Perplexity-მ Google Chrome-ის შესყიდვაზე 34.5 მილიარდიანი შეთავაზება გააკეთა

ხელოვნური ინტელექტის საძიებო სისტემის კომპანია Perplexity-მ Google-ს მოულოდნელი შეთავაზება გაუკეთა Chrome ბრაუზერის 34.5 მილიარდ დოლარად შესყიდვაზე. ინფორმაციას Reuters-ი ავრცელებს და მას თავად კომპანიაც ადასტურებს.

Perplexity-ის წარმომადგენლების განცხადებით, გარიგების პირობები ითვალისწინებს Chrome-ის საბაზისო სისტემის, Chromium-ის ღია კოდის სახით შენარჩუნებას და მასში დამატებით 3 მილიარდი დოლარის ინვესტირებას. კომპანია ასევე პირობას დებს, რომ არ შეცვლის მომხმარებლების სტანდარტულ პარამეტრებს, მათ შორის Google-ს როგორც ძირითად საძიებო სისტემას.

ეს შეთავაზება მოჰყვა აშშ-ის იუსტიციის დეპარტამენტის მარტის თვის წინადადებას, რომლის თანახმადაც Google-ს Chrome-ის გაყიდვა მოუწევს. ეს გადაწყვეტილება სასამართლოს მიერ კომპანიის მონოპოლისტურ საქმიანობასთან დაკავშირებული განაჩენის შემდეგ გაჩნდა.

Chrome, რომელსაც ბრაუზერების ბაზრის 68% უკავია Statcounter-ის მონაცემებით, კონკურენტი DuckDuckGo-ს აღმასრულებელი დირექტორის შეფასებით, შესაძლოა 50 მილიარდ დოლარზე მეტი ღირდეს.

აღსანიშნავია, რომ Perplexity-ის შეთავაზება მნიშვნელოვნად აღემატება კომპანიის მიერ მოზიდულ ინვესტიციებს, რომელიც დაახლოებით 1.5 მილიარდ დოლარს შეადგენს. კომპანიის ბოლო შეფასება 18 მილიარდ დოლარს უტოლდება.

ამასთან, Perplexity-მ გასულ თვეს საკუთარი ბრაუზერი Comet-ი გამოუშვა და, სავარაუდოდ, TikTok-თან გაერთიანების შეთავაზებაც წარადგინა.