Peripheral Labs-ი თვითმართვადი ავტომობილების სენსორებს სპორტის გულშემატკივრებისთვის იმერსიული გამოცდილების შესაქმნელად იყენებს

მრავალი ანგარიში მიუთითებს, რომ სპორტული გადაცემების ყურების მაჩვენებელი გარკვეულ სახეობებში იკლებს, რაც განსაკუთრებით შესამჩნევია Z თაობის წარმომადგენლებს შორის. ამ გამოწვევის საპასუხოდ, ლიგები და მაუწყებლები ცდილობენ სპორტი უფრო მიმზიდველი გახადონ სხვადასხვა ტიპის ვიზუალური გამოცდილების, სტატისტიკისა და სიღრმისეული ანალიზის მეშვეობით.

ამ მიზნის მისაღწევად ერთ-ერთი გზა მოცულობითი ვიდეოგენერაციაა (volumetric video generation), რომელიც მომხმარებლებს საშუალებას აძლევს, თამაშს სხვადასხვა რაკურსით უყურონ და ვიდეოთამაშის მსგავსი გამოცდილება მიიღონ. ტექნოლოგიის საფუძველი მრავალი კამერის გამოყენებაა, რომლებიც კადრებს 3D ფორმატში აფიქსირებენ. კანადაში დაფუძნებულ Peripheral Labs-ს სურს, ეს ტექნოლოგია ლიგებისა და გუნდებისთვის ხელმისაწვდომი გახადოს, რათა მან უფრო მეტ მაუწყებელსა და გულშემატკივარს მიაღწიოს.

Peripheral Labs-ი 2024 წელს კელვინ კუიმ და მუსტაფა ხანმა დააფუძნეს. ორივე მათგანი ტორონტოს უნივერსიტეტის გუნდში თვითმართვად ავტომობილებზე მუშაობდა და არაერთი ჯილდოც მოიპოვა. ხანი ადრე Huawei-ში მკვლევრად მუშაობდა, კუის კი Tesla-ში პროგრამულ ინჟინრად მუშაობის გამოცდილება აქვს, სადაც შასის სისტემებზე იყო პასუხისმგებელი.

„მეც და მუსტაფაც სპორტის დიდი მოყვარულები ვართ. ის Arsenal-ის თავგამოდებული გულშემატკივარია, მე კი 7 წლიდან Vancouver Canucks-ის თამაშებზე გავიზარდე. როდესაც მუსტაფამ 3D რეკონსტრუქციის შესახებ თავისი კვლევა მაჩვენა, მივხვდი, რომ ჰოკეის ყურება ამ ფორმატში — თავისუფალი და მრავალკუთხოვანი ხედვით — ძალიან საინტერესო იქნებოდა. სწორედ ასე დავიწყეთ მუშაობა Peripheral Labs-ზე“, — აღნიშნა კუიმ TechCrunch-თან საუბრისას.

ტექნოლოგიური ტრანსფორმაცია და რობოტიქსი

კომპანიის განცხადებით, მოცულობითი გენერაციის იდეა ახალი არ არის, თუმცა ხელოვნური ინტელექტის ახალი მოდელებისა და კომპიუტერული ხედვის (computer vision) განვითარების წყალობით, დამფუძნებლები დარწმუნებულნი არიან, რომ ტექნოლოგია მასობრივი გამოყენებისთვის მზადაა.

დამფუძნებლები იყენებენ თვითმართვადი ავტომობილების სფეროში მიღებულ გამოცდილებას, რათა რობოტიქსის აღქმისა და 3D ხედვის კონცეფციები სპორტული ვიდეოების 3D რეკონსტრუქციაში დანერგონ. კუისა და ხანის თქმით, ამ სისტემას შეუძლია კამერების საჭირო რაოდენობა 100-დან 32-მდე შეამციროს, რაც საგრძნობლად ამცირებს ხარჯებსა და საოპერაციო დატვირთვას. სტარტაპის მიზანია, აპარატურული ხარჯები მინიმუმამდე დაიყვანოს და გუნდებთან თუ მაუწყებლებთან მრავალწლიანი კონტრაქტები გააფორმოს.

