. მაგალითად, შეგიძლიათ თქვენივე დახატული ესკიზი რენესანსის ეპოქის ნახატად აქციოთ, ან თქვენი შინაური ცხოველი სასაცილო ჰელოუინის კოსტიუმში წარმოიდგინოთ. აპლიკაციით ასევე შესაძლებელია სელფის მეშვეობით ნახოთ, როგორ მოგიხდებათ თმის ახალი ვარცხნილობა, ან შექმნათ უფრო უცნაური და სახალისო ვერსიები.

აპლიკაცია Google-ის Nano Banana მოდელზეა აგებული, თუმცა „რეცეპტების“ ფორმატი მასთან ინტერაქციის სრულიად ახალ გზას ქმნის და გენერაციულ ხელსაწყოს ონლაინ გასართობ თამაშად გარდაქმნის. „Nano Banana-მ ისეთი რამ შეძლო, რაც მანამდე არცერთ მოდელს არ გაუკეთებია — მას შეუძლია აიღოს თქვენი გამოსახულება და დამაჯერებლად, „საშინელი“ ეფექტის გარეშე შეინარჩუნოს ის“, — ამბობს Things, Inc.-ის დამფუძნებელი და აღმასრულებელი დირექტორი ჯეისონ ტოფი, რომელსაც Google-ში, Meta-სა და Twitter-ში მუშაობის გამოცდილება აქვს.

Mixup-ის მთავარი უპირატესობა ისაა, რომ მომხმარებლების მიერ შექმნილი „რეცეპტების“ გაზიარება შესაძლებელია. „გენერაციული AI ძალიან ძლიერია, მაგრამ ხშირად, როცა ამ ინსტრუმენტებს იყენებ, გხვდება ცარიელი ტექსტური ველი და მოთხოვნა — მოიფიქრე რამე კრეატიული. მაგრამ რა უნდა დაწერო?“ — აღნიშნავს ტოფი და განმარტავს, რომ მისი გუნდის მიზანი სწორედ ამ პრობლემის გადაჭრა იყო. „იმის ნაცვლად, რომ თავად იყო კრეატიული და იფიქრო, რა შექმნა, შენ ხედავ იმას, რაც სხვასთან უკვე იმუშავა და შეგიძლია უბრალოდ ცარიელი ადგილები შეავსო“, — ამბობს ის.

ახალი „რეცეპტის“ შექმნის შემდეგ, მომხმარებელს შეუძლია ის მიღებულ ფოტოსთან ერთად საჯარო სივრცეში გამოაქვეყნოს ან უბრალოდ პირადი გამოყენებისთვის შეინახოს. საჯარო სივრციდან სხვა მომხმარებლებს შეუძლიათ ნახონ ფოტო და ღილაკზე „სცადე რეცეპტი“ დაჭერით, იგივე შაბლონი საკუთარი ფოტოს, ტექსტის ან ნახატის გამოყენებით გამოსცადონ. ნახატის შექმნა აპლიკაციაში ჩაშენებული მარტივი სახატავი ფუნქციითაა შესაძლებელი.

გუნდის აზრით, ფოტოსა და მისი შემქმნელი „რეცეპტის“ ერთად ნახვა გენერაციული AI-ის არაპროგნოზირებად ბუნებასთან დაკავშირებულ პრობლემასაც აგვარებს. „კიდევ ერთი პრობლემა, რომელსაც ჩვენ შიდა სამზარეულოში „სათამაშო აპარატის“ პრობლემას ვუწოდებდით, არის ის, რომ ღილაკს აჭერ, რაღაც გამოდის, ისევ აჭერ და სულ სხვა რამ გამოდის. გაქვს შეგრძნება, რომ შედეგს ვერ აკონტროლებ“, — განმარტავს ტოფი. Mixup-ში კი მომხმარებლები ხედავენ როგორც ფოტოს, ისე მის წარმმართველ ბრძანებას, რაც მათ წარმოდგენას უქმნის, თუ რას უნდა ელოდონ.

აპლიკაციას აქვს „mixables“ ფუნქციაც, რომელიც მომხმარებლებს საშუალებას აძლევს, ატვირთონ საკუთარი ფოტოები. თუ ამ ფუნქციას აირჩევთ, ნებისმიერ ადამიანს, ვისაც გამოწერილი ჰყავხართ, შეეძლება თქვენი სახის გამოყენებით ახალი AI-გამოსახულებები შექმნას. კომპანია ვარაუდობს, რომ ამ ფუნქციას მეგობრების ჯგუფები გამოიყენებენ, თუმცა შესაძლოა, პლატფორმაზე „კონტენტის შემქმნელთა კლასიც“ გაჩნდეს. რა თქმა უნდა, თუ არ გსურთ თქვენი ფოტოს გამოყენება, შეგიძლიათ არ ატვირთოთ ის ან არავინ გამოიწეროთ.

მოდერაციისთვის აპლიკაცია ნაწილობრივ OpenAI-ის ტექნოლოგიას იყენებს, თუმცა, ტოფის თქმით, ის ძირითადად Google-ის მოდელში ჩაშენებულ კონტროლის მექანიზმებს ეყრდნობა, რომლებიც ისეთ კონტენტს ბლოკავს, როგორიცაა სექსუალური შინაარსის მასალა ან ძალადობა.

გამოსვლისას Mixup ოპტიმიზირებული იქნება iOS 26-ისთვის, თუმცა იმუშავებს iOS 18 და უფრო ახალ ვერსიებზეც. წარმატების შემთხვევაში, შესაძლოა, მოგვიანებით ვებ-ვერსია ან Android-აპლიკაციაც შეიქმნას. უფასო მომხმარებლები 100 კრედიტს მიიღებენ, რაც 4 დოლარის ეკვივალენტია, ხოლო ერთი ფოტოს გენერირება დაახლოებით 4 ცენტი ჯდება. კრედიტების ამოწურვის შემდეგ შესაძლებელია ყოველთვიური გამოწერის პაკეტების შეძენა, რომლებიც 100, 250 ან 500 კრედიტს მოიცავს. აპლიკაცია App Store-ზე გლობალურად 20 ნოემბერს, შუაღამით გამოვა და თავდაპირველად მოსაწვევებით იქნება ხელმისაწვდომი.