Tesla-ს აქციონერები ილონ მასკის AI სტარტაპში ინვესტირების საკითხს განიხილავენ

Tesla-ს აქციონერები მალე კენჭს უყრიან კომპანიის მიერ ილონ მასკის ხელოვნური ინტელექტის სტარტაპ xAI-ში ინვესტირების საკითხს. ეს წინადადება მიზნად ისახავს Tesla-ს პოზიციების გაძლიერებას AI-ის, რობოტიკისა და ენერგეტიკის სფეროებში.

წინადადება წამოაყენა ფლორიდის შტატის აქციონერმა სტივენ ჰოუკმა, რომელსაც კომპანიაში $2,000-ის ღირებულების აქციები აქვს. მისი განცხადებით, Grok-ის ინტეგრაცია Tesla-ს ავტომობილებში უკვე აჩვენებს xAI-სთან თანამშრომლობის რეალურ სარგებელს.

თუ Tesla გადაწყვეტს xAI-ში ინვესტირებას, ის მასკის მეორე კომპანია იქნება, რომელიც ამ ნაბიჯს გადადგამს. SpaceX-მა უკვე დააანონსა $2 მილიარდის ინვესტიცია xAI-ში $5 მილიარდიანი კაპიტალის მოზიდვის ფარგლებში.

ზოგიერთი აქციონერი მიიჩნევს, რომ xAI Tesla-ს კონკურენტია, რადგან მასკი ხშირად აღნიშნავს, რომ მისი ელექტრომობილების კომპანია ასევე AI კომპანიაა. გასულ წელს აქციონერებმა უჩივლეს მასკს კონკურენტი AI ფირმის დაფუძნების გამო, თუმცა საქმე შეწყდა.

აქციონერთა კენჭისყრაზე ასევე განიხილება მასკისთვის ახალი 10-წლიანი ანაზღაურების პაკეტი, რომელმაც შესაძლოა მას კომპანიაზე 25%-ზე მეტი კონტროლი მისცეს. ეს გეგმა მასკის კომპენსაციას უკავშირებს ამბიციურ მიზნებს, მათ შორის Tesla-ს საბაზრო ღირებულების $1 ტრილიონიდან $8 ტრილიონამდე გაზრდას.

Deewater Asset Management-ის მმართველი პარტნიორის, ჯინ მუნსტერის თქმით, $8 ტრილიონის საბაზრო კაპიტალიზაციის მისაღწევად Tesla-ს xAI დასჭირდება. მისი აზრით, ამ მიზნის მიღწევა შესაძლებელია ჰუმანოიდი რობოტების ფართო გავრცელებით.

აქციონერთა კენჭისყრა დაგეგმილია 6 ნოემბერს, Tesla-ს ტეხასის გიგაფაბრიკაში და პირდაპირ ეთერში გადაიცემა.