Nvidia და AMD ჩინეთში AI ჩიპების გაყიდვებიდან აშშ-ს მთავრობას წილს გადაუხდიან

ტექნოლოგიური გიგანტები Nvidia და AMD მზად არიან ჩინეთში მაღალი წარმადობის ხელოვნური ინტელექტის ჩიპების გაყიდვისთვის აშშ-ს მთავრობას შემოსავლის 15% გადაუხადონ. ამის შესახებ Financial Times-ი ანონიმურ წყაროებზე დაყრდნობით იუწყება.

ინფორმაციის თანახმად, Nvidia გაყიდის H20 AI ჩიპებს, ხოლო AMD - MI308 მოდელებს. მთავრობამ უკვე დაიწყო ორივე კომპანიისთვის სავაჭრო ლიცენზიების გაცემა, რაც მათ ჩინეთის ბაზარზე ოპერირების საშუალებას მისცემს.

ტრამპის ადმინისტრაციამ აპრილში ჩინეთისთვის მაღალი წარმადობის AI ჩიპების მიწოდება შეზღუდა, თუმცა რამდენიმე თვეში შეზღუდვა შეაჩერა მას შემდეგ, რაც Nvidia-მ აშშ-ში 500 მილიარდი დოლარის ინვესტიციის განხორციელება დააანონსა.

Nvidia-ს წარმომადგენლის განცხადებით, კომპანია მკაცრად იცავს აშშ-ს მთავრობის მიერ დადგენილ წესებს საერთაშორისო ბაზრებზე მონაწილეობისთვის. მიუხედავად იმისა, რომ H20 ჩიპები რამდენიმე თვის განმავლობაში არ მიუწოდებიათ ჩინეთისთვის, იმედოვნებენ, რომ ექსპორტის კონტროლის წესები აშშ-ს საშუალებას მისცემს კონკურენცია გაუწიოს ჩინეთს და სხვა ქვეყნებს.

აშშ-ს სავაჭრო მდივნის, ჰოვარდ ლუტნიკის თქმით, Nvidia-ს პოზიციის ცვლილება დაკავშირებულია ჩინეთთან იშვიათი მიწის ელემენტების თაობაზე სავაჭრო მოლაპარაკებებთან, რომლებიც აუცილებელია ელექტრომობილების აკუმულატორების წარმოებისთვის.

თუმცა, ეროვნული უსაფრთხოების ექსპერტებმა და ყოფილმა სამთავრობო მოხელეებმა გასულ თვეს ლუტნიკს წერილით მიმართეს და H20 ჩიპების გაყიდვის ნებართვის გადახედვისკენ მოუწოდეს.