Spotify-ს დამფუძნებლის სხეულის სკანირების სტარტაპი Neko Health ამერიკულ ბაზარზე ფართოვდება

Neko Health ამჟამად მსოფლიოში სხეულის სკანირების ერთ-ერთ ყველაზე პოპულარულ სტარტაპად მიიჩნევა. TechCrunch-ი Preface Ventures-ის წარმომადგენელს, ფარუკ აბასის ესაუბრა, რომელმაც კომპანიაში ინვესტიცია განახორციელა. ის იმედოვნებს, რომ Neko Health პრევენციული მედიცინის მომავალი გახდება, განსაკუთრებით ისეთ ქვეყანაში, როგორიც აშშ-ია, სადაც სამედიცინო სისტემა მრავალი პრობლემითაა ცნობილი.

აბასი აღნიშნავს, რომ ამერიკის შეერთებულ შტატებში პრევენციული მოვლის სერვისების გამოყენების მაჩვენებელი დაბალია, რადგან მოსახლეობას მაღალი ხარჯების ეშინია. ამჟამად Neko Health-ის ერთსაათიანი სკანირება 500 დოლარი ღირს. მიუხედავად იმისა, რომ დაზღვევა ამ ხარჯს არ ფარავს, ის შესაძლოა კვალიფიცირდეს როგორც მისაღები ხარჯი მათთვის, ვისაც ჯანმრთელობის დაზოგვის ანგარიშები (Health Savings Accounts - HSA) აქვს.

„მიმაჩნია, რომ პრევენციული მოვლა და ჯანდაცვა იაფი და ხელმისაწვდომი უნდა იყოს“, — აცხადებს აბასი. მისი თქმით, Neko Health-ის მიზანი სწორედ ამ პრობლემების მოგვარებაა და კომპანია ამჟამად აშშ-ის მასშტაბით გაფართოებას გეგმავს. თავად ინვესტორმა სკანირება უკვე ორჯერ ჩაიტარა და შედეგით კმაყოფილია. მისი აზრით, Neko-ს კლინიკები ყველგან უნდა არსებობდეს.

ტექნოლოგიური პროგრესი და ხელოვნური ინტელექტი

პროდუქტმა პირველი გამოცდის შემდეგ მნიშვნელოვანი განვითარება განიცადა. აბასის თქმით, პირველი თაობის სკანირებისას სისხლის ტესტი მხოლოდ 15 ბიომარკერს მოიცავდა, ამჯერად კი მათი რაოდენობა 55-მდე გაიზარდა. Neko ასევე იყენებს მოწინავე კომპიუტერულ ხედვას (advanced computer vision) თავისი სკანირებისთვის, რასაც აბასი ხელოვნური ინტელექტის მიერ სამედიცინო სექტორის გაუმჯობესების კიდევ ერთ მაგალითად მიიჩნევს.

ინვესტორი ამტკიცებს, რომ Neko Health არ არის მხოლოდ მორიგი მოდური ტენდენცია ველნესის სფეროში. ეს არის პლატფორმა, რომელიც ადამიანებს აძლევს „ქმედითუნარიან ინფორმაციას (actionable insights) მათი ცხოვრების გასაუმჯობესებლად“. თუმცა, კომპანიას აშშ-ში ჯერ კიდევ გრძელი გზა აქვს გასავლელი, განსაკუთრებით მასშტაბირებისა და მარეგულირებელი ორგანოებისგან ნებართვების მიღების კუთხით.

სამომავლო მოლოდინები

მიუხედავად სირთულეებისა, აბასი ოპტიმისტურად არის განწყობილი. ის იმედოვნებს, რომ ვენჩურული კაპიტალი უფრო მეტად მიიმართება სწორი კომპანიებისკენ და მიიჩნევს, რომ სისტემაში არაფერია ისეთი გაფუჭებული, რისი გამოსწორებაც შეუძლებელია.