SpaceX-ის აქციების ფასი 30%-ით გაიზარდა: კომპანია აშშ-ის ექვს უმსხვილეს კორპორაციას შორის მოხვდა

SpaceX-მა საჯარო კომპანიის სტატუსით მუშაობის პირველივე დღე შთამბეჭდავი ნახტომით დაიწყო. Nasdaq-ის ბირჟაზე ვაჭრობის დაწყებისთანავე, აქციების ფასი 150 დოლარამდე გაიზარდა, რაც დაახლოებით 11%-ით აღემატება ხუთშაბათს დაფიქსირებულ საწყის საჯარო შეთავაზების (IPO) ფასს — 135 დოლარს.შუადღის ვაჭრობისას აქციის ღირებულებამ 176 დოლარს მიაღწია, რამაც კომპანიის საბაზრო კაპიტალიზაცია თითქმის 2.3 ტრილიონ დოლარამდე გაზარდა. ამ მაჩვენებლით SpaceX აშშ-ის ექვს ყველაზე ძვირადღირებულ საჯარო კომპანიას შორის დამკვიდრდა.SpaceX-ის აქციებზე მაღალი მოთხოვნა ნაწილობრივ განპირობებულია ბაზარზე არსებული აქციების მცირე რაოდენობით (float) — საჯარო ვაჭრობისთვის მხოლოდ 4%-ია ხელმისაწვდომი, დანარჩენ წილს კი ადრეული ინვესტორები და თანამშრომლები ფლობენ. გარდა ამისა, კომპანიამ წარმატებით მიაღწია რამდენიმე ინდექსის (მაგალითად, Nasdaq 100) წესების ცვლილებას. SpaceX ამ ინდექსებში რამდენიმე დღეში გაწევრიანდება, რაც კიდევ უფრო გაზრდის მოთხოვნას აქციებზე, სანამ სხვა მსხვილი ინსტიტუციები და ფონდები მათ ავტომატურ შესყიდვას დაიწყებენ.პლატფორმა Robinhood-ის განცხადებით, პარასკევს, SpaceX-ის ისტორიული დებიუტიდან რამდენიმე საათში, ვაჭრობის მოცულობამ რეკორდულ ნიშნულს მიაღწია. ეს მოვლენა ვენჩურული კაპიტალის ისტორიაში ერთ-ერთ ყველაზე დიდ ფინანსურ წარმატებად ფასდება.Founders Fund-ის შემოსავალი, რომელმაც კომპანიაში 600 მილიონი დოლარის ინვესტიცია განახორციელა და 3%-იან წილს ფლობს, IPO-ს ფასის მიხედვით 50 მილიარდ დოლარზე მეტად არის შეფასებული. ამავდროულად, Andreessen Horowitz-ის წილი 10 მილიარდ დოლარზე მეტს შეადგენს, ხოლო Sequoia-სი — 20 მილიარდ დოლარზე მეტს.აქციების 150-დოლარიანმა ნიშნულმა კომპანიის დამფუძნებელი, ილონ მასკი, მსოფლიოს პირველ ტრილიონერად აქცია. The New York Times-ის ინფორმაციით, SpaceX-ის დაახლოებით 4,400 ამჟამინდელი და ყოფილი თანამშრომელი მილიონერი გახდება, ხოლო 400-მდე ადამიანი — მულტიმილიონერი.