პროგრამული პლატფორმა გუნდებსა და ლიგებს მოთამაშეების ბიომექანიკურ მონაცემებსა და სტატისტიკას მიაწვდის საკუთარი სენსორების მეშვეობით. ეს სენსორები თვითმართვადი ავტომობილების მსგავსია, რომლებიც გარემოს სიღრმისეულად აღიქვამენ. ფოტორეალისტური 3D რეკონსტრუქციის ტექნოლოგია მაუწყებლებსა და გულშემატკივრებს ყურების ახალ შესაძლებლობებს მისცემს. მაგალითად, თუ გულშემატკივარს მხოლოდ ბურთის მქონე მოთამაშის თვალის დევნება სურს, ამას მარტივად შეძლებს. ასევე შესაძლებელი იქნება თამაშის მომენტის „გაყინვა“ და ჯარიმის ან კრიტიკული ეპიზოდის სხვადასხვა კუთხიდან დათვალიერება.

„მიუხედავად იმისა, რომ სტანდარტულ კამერებთან ვმუშაობთ, ჩვენი გამოცდილება რობოტიქსსა და მანქანურ სწავლებაში (ML) გვაძლევს უპირატესობას როგორც პლატფორმის კუთხით, ისე მასშტაბირებისას — მცირე სავარჯიშო სივრცეებიდან დიდ საფეხბურთო სტადიონებამდე“, — ამბობს კუი.

ანალიტიკა და ბიომექანიკა

პროგრამულ დონეზე პლატფორმას შეუძლია დააკვირდეს სხვადასხვა სახსარს, მათ შორის მოთამაშეების თითების მოძრაობასაც კი, რათა გაზომოს მოხრა (flexion). მაგალითად, ფეხბურთის თამაშის ვიდეოში სისტემა ზომავს მუხლებისა და კოჭების მოხრის ხარისხს. ეს მწვრთნელებს აძლევს ინფორმაციას სხეულის პოზიციონირებისა და მოთამაშის მოქნილობის შესახებ, რაც მათ განვითარებაში დაეხმარება.

ინვესტიციები და ბაზარზე პოზიციონირება

სტარტაპმა 3.6 მილიონი აშშ დოლარის მოცულობის Seed რაუნდი დახურა, რომელსაც Khosla Ventures-ი ხელმძღვანელობდა. ინვესტირებაში ასევე მონაწილეობდნენ Daybreak Capital, Entrepreneurs First და Transpose Platform.

ჯო როსმა, Entrepreneurs First-ის პარტნიორმა, აღნიშნა, რომ ფონდი გაკვირვებული იყო იმით, თუ რამდენად დიდი გავლენა აქვთ დამფუძნებლებსა და მათ ავტონომიური მართვის გუნდს ტორონტოს უნივერსიტეტში. მისი თქმით, ინვესტორები ხშირად ერიდებიან სპორტულ სტარტაპებში ფულის ჩადებას, თუმცა Peripheral Labs-ი ასევე გასართობი ინდუსტრიის ნაწილიცაა.

Peripheral Labs-ის წარმომადგენლების თქმით, ისინი ყურადღებით არჩევდნენ ვენჩურულ კაპიტალისტებს, რომლებსაც პროდუქტის განვითარებასა და ბაზარზე გასვლის სტრატეგიაში დახმარება შეეძლოთ. კომპანიაში ამჟამად 10 ინჟინერი მუშაობს. გუნდი გეგმავს თანამშრომლების რაოდენობის გაზრდას პლატფორმისა და აპარატურის განვითარების მიმართულებით, რათა კიდევ უფრო შეამცირონ ხარჯები, სისტემის დაყოვნება (latency) და გაზარდონ 3D რეკონსტრუქციის რეზოლუცია.

სტარტაპს ჯერჯერობით ოფიციალურად არ გამოუცხადებია პარტნიორების ვინაობა, თუმცა ადასტურებენ, რომ მოლაპარაკებებს აწარმოებენ ჩრდილოეთ ამერიკის რამდენიმე გუნდთან და ლიგასთან. სპორტის მოცულობითი გადაღების სფეროში კომპანიის ერთ-ერთი მთავარი კონკურენტი Arcturus Studios-ია.