Waymo-ს რობოტაქსი სანტა-მონიკაში, სკოლასთან ახლოს, ბავშვს დაეჯახა

23 იანვარს, სანტა-მონიკაში, დაწყებით სკოლასთან ახლოს, Waymo-ს რობოტაქსი ბავშვს დაეჯახა. კომპანიის ინფორმაციით, ბავშვმა, რომლის ასაკი და ვინაობა ამ ეტაპზე არ საჯაროვდება, მსუბუქი დაზიანებები მიიღო. მომხდართან დაკავშირებით გზატკეცილების მოძრაობის უსაფრთხოების ეროვნულმა ადმინისტრაციამ (NHTSA) გამოძიება უკვე დაიწყო.

Waymo-ს განცხადებით, კომპანია სრულად თანამშრომლობს საგამოძიებო უწყებებთან მთელი პროცესის განმავლობაში. გავრცელებული ინფორმაციით, რობოტაქსი ბავშვს საათში 6 მილის (დაახლოებით 10 კმ/სთ) სიჩქარით დაეჯახა მას შემდეგ, რაც მანქანამ მკვეთრი დამუხრუჭება დაიწყო საათში 17 მილის სიჩქარიდან.

კომპანიის ბლოგპოსტში აღნიშნულია, რომ მცირეწლოვანი ქვეითი გზაზე მოულოდნელად, მაღალი SUV-ის უკნიდან გადავიდა და პირდაპირ ავტომობილის ტრაექტორიაზე აღმოჩნდა. Waymo-ს მტკიცებით, სისტემამ ქვეითი იმავე წამს დააფიქსირა, როგორც კი ის გაჩერებული ავტომობილის უკნიდან გამოჩნდა.

შემთხვევის შემდეგ ქვეითი მაშინვე წამოდგა და ტროტუარისკენ გადავიდა, რის შემდეგაც კომპანიამ 911-ში დარეკა. რობოტაქსი ადგილზე დარჩა, მოგვიანებით კი გზის პირას გადავიდა და იქამდე არ დაუტოვებია ტერიტორია, სანამ სამართალდამცავებმა ამის ნებართვა არ მისცეს.

მიმდინარე გამოძიებები და კონტექსტი

ეს ინციდენტი Waymo-სთვის კიდევ ერთი გამოწვევაა, რადგან კომპანიის წინააღმდეგ უკვე მიმდინარეობს ორი სხვა გამოძიება, რომლებიც სასკოლო ავტობუსებისთვის გზის უკანონოდ არდათმობას ეხება. NHTSA-მ პირველი მოკვლევა ოქტომბერში დაიწყო, მას შემდეგ რაც მსგავსი შემთხვევა ჯორჯიის შტატში, ატლანტაში დაფიქსირდა. გასულ კვირას კი ტრანსპორტის უსაფრთხოების ეროვნულმა საბჭომ საკუთარი გამოძიება დაიწყო ოსტინში (ტეხასის შტატი) მომხდარი დაახლოებით 20 მსგავსი ინციდენტის გამო.

NHTSA-ს მონაცემებით, სანტა-მონიკაში მომხდარი ავარია დაწყებითი სკოლიდან სულ რაღაც ორი კვარტლის დაშორებით, მოსწავლეების მიყვანის ჩვეულ საათებში მოხდა. საგზაო უსაფრთხოების მარეგულირებელი ორგანოს განცხადებით, ტერიტორიაზე იმყოფებოდნენ სხვა ბავშვები, მოძრაობის მომწესრიგებელი და რამდენიმე ორრიგად გაჩერებული ავტომობილი.

NHTSA-ს დეფექტების გამოძიების ოფისი ამჟამად სწავლობს, გამოიჩინა თუ არა Waymo-ს ავტონომიურმა სისტემამ სათანადო სიფრთხილე სკოლასთან სიახლოვის, მოსწავლეების სიმრავლისა და გზის სხვა მოწყვლადი მონაწილეების გათვალისწინებით.

თავის მხრივ, Waymo-მ ბლოგპოსტში აღნიშნა, რომ მათი მოდელის მიხედვით, ანალოგიურ სიტუაციაში სრულად კონცენტრირებული ადამიანი-მძღოლი ქვეითს დაახლოებით 14 მილი/საათში სიჩქარით დაეჯახებოდა. თუმცა, კომპანიას კონკრეტულად ამ ავარიის დეტალური ანალიზი ჯერ არ გამოუქვეყნებია.