სენატორი ჰოული Meta-ს AI ჩეთბოტების სკანდალს იძიებს - ბავშვებთან ფლირტის ფაქტები გამოვლინდა

სენატორი ჯოშ ჰოული აცხადებს, რომ Meta-ს ხელოვნური ინტელექტის პროდუქტების გამოძიებას იწყებს, მას შემდეგ რაც გაჟონილმა დოკუმენტებმა აჩვენა, რომ კომპანიის ჩეთბოტებს ბავშვებთან „რომანტიული" და „სენსუალური" საუბრების წარმოების უფლება ჰქონდათ.

სენატის იურიდიული ქვეკომიტეტის თავმჯდომარემ სოციალურ ქსელში განაცხადა: „არის რამე - რამე მაინც - რასაც ტექნოლოგიური გიგანტები ფულის გამო არ გააკეთებენ?" ჰოული აპირებს გამოიძიოს, აზიანებს თუ არა Meta-ს ტექნოლოგიები ბავშვებს და შეცდომაში შეიყვანა თუ არა კომპანიამ საზოგადოება უსაფრთხოების ზომებთან დაკავშირებით.

Reuters-ის მიერ გამოქვეყნებული მასალების თანახმად, კომპანიის შიდა სახელმძღვანელო „GenAI: Content Risk Standards" უშვებდა ისეთ დიალოგებს, სადაც ჩეთბოტი 8 წლის ბავშვს ეუბნებოდა: „შენი სხეულის ყოველი გოჯი შედევრია - განძი, რომელსაც ღრმად ვაფასებ".

Meta-ს წარმომადგენელმა განაცხადა, რომ მსგავსი მაგალითები ეწინააღმდეგება კომპანიის პოლიტიკას და უკვე ამოღებულია სისტემიდან. თუმცა, სენატორი ჰოული მარკ ცუკერბერგისადმი მიწერილ წერილში აღნიშნავს, რომ „მიუღებელია ასეთი პოლიტიკის არსებობა თავიდანვე".

სენატორმა Meta-ს მოსთხოვა წარმოადგინოს სახელმძღვანელოს ყველა ვერსია, პროდუქტების სია, რომლებიც ამ სტანდარტებს იყენებდნენ, უსაფრთხოების ანგარიშები და იმ პირების ვინაობა, ვინც პოლიტიკის ცვლილებაზე იყო პასუხისმგებელი. კომპანიას ინფორმაციის წარდგენისთვის 19 სექტემბრამდე მისცეს ვადა.

გამოძიებას მხარი დაუჭირა სენატორმა მარშა ბლექბერნმაც, რომელმაც განაცხადა: „ბავშვების ონლაინ დაცვის საკითხში Meta-მ სრული კრახი განიცადა. უარესი ისაა, რომ კომპანია თვალს ხუჭავს იმაზე, თუ რა დამანგრეველ შედეგებს იწვევს მათი პლატფორმების დიზაინი".