Slate Auto-მ ხელმისაწვდომი ელექტრომობილის გამოშვებამდე რამდენიმე თვით ადრე აღმასრულებელი დირექტორი შეცვალა

Slate Auto-მ, ელექტრომობილების სტარტაპმა, რომელსაც ჯეფ ბეზოსი უჭერს მხარს, ხელმისაწვდომი ელექტრო პიკაპის ბაზარზე გამოტანამდე რამდენიმე თვით ადრე აღმასრულებელი დირექტორი შეცვალა. კომპანიის ახალი ხელმძღვანელი Amazon Marketplace-ის ყოფილი ვიცე-პრეზიდენტი, პიტერ ფარისი გახდა. მან მუშაობა ორშაბათს დაიწყო, რაც TechCrunch-ს Slate-ის წარმომადგენელმა, ჯეფ იაბლანსკიმ დაუდასტურა.ფარისი ბოლო პერიოდში McKinsey-სა და Bessemer Venture Partners-ში მრჩევლის პოზიციაზე მუშაობდა. Newsweek-ის ინფორმაციით, მან Bessemer-ი სწორედ Slate Auto-ში გადასვლის გამო დატოვა. რაც შეეხება კომპანიის პირველ აღმასრულებელ დირექტორს, Chrysler-ის ვეტერან კრისტინ ბარმანს, ის ამჟამად სატრანსპორტო საშუალებების მიმართულების პრეზიდენტის (President of Vehicles) პოზიციას დაიკავებს. ბარმანი Slate-ის პირველი თანამშრომელი იყო.კომპანია თავდაპირველად საიდუმლო პროექტის სახით, re:Car-ის სახელით არსებობდა მასაჩუსეტსში ბაზირებულ საწარმოო ინკუბატორში, სახელწოდებით re:Build Manufacturing. ბარმანი გამორჩეული ფიგურა იყო არა მხოლოდ იმიტომ, რომ ის აშშ-ის ავტომწარმოებელთა შორის ერთ-ერთი იმ ორ ქალ აღმასრულებელ დირექტორს შორის იყო, არამედ იმიტომაც, რომ 2025 წლის აპრილში საჯარო სივრცეში გამოჩენის შემდეგ, ის კომპანიის სახედ იქცა.ბარმანი მონაწილეობდა Slate-ის თითქმის ყველა სარეკლამო ვიდეოში, მათ შორის გასულ თვეში გამოქვეყნებულ რგოლში, სადაც მან აღნიშნა, რომ კომპანია საბაზისო ელექტრო პიკაპის ფასს ივნისში გაასაჯაროებდა. იაბლანსკის განცხადებით, ახალ პოზიციაზე ბარმანი ყველაფერს გააკეთებს იმისათვის, რომ ავტომობილის წარმოება დათქმულ ვადებში და ბიუჯეტის ფარგლებში განხორციელდეს.სტარტაპმა ბეზოსისა და სხვა მდიდარი ინვესტორებისგან დაახლოებით 700 მილიონი დოლარი მოიზიდა. თავდაპირველად კომპანია აცხადებდა, რომ ელექტრო პიკაპის ფასი 20,000 დოლარზე ნაკლები იქნებოდა, თუმცა მას შემდეგ, რაც კონგრესმა და ტრამპის ადმინისტრაციამ ფედერალური საგადასახადო შეღავათები გააუქმეს, სამიზნე ფასმა 20,000 დოლარის შუა ნიშნულამდე აიწია. მყიდველებს შეეძლებათ ავტომობილის სხვადასხვაგვარი მოდიფიკაცია, მათ შორის მისი SUV-ად გადაკეთებაც, რაც დამატებით ხარჯებთან იქნება დაკავშირებული.ფარისმა აღმასრულებელი დირექტორის პოსტი იმ დროს დაიკავა, როდესაც Slate ემზადება 160,000-მდე წინასწარი შეკვეთის რეალურ შეკვეთებად გარდაქმნის პროცესისთვის. „პიტერის გამოცდილება Amazon Marketplace-ის მშენებლობის პროცესში ჩვენთვის კრიტიკულად მნიშვნელოვანია“, — აღნიშნა იაბლანსკიმ.კომპანიის განვითარების ასეთ ადრეულ ეტაპზე ხელმძღვანელობის ცვლილება შესაძლოა მოულოდნელი იყოს, თუმცა გასაკვირი არ არის, რომ არჩევანი Amazon-ის ყოფილ მაღალჩინოსანზე შეჩერდა. ბეზოსის გარდა, სტარტაპის დაფინანსებაში Amazon-ის კიდევ ერთი ყოფილი ხელმძღვანელი, დიეგო პიაჩენტინიც მონაწილეობდა. ბეზოსის საოჯახო ოფისის ხელმძღვანელი კი კომპანიის საბჭოს წევრია. გარდა ამისა, Slate-ის ერთ-ერთი დამფუძნებელი ჯეფ ვილკეა, რომელიც წარსულში Amazon-ის სამომხმარებლო მიმართულების აღმასრულებელი დირექტორი იყო. კომპანიის მობილობის, დიზაინის (UX/UI), ელექტრონული კომერციის, გაყიდვებისა და HR დეპარტამენტების ხელმძღვანელებიც Amazon-ის ყოფილი თანამშრომლები არიან.