Uber და Pony.ai ევროპაში 2000 რობოტაქსის გაშვებას გეგმავენ

Uber და ჩინური ავტონომიური ავტომობილების მწარმოებელი კომპანია Pony.ai პარტნიორობას აფართოებენ. ამ თანამშრომლობის ფარგლებში, მხარეები ევროპის ოთხ ქალაქში 2000 რობოტაქსის გაშვებას გეგმავენ. აღნიშნული გადაწყვეტილება ხაზს უსვამს ორივე კომპანიის მზარდ ამბიციას, დაიკავონ მნიშვნელოვანი წილი რობოტაქსების განვითარებად ინდუსტრიაში.

ბოლო რამდენიმე წლის განმავლობაში Uber-მა 30-ზე მეტ ავტონომიური ტრანსპორტის მწარმოებელ კომპანიასთან დაამყარა პარტნიორული ურთიერთობა, რომელთა შორის ერთ-ერთი Pony.ai-ია. თავის მხრივ, Pony.ai უკვე ოპერირებს ჩინეთის ოთხ ქალაქში და აქტიურად თანამშრომლობს ადგილობრივ სატრანსპორტო უწყებებთან, რათა საკუთარი ტექნოლოგიები ევროპისა და ახლო აღმოსავლეთის ქვეყნებში, მათ შორის კატარში, დანერგოს.

მიუხედავად მასშტაბური გეგმებისა, Uber-სა და Pony.ai-ს ჯერჯერობით არ დაუკონკრეტებიათ რობოტაქსების გაშვების ზუსტი ვადები და არც ის ქალაქები დაუსახელებიათ, სადაც სერვისი პირველად ამოქმედდება. კომპანიების განცხადებით, დეტალები ეტაპობრივად გახდება ცნობილი. გაფართოებული პარტნიორობის ფარგლებში უფრო ნათლად ჩამოყალიბდა თანამშრომლობის პირობები, რაც Pony.ai-ს „ერთობლივი განლაგების მოდელს“ (joint-deployment model) კომერციული მასშტაბირებისკენ გზას უხსნის.

თანამშრომლობის მოდელი და ოპერაციული დეტალები

შეთანხმების მიხედვით, გუანჯოუში ბაზირებული კომპანია Pony.ai უზრუნველყოფს ავტონომიური მართვის ტექნოლოგიას, ხოლო Uber საკუთარ მძლავრ პლატფორმას დაუთმობს მგზავრობის დასაჯავშნად. ავტოპარკის მართვაზე, რაც მოიცავს ტექნიკურ მომსახურებას, დასუფთავებასა და დამუხტვას, პასუხისმგებლობა შესაძლოა ადგილობრივ პროვაიდერებს დაეკისროთ. თავად რობოტაქსების ავტოპარკის მფლობელები კი, კონკრეტული ბაზრის მიხედვით, სხვადასხვა პარტნიორები იქნებიან.

Uber-ისა და Pony.ai-ს თანამშრომლობა პირველად 2025 წლის მაისში დაიწყო და თავდაპირველად ახლო აღმოსავლეთის რეგიონზე იყო ფოკუსირებული. მიმდინარე წლის დასაწყისში კომპანიებმა ყურადღება ევროპისკენ მიმართეს და ხორვატიის დედაქალაქ ზაგრებში, ადგილობრივ კომპანია Verne-სთან ერთად, კომერციული რობოტაქსების სერვისის გაშვების გეგმები დააანონსეს.