ნახევარი ტრილიონი დოლარის ეკოსისტემა: როგორ იქცა სკანდინავია ტექნოლოგიურ ჰაბად

ჰელსინკიში გასულ კვირას გამართულმა კონფერენციამ Slush კიდევ ერთხელ წარმოაჩინა ევროპული ტექნოლოგიური ეკოსისტემის მზარდი ძალა. განსაკუთრებულ ყურადღებას ჩრდილოეთ ევროპის ქვეყნები, ანუ სკანდინავია იპყრობს, სადაც ამჟამად შვედური სტარტაპი Lovable ლიდერობს. რეგიონის წარმატების ძველი, თუმცა თვალსაჩინო მაგალითებია ისეთი კომპანიები, როგორიცაა Klarna და Spotify.

სკანდინავიური ეკოსისტემის ბუმის შესახებ სასაუბროდ Equity-ის გადაცემას ხელოვნური ინტელექტის კომპანია Propane-ის დამფუძნებელი, დენის გრინ-ლიბერი ესტუმრა. ის დანიაში ცხოვრობს და ამ ეკოსისტემაში უკვე 15 წელია მოღვაწეობს. მისი აზრით, რეგიონის წარმატება რამდენიმე ფაქტორს ეფუძნება, მათ შორის სოციალური დაცულობის მაღალ დონეს, რაც ახალგაზრდებს საშუალებას აძლევს, წამოიწყონ ბიზნესი ყველაფრის დაკარგვის შიშის გარეშე.

„ახალი თაობის დამფუძნებლები ბევრად უფრო თამამები არიან და მეტ პასუხისმგებლობას იღებენ“, — განაცხადა გრინ-ლიბერმა. „ჩემი 15-წლიანი გამოცდილების განმავლობაში, მსგავსი არაფერი მინახავს, რაც ახლა ხდება“. ერთი-ერთი ანგარიშის თანახმად, რეგიონი თანდათან ღრმა ტექნოლოგიებისა (deep tech) და ხელოვნური ინტელექტის ცენტრად ყალიბდება.

სკანდინავიური ეკოსისტემა ამჟამად ნახევარ ტრილიონ დოლარად არის შეფასებული, ხოლო 2024 წელს ადგილობრივმა სტარტაპებმა 8 მილიარდ დოლარზე მეტი ვენჩურული ინვესტიცია მოიზიდეს. ამ პროცესში მნიშვნელოვან როლს ასრულებს მთავრობაც, რომელიც დამწყებ კომპანიებს, მათ შორის გრინ-ლიბერის სტარტაპს, ზრდისთვის საჭირო დაფინანსებას აძლევს.

გრინ-ლიბერი ნაწილობრივ ეთანხმება მოსაზრებას, რომ ეკოსისტემა ზოგიერთი ასპექტით რამდენიმე წლით ჩამორჩება, თუმცა, ამავდროულად, დასძენს: „ჩვენ ბევრად, ბევრად სწრაფად ვვითარდებით“. საუბარი შეეხო ხელოვნური ინტელექტის სფეროში შესაძლო „ბუშტის“ არსებობასაც, რაზეც მან უპასუხა, რომ დარწმუნებული არ არის.

„არსებობს უამრავი შესაძლებლობა, რომელიც ჯერ კიდევ აუთვისებელია“, — აღნიშნა მან. მისივე თქმით, მართალია, ზოგიერთი ინვესტორი ფულს არასწორ პროექტებში აბანდებს, მაგრამ „ეს უბრალოდ ვენჩურული კაპიტალის რისკია“.