სად აბანდებენ ინვესტორები კაპიტალს მომავალ წელს? ხელოვნური ინტელექტი, ხელოვნური ინტელექტი და კიდევ ერთხელ ხელოვნური ინტელექტი

TechCrunch Disrupt-ის კონფერენციაზე ინვესტორებმა ღიად დაადასტურეს, რომ მათი ინტერესის მთავარი საგანი ამჟამად მხოლოდ ერთი რამ არის: ხელოვნური ინტელექტი. ნინა აჩაჯიანმა (Index Ventures), ჯერი ჩენმა (Greylock) და პიტერ დენგმა (Felicis) ვენჩურული კაპიტალის სფეროში არსებულ უახლეს ტენდენციებზე ისაუბრეს და განიხილეს, თუ როგორ შეუძლიათ სტარტაპებს თავის დამკვიდრება სწრაფად მზარდ და გადატვირთულ ბაზარზე.

ინვესტორების თქმით, გარემო ელვისებური სისწრაფით იცვლება, კომპანიები კი უპრეცედენტო ზრდას განიცდიან. აჩაჯიანმა აღნიშნა, რომ ამ პირობებში ინვესტორები უდიდეს დროს უთმობენ უშუალოდ მეწარმეების შეფასებას — მათ აინტერესებთ, რამდენად მდგრადი და მოქნილი იქნება დამფუძნებელი იმ მომენტში, როდესაც ბაზარი რადიკალურ ტრანსფორმაციას დაიწყებს.

დღეს, როგორც არასდროს, დამფუძნებლებმა მაქსიმალურად უნდა გამოავლინონ საკუთარი ენთუზიაზმი, დარგობრივი ექსპერტიზა და შეინარჩუნონ გულწრფელობა პროდუქტის ბაზართან შესაბამისობის (Product-Market Fit) საკითხში. აჩაჯიანის განმარტებით, ვინაიდან მსხვილი საწარმოების მხრიდან AI ტექნოლოგიების მიმართ მოთხოვნა კოლოსალურია, ხშირად იქმნება პროდუქტის ბაზართან შესაბამისობის „ცრუ დადებითი“ შთაბეჭდილება. კომპანიამ შესაძლოა მიიღოს სოლიდური შემოსავალი, თუმცა მომხმარებელმა ვერ ნახოს რეალური ROI (ინვესტიციის უკუგება), რაც გრძელვადიან პერსპექტივაში პრობლემურია.

რა კრიტერიუმებით აფასებენ ვენჩურული ინვესტორები სტარტაპებს

ინვესტორებისთვის კიდევ ერთი გადამწყვეტი ფაქტორი ბაზრის ცვლილებებთან ერთად კურსის სწრაფად შეცვლის (pivot) უნარია. აჩაჯიანმა ხაზი გაუსვა, რომ სტარტაპების დიდი ნაწილი მარცხდება, ამიტომ მდგრადობა გადარჩენის მთავარი პირობაა. პიტერ დენგმა, რომელსაც OpenAI-ში მუშაობის გამოცდილება აქვს, დაამატა, რომ დამფუძნებლებმა უნდა იპოვონ მონაცემთა დამუშავების უნიკალური ციკლები (data flywheels). ეს დაეხმარება მათ გამოირჩეოდნენ იმ მრავალრიცხოვანი კონკურენტებისგან, რომლებიც ინვესტორებს თითქმის იდენტურ იდეებს სთავაზობენ.

დენგის აზრით, წარმატების გასაღები მონაცემთა მართვაშია: „თუ შეძლებთ პრობლემას ღრმად ჩასწვდეთ და კლიენტისთვის ისეთი საჭიროება გადაჭრათ, რომელსაც ის დამოუკიდებლად ვერ აგვარებს, სწორედ აქ იწყება მნიშვნელოვანი ნაწილი“. გარდა ამისა, დამფუძნებლებს უნდა ჰქონდეთ მკაფიო პასუხი კითხვაზე: რატომ არ გახდება მათი პროდუქტი უბრალოდ ერთ-ერთი დამატებითი ფუნქცია (feature) დიდ საბაზისო მოდელებში (foundational models)? მაშინაც კი, თუ დამფუძნებელმა ზუსტად არ იცის, მუშაობენ თუ არა მოდელების შემქმნელები მათ კონკურენტულ პროდუქტზე, მათ უნდა ჰქონდეთ ჰიპოთეზა ბიზნესის დაცულობის შესახებ.

AI-ს პერსპექტიული მიმართულებები და მომავალი

ჯერი ჩენის დაკვირვებით, ამჟამად ხელოვნური ინტელექტის სფეროში სამი ძირითადი მიმართულება მუშაობს ეფექტურად:

• ჩატ-აპლიკაციები;
• კოდირების დამხმარე პროგრამები;
• AI მომხმარებელთა მომსახურების სფეროში.

თუმცა, მოსალოდნელია კიდევ უფრო მასშტაბური ცვლილებები ყველა სექტორში. პიტერ დენგი დიდ პოტენციალს ხედავს AI-ზე დაფუძნებულ სავაჭრო პლატფორმებში (marketplaces). ნინა აჩაჯიანი მიიჩნევს, რომ ახლა რობოტიკის განვითარების საუკეთესო მომენტია, ხოლო ჯერი ჩენი ინტერესით აკვირდება, თუ როგორ იმოქმედებს ხელოვნური ინტელექტი SaaS (პროგრამული უზრუნველყოფა, როგორც სერვისი) ბაზარზე და იმ სექტორებზე, რომლებსაც ტექნოლოგიური ტრანსფორმაცია ჯერ არ შეხებია.

რაც შეეხება სფეროებს, რომლებიც პირდაპირ არ უკავშირდება AI-ს, მაგრამ მაინც მიმზიდველია ინვესტორებისთვის, აჩაჯიანმა გამოყო ე.წ. „ფურცლისა და კალმის“ პროცესების გაციფრულება. არსებობს მრავალი ინდუსტრია, სადაც სამუშაო პროცესები კვლავაც მექანიკურად სრულდება. თუმცა, ინვესტორები აღიარებენ, რომ ასეთი სფეროებიც კი საუკეთესო შესაძლებლობაა ხელოვნური ინტელექტის მეშვეობით ავტომატიზაციის დასანერგად.