მონაცემთა ცენტრები ყურადღების ცენტრშია: აშშ-ის სენატს მათი ელექტროენერგიის ხარჯების კონტროლი სურს

ამერიკელმა სენატორებმა მონაცემთა ცენტრებისა და მათი ენერგომოხმარების წინააღმდეგ მორიგი ნაბიჯი გადადგეს. სენატორებმა ჯოშ ჰოულიმ და ელისაბედ უორენმა ოფიციალური წერილით მიმართეს აშშ-ის ენერგეტიკული ინფორმაციის ადმინისტრაციას (EIA). ისინი უწყებისგან მონაცემთა ცენტრების მიერ მოხმარებული ენერგიის შესახებ დეტალური ინფორმაციის შეგროვებას და იმის დადგენას ითხოვენ, თუ რა გავლენას ახდენს ეს მოხმარება საერთო ენერგოსისტემაზე.

სენატორები მოუწოდებენ EIA-ს, დააწესოს სავალდებულო ყოველწლიური ანგარიშგება მონაცემთა ცენტრებისა და სხვა მსხვილი მომხმარებლებისთვის. წერილში, რომელიც TechCrunch-მა მოიპოვა, აღნიშნულია, რომ ელექტროენერგიაზე მოთხოვნის ზრდა წლების განმავლობაში სტაგნაციის შემდეგ კვლავ დაჩქარდა. სენატორების აზრით, სანდო და სტანდარტიზებული მონაცემების ნაკლებობა დიდ რისკებს უქმნის ენერგოსისტემის ეფექტურ დაგეგმვასა და ზედამხედველობას.

ეს არ არის პოლიტიკოსების პირველი მცდელობა მონაცემთა ცენტრებისთვის ახალი რეგულაციების დასაწესებლად. სენატორმა ბერნი სანდერსმა და კონგრესმენმა ალექსანდრია ოკასიო-კორტესმა განაცხადეს, რომ წარადგენენ კანონპროექტს, რომელიც შეაჩერებს ახალი მონაცემთა ცენტრების მშენებლობას მანამ, სანამ კონგრესი ხელოვნური ინტელექტის რეგულირების საკითხზე არ შეთანხმდება.

ენერგომოხმარების მკვეთრი ზრდა

მონაცემთა ცენტრების მიერ ენერგიის მოხმარება ბოლო წლებში მკვეთრად გაიზარდა. მაგალითად, Google-ის მონაცემთა ცენტრების მოხმარება 2020-დან 2024 წლამდე გაორმაგდა. ეს ტენდენცია უახლოეს მომავალში არ შეიცვლება — პროგნოზების მიხედვით, 2035 წლისთვის დაგეგმილი ახალი მონაცემთა ცენტრები სექტორის ენერგო მოთხოვნას თითქმის გაასამმაგებს.

EIA არის სამთავრობო სააგენტო, რომელსაც ენერგეტიკულ სისტემასთან დაკავშირებული მონაცემების შეგროვება და ანალიზი ევალება. იგი 1977 წელს, ენერგეტიკის დეპარტამენტის დაქვემდებარებაში, 70-იანი წლების ნავთობის კრიზისის შემდეგ შეიქმნა. ათწლეულების განმავლობაში სააგენტო აგროვებდა ინფორმაციას ენერგიის ხარჯების, გენერაციის წყაროებისა და ენერგოეფექტურობის პროგრამების შესახებ. ამჟამად ის ენერგიის გამოყენებას ოთხ ძირითად კატეგორიაში აკვირდება: საცხოვრებელი, კომერციული, ინდუსტრიული და სატრანსპორტო სექტორები.

სენატორების კონკრეტული მოთხოვნები

ჰოული და უორენი EIA-სგან უფრო დეტალური ინფორმაციის შეგროვებას ითხოვენ, მათ შორის იმის გარკვევას, თუ როგორ განსხვავდება ენერგიის მოხმარება ხელოვნური ინტელექტის გამოთვლით ამოცანებსა და ზოგად ღრუბლოვან სერვისებს შორის. სენატორებს აქვთ კონკრეტული მოთხოვნები იმის შესახებ, თუ რა მონაცემები უნდა იქნას წარმოდგენილი:

• საათობრივი, წლიური და პიკური ენერგეტიკული დატვირთვა;
• ტარიფები, რომლებსაც კომპანიები იხდიან;
• ინფორმაცია ენერგოსისტემის ნებისმიერი განახლების შესახებ, რომელიც საჭირო გახდა ახალი მსხვილი ობიექტების დამატების გამო;
• ინფორმაცია იმის შესახებ, თუ ვინ ფარავს ამ განახლების ხარჯებს;
• მონაწილეობენ თუ არა მონაცემთა ცენტრების კლიენტები „მოთხოვნის მართვის“ (demand response) პროგრამებში, სადაც ენერგოკომპანიები მსხვილ მომხმარებლებს გარკვეული პერიოდის განმავლობაში მოხმარების შემცირებისთვის თანხას უხდიან.

პროცესის ვადები და სირთულეები

წერილში ნახსენებია EIA-ს ადმინისტრატორი ტრისტან ები, რომელმაც დეკემბერში აღნიშნა, რომ სააგენტო იქნება „მნიშვნელოვანი მოთამაშე“ მონაცემთა ცენტრების ენერგომოხმარების შესახებ ინფორმაციის შეგროვებაში. სენატორებმა სააგენტოს პასუხის გასაცემად ვადა 9 აპრილამდე განუსაზღვრეს.

შესაძლოა, პროცესი უკვე დაწყებულია, თუმცა EIA-ს ამის შესახებ საჯაროდ ჯერ არ განუცხადებია. სააგენტოს გამოკითხვებში ცვლილებების შეტანამ უნდა გაიაროს მართვისა და ბიუჯეტის ოფისის პროცედურები, რაც საჯარო განხილვის პერიოდსაც მოიცავს.

„ანალიზის ჩატარების მოთხოვნას ხშირად ვიღებთ, თუმცა სრულიად ახალი პროდუქტის შექმნის მოთხოვნა შედარებით იშვიათია,“ — განაცხადა ებიმ დეკემბერში გამართულ ღონისძიებაზე. მისივე თქმით, ახალი გამოკითხვის ნულიდან დაწყებას დაახლოებით ორი წელი სჭირდება, თუმცა არსებობს მექანიზმები, რომლებიც მცირე მასშტაბის, მაგრამ უფრო მიზნობრივი გამოკითხვების ჩატარების საშუალებას იძლევა, რაც ამ პროცესს აჩქარებს.