Slash-მა, რომელიც თინეიჯერებმა დააარსეს, $100 მილიონი მოიზიდა და $1.4-მილიარდიანი შეფასება მიიღო

ფინტექ კომპანია Slash Financial-მა, რომელიც ბიზნეს საბანკო ანგარიშებს, კორპორატიულ საკრედიტო ბარათებს, ფულად გზავნილებსა და კრიპტო სერვისებს სთავაზობს მომხმარებლებს, C სერიის რაუნდში $100 მილიონი მოიზიდა. კომპანიის განცხადებით, ამ ინვესტიციის შედეგად მათი საბაზრო ღირებულება $1.4 მილიარდად შეფასდა.
საინვესტიციო რაუნდს ფინტექზე ორიენტირებული წამყვანი ფონდები — Ribbit Capital, Khosla და Goodwater Capital ხელმძღვანელობდნენ. პროცესში ასევე მონაწილეობდნენ არსებული ინვესტორები: NEA და Y Combinator.
Slash დაახლოებით ხუთი წლის წინ ვიქტორ კარდენასმა (CEO) და კევინ ბაიმ (CTO) დააარსეს. Bloomberg-ის ინფორმაციით, დამფუძნებლები მაშინ 19 წლისანი იყვნენ, დღეს კი 24 წლისები არიან. მათ კოლეჯში სწავლას თავი დაანებეს, რათა შეექმნათ ფინტექ კომპანია, რომელიც თავდაპირველად ბოტასების (sneakers) გადამყიდველებზე იყო ფოკუსირებული.
სტარტაპის განვითარების გზაზე მნიშვნელოვანი ცვლილებები მოხდა. მას შემდეგ, რაც მათმა მთავარმა კლიენტმა, ბრენდმა Yeezy-მ, სერიოზული პრობლემები შეექმნა მისი დამფუძნებლის, კანიე უესტის ანტისემიტური განცხადებების გამო, Slash-მა სტრატეგია შეცვალა და რამდენიმე სხვადასხვა მიმართულებაზე გადაერთო.
ამჟამად სტარტაპი მრავალპროფილურია და კონკრეტულ ინდუსტრიაზე აღარ არის ორიენტირებული. კარდენასის ბლოგპოსტის თანახმად, კომპანიის წლიური შემოსავალი $300 მილიონს აღწევს, ბიზნესი მომგებიანია და 5,000-მდე კორპორატიულ კლიენტს ემსახურება.
მიუხედავად ასეთი შთამბეჭდავი ზრდისა, Slash-ს ბაზარზე ძლიერი კონკურენტები ჰყავს. მათ შორისაა Ramp, რომლის შეფასებაც $32 მილიარდს შეადგენს, და Brex, რომელიც ცოტა ხნის წინ Capital One-მა შეიძინა.