ნიუ-იორკის კანონების დარღვევა სტარტაპ Kiki-ს $152,000-ზე მეტი დაუჯდა

ოკლენდში დაფუძნებულმა სტარტაპმა Kiki Club, რომელიც მომხმარებლებს ბინების ქვექირავნობაში ეხმარებოდა, ნიუ-იორკის მკაცრი კანონების დარღვევის გამო საქმიანობა შეწყვიტა და 152,000 დოლარზე მეტის გადახდაზე დათანხმდა. კომპანია ქალაქში 2023 წელს გამოჩნდა და მოგზაურობის პერიოდში მყოფ ადამიანებს საკუთარი საცხოვრებლის ექვს თვემდე ვადით გაქირავების გამარტივებულ გზას სთავაზობდა.

ნიუ-იორკის მერის სპეციალური აღსრულების ოფისის (OSE) განცხადებით, Kiki-სთან მიღწეულია შეთანხმება ჯარიმის გადახდის თაობაზე. სტარტაპი, რომელიც Blackbird-ის მხარდაჭერით სარგებლობდა და Airbnb-ის კონკურენტად მოიაზრებოდა, გაცნობის აპლიკაციების მსგავსი ალგორითმით მუშაობდა და ერთმანეთთან პრეფერენციების მიხედვით აკავშირებდა ბინის გამქირავებლებსა და დამქირავებლებს.

პრობლემები მას შემდეგ დაიწყო, რაც კომპანიის საქმიანობა ქალაქის მოკლევადიანი გაქირავების კანონმდებლობასთან, კერძოდ კი 2022 წელს მიღებულ „კანონი 18“-თან, წინააღმდეგობაში მოვიდა. ეს კანონი მკაცრ რეგულაციებს აწესებს და მოკლევადიან გაქირავებას მხოლოდ იმ შემთხვევაში უშვებს, თუ მესაკუთრე რეგისტრირებულია OSE-ს ბაზაში და ამასთანავე, სტუმრებთან ერთად იმავე საცხოვრებელში იმყოფება.

მონიტორინგის ორგანიზაცია Inside Airbnb-ის მონაცემებით, კანონის ამოქმედების შემდეგ Airbnb-ის მასპინძლებისთვის რეგულაციები იმდენად გართულდა, რომ მოკლევადიანი გაქირავების მაჩვენებელი პლატფორმაზე დრამატულად, 85%-ით შემცირდა. კანონის თანახმად, ჯავშნის სერვისები ვალდებულნი არიან, გამოიყენონ OSE-ს ვერიფიკაციის სისტემა და დარწმუნდნენ, რომ გამქირავებელი რეგისტრირებულია ან გამონაკლისს ექვემდებარება.

OSE-ს ინფორმაციით, Kiki-მ ვერ წარადგინა კვარტალური ანგარიშები და არ მოახდინა 400-მდე ტრანზაქციის ვერიფიკაცია. დაუდასტურებელ ტრანზაქციებზე ჯარიმა 1,500 დოლარს ან მიღებული შემოსავლის სამმაგ ოდენობას შეადგენს, იმის მიხედვით, თუ რომელი უფრო დაბალია. „ეს შეთანხმება ნათელი გზავნილია: თუ კომპანია ხარ, რომელიც მოკლევადიან გაქირავებას უწყობს ხელს, ქალაქის კანონების იგნორირება ძვირად დაგიჯდებათ“, — განაცხადა OSE-ს აღმასრულებელმა დირექტორმა, კრისტიან კლოსნერმა.

მისივე თქმით, „Kiki Club მოქმედებდა როგორც არარეგისტრირებული და უკანონო გაქირავების ფარული არხი, რაც პირდაპირ ძირს უთხრიდა ქალაქის მცდელობებს, დაეცვა მოიჯარეები და შეენარჩუნებინა მუდმივი საცხოვრებელი ფონდი“. Kiki-ს ბრალდებები არც უღიარებია და არც უარყვია, თუმცა ჯარიმა გადაიხადა. კომპანიის წარმომადგენელმა ერთ-ერთ ინტერვიუში ადრე აღნიშნა, რომ ისინი აცნობიერებდნენ, რომ „რუხ მარეგულირებელ ზონაში“ ოპერირებდნენ.

ნიუ-იორკში მიღებული სერიოზული შედეგების მიუხედავად, Kiki დანებებას არ აპირებს. ივნისში სტარტაპმა ლონდონში საქმიანობის დაწყების შესახებ გამოაცხადა. აღსანიშნავია, რომ დიდ ბრიტანეთსაც აქვს მკაცრი კანონები არალეგალურ გაქირავებასთან დაკავშირებით. პირისთვის, რომელსაც ქვეყანაში ქირაობის უფლება არ აქვს, საცხოვრებლის მიქირავება შესაძლოა ხუთ წლამდე პატიმრობით ან სოლიდური ჯარიმით დასრულდეს. იმედია, სტარტაპმა ნიუ-იორკში ღირებული გაკვეთილი მიიღო, რათა მის ლონდონურ პლატფორმას იგივე ბედი არ ეწიოს.