Polymarket-ს ყალბი ფსონების შესახებ დეზინფორმაციული ვიდეოების გავრცელებაში ადანაშაულებენ

Wall Street Journal-ის ახალი გამოძიების თანახმად, საპროგნოზო ბაზრის პლატფორმა Polymarket-ი კონტენტის შემქმნელებს ფულს უხდიდა დეზინფორმაციული ვიდეოების გამოსაქვეყნებლად. აღნიშნულ ვიდეოებში ნაჩვენები იყო პლატფორმაზე განთავსებული მომგებიანი ფსონები, რომლებიც სინამდვილეში რეალობას არ შეესაბამებოდა.გამოცემამ 1100-მდე ვიდეო გააანალიზა, რომლებიც Polymarket-ის შესახებ იყო გადაღებული. გარდა ამისა, ჟურნალისტებმა შეისწავლეს ის ინსტრუქციებიც, რომლებსაც კომპანია კონტენტის შემქმნელებს აწვდიდა. კვლევამ აჩვენა, რომ ბევრი ვიდეო გადაღებული იყო Polymarket-ის ვებგვერდის „თითქმის იდენტურ ასლებზე“, სადაც ნაჩვენები ტრანზაქციები და მოგებები რეალური არ იყო.კონტენტის შემქმნელების მიერ მომზადებული მასალების პოპულარიზაციას მარკეტინგული კონტრაქტორის მიერ მობილიზებული „სოციალური მედიის არმია“ უზრუნველყოფდა. WSJ-ის ინფორმაციით, კომპანია ავალებდა შემქმნელებს, არ მიეთითებინათ, რომ ვიდეოების სანაცვლოდ ანაზღაურებას იღებდნენ. თუმცა, მას შემდეგ, რაც ჟურნალისტებმა ამ საკითხით დაინტერესება დაიწყეს, ავტორებმა თავიანთ აღწერებში (Bio) მონიშვნა „@polymarket partner“ დაამატეს.რაზინ ხანმა, სტუდენტმა და კონტენტის შემქმნელმა, რომელიც Polymarket-თან მარტამდე თანამშრომლობდა, ეს პრაქტიკა სწრაფი კვების ობიექტების რეკლამებს შეადარა, სადაც საკვები იმაზე მიმზიდველად გამოიყურება, ვიდრე ის რეალურ ცხოვრებაშია. მისი თქმით, ისინი უბრალოდ იმას ასახავდნენ, რაც სინამდვილეში ხდება.თავად Polymarket-ში აცხადებენ, რომ ისინი „ერთგულნი არიან ზუსტი, სამართლიანი და გამჭვირვალე ბაზრების შენარჩუნების პრინციპებისადმი“. კომპანია გეგმავს, ჩაატაროს თავისი სარეკლამო კონტენტის აუდიტი, რათა დაადგინოს შესაბამისობა დადგენილ სტანდარტებთან.