Y Combinator-ის კურსდამთავრებული Skio 105 მილიონ დოლარად გაიყიდა: სტარტაპმა მხოლოდ 8 მილიონიანი ინვესტიცია მოიზიდა

Y Combinator-ის 2020 წლის კურსდამთავრებული სტარტაპი Skio, რომელიც კოლეჯიდან გამორიცხულმა კენან ფროსტმა დააფუძნა, კონკურენტმა კომპანია Recharge-მა შეიძინა. ორივე კომპანია ბრენდებისთვის სააბონენტო გადახდების მართვის პროდუქტებს ქმნის.მიუხედავად იმისა, რომ ოფიციალურ პრესრელიზში გარიგების ფინანსური დეტალები არ გახმაურებულა, ფროსტმა (რომელმაც მანამდე დატოვა კომპანია) სოციალურ ქსელებში — X-ზე, LinkedIn-სა და Instagram-ზე — დაწერა, რომ სტარტაპი 105 მილიონ დოლარად, ნაღდი ანგარიშსწორებით გაიყიდა. აღსანიშნავია, რომ კომპანიას ინვესტორებისგან მხოლოდ 8 მილიონი დოლარი ჰქონდა მოზიდული, რაც ნებისმიერი საზომით შთამბეჭდავი უკუგებაა.ფროსტის პოსტები Skio-ს ინვესტორებმა — Y Combinator-მა და ვენჩურული ფირმა Adjacent-ის დამფუძნებელმა, ნიკოლას ვიტენბორნმაც გააზიარეს. Skio-ს ამჟამინდელი აღმასრულებელი დირექტორის, ეიდან ტიბოდოს LinkedIn პოსტის თანახმად, ფროსტი კომპანიას ბოლო ორი წლის განმავლობაში აღარ მართავდა. ტიბოდომ, რომელიც თავდაპირველად საოპერაციო დირექტორის (COO) პოზიციაზე მივიდა, აღწერა რთული გზა, რომელიც მარკეტინგზე, რეკლამასა თუ გაყიდვების გუნდზე ყოველგვარი დანახარჯების გარეშე გაიარეს.ნაცვლად ამისა, რესურსები ექსკლუზიურად პროდუქტის განვითარებაზე იყო მიმართული. ტიბოდო და დამფუძნებელი ტექნიკური დირექტორი (CTO), ენდრიუ ჩენი, გაყიდვებთან დაკავშირებულ ყველა ზარს თავად პასუხობდნენ. ფროსტის პირადი ისტორია კიდევ უფრო დრამატულია: Instagram-ზე გამოქვეყნებულ პოსტში ის იხსენებს, რომ სტარტაპი მას შემდეგ დააფუძნა, რაც Pinterest-ში ინჟინრად მუშაობისას პანიკური შეტევა დაემართა და სამსახური დატოვა. სულ რაღაც ორ კვირაში კი მსოფლიოში COVID-ის პანდემია დაიწყო.ფროსტი Y Combinator-ში მოხვდა, თუმცა ერთ-ერთ პოსტში აღნიშნავს, რომ აქსელერაციის პერიოდში სრული კრახი განიცადა