Roblox-მა მობილურ აპლიკაციაში ხელოვნური ინტელექტის დახმარებით თამაშების შექმნის ფუნქცია დაამატა

Roblox-მა ხუთშაბათს ახალი ფუნქცია, სახელწოდებით „Build“ წარადგინა, რომელიც მომხმარებლებს საშუალებას აძლევს, მობილური მოწყობილობების მეშვეობით, ხელოვნური ინტელექტის გამოყენებით შექმნან თამაშები. აღნიშნული ფუნქცია ნებისმიერ მსურველს აძლევს შესაძლებლობას, მარტივი ტექსტური მითითებების (prompts) საფუძველზე, ყოველგვარი პროგრამირების გამოცდილების გარეშე, შექმნას საბაზისო თამაში.

მაგალითად, თუ მომხმარებელი ჩაწერს: „შევქმნათ მყუდრო სათავგადასავლო თამაში უღრან ტყეში“, სისტემა დააგენერირებს თამაშის საწყის ვერსიას, რომლის მოდიფიცირება და მეგობრებისთვის გაზიარებაც შემდგომში იქნება შესაძლებელი. კომპანიის ბლოგპოსტში აღნიშნულია, რომ „Build“ ფუნქცია ეყრდნობა ხელოვნური ინტელექტის მოდელების ფართო სპექტრს, მათ შორის როგორც ღია კოდის მქონე, ისე Roblox-ის საკუთრებაში არსებულ მოდელებს. სისტემა თავად უზრუნველყოფს გეიმპლეის მექანიკას, გარემოს, პერსონაჟებს, ვიზუალურ სტილს, ხმასა და სხვა დეტალებს.

მსგავსი ინსტრუმენტები უკვე შექმნეს ისეთმა კომპანიებმა, როგორიცაა Google, Microsoft და Tencent. თუმცა, ხელოვნური ინტელექტის მიერ თამაშების გენერირებამ დეველოპერებსა და მოთამაშეებს შორის გარკვეული შეშფოთება გამოიწვია. კრიტიკოსები მიიჩნევენ, რომ ტექსტური მითითებებით თამაშების შექმნის ბარიერის შემცირებამ შესაძლოა გამოიწვიოს დაბალი ხარისხის და განმეორებადი თამაშების მოზღვავება. ამან შესაძლოა გაზარდოს კონკურენცია პლატფორმაზე, რადგან შემქმნელებს მოუწევთ კონკურენცია გაუწიონ არა მხოლოდ სხვა დეველოპერებს, არამედ ხელოვნური ინტელექტის მიერ გენერირებულ კონტენტსაც, რომელიც გაცილებით სწრაფად იქმნება.

ეს წუხილები აისახა Game Developers Conference-ის წლევანდელ კვლევაშიც (State of the Game Industry), რომლის მიხედვითაც, ინდუსტრიის პროფესიონალთა 52% მიიჩნევს, რომ გენერაციული ხელოვნური ინტელექტი უარყოფით გავლენას ახდენს სფეროზე. ამ პრობლემის მოსაგვარებლად, Roblox გეგმავს ხელოვნური ინტელექტით შექმნილი თამაშების რეიტინგის განსაზღვრას მოთამაშეების შენარჩუნების მაჩვენებლის (player retention) მიხედვით, ისევე როგორც ეს სხვა თამაშების შემთხვევაში ხდება. თუ თამაშს არავინ ითამაშებს, ის თვალსაჩინო ადგილზე აღარ გამოჩნდება.

„ჩვენი აღმოჩენის სისტემები ორიენტირებულია გრძელვადიანი შენარჩუნების მქონე თამაშების წინ წამოწევაზე და არა ხელოვნური ინტელექტის მიერ შექმნილ უხარისხო კონტენტზე (AI slop). მთავარ გვერდზე თამაშების ხარისხი არ შეიცვლება: თუ მას არავინ თამაშობს, მას ვერც ვერავინ იპოვის. ამ ახალი ინსტრუმენტების მიზანია შემოქმედებითი პროცესის დაჩქარება ყველა დონის მომხმარებლისთვის“, — აცხადებენ კომპანიაში.

ხელმისაწვდომობა და ტესტირება

„Build“ ფუნქციის საჯარო ალფა-ტესტირება 28 ივლისს დაიწყება და შემდეგი პირობებით იქნება ხელმისაწვდომი:

• ტესტირებაში მონაწილეობის მიღება შეუძლიათ ახალ ზელანდიაში მცხოვრებ 9 წელზე უფროსი ასაკის მომხმარებლებს, რომლებმაც გაიარეს ასაკის ვერიფიკაცია.
• 16 წლიდან მომხმარებლებს ექნებათ შესაძლებლობა, თავიანთი ნამუშევრები გლობალური აუდიტორიისთვის გამოაქვეყნონ.
• ხელმისაწვდომი იქნება როგორც უფასო საბაზისო ვერსია, ისე ფასიანი ოფციები.

სამომავლო გეგმები და დამატებითი ფუნქციები

გარდა „Build“ ფუნქციისა, Roblox მუშაობს ხელოვნური ინტელექტის სხვა ინსტრუმენტებზეც, რომლებიც უახლოეს თვეებში გამოვა:

• AI აგენტები: დაეხმარებიან შემქმნელებს თამაშების ტესტირებასა და ანალიტიკის მიღებაში.
• 3D აქტივების მოდელი: ხელოვნური ინტელექტის ფუნდამენტური მოდელი 3D სათამაშო ობიექტების შესაქმნელად.
• AI ჩატბოტი: დეველოპერების მხარდაჭერა თამაშის აგების პროცესში.
• სცენის გენერირების მოდელი: ახალი მოდელი, რომელსაც ერთი ტექსტური მითითებით მთლიანი, რედაქტირებადი და სათამაშო 3D სცენების შექმნა შეეძლება.

ეს სიახლეები ხაზს უსვამს Roblox-ის მზარდ ინვესტიციებს ხელოვნურ ინტელექტში. აღსანიშნავია, რომ ეს განცხადება მოჰყვა კომპანიის გადაწყვეტილებას „Roblox Connect“-ის გაუქმების შესახებ, რომელიც 2023 წელს დანერგილი ავატარებზე დაფუძნებული ვიდეოზარების ფუნქცია იყო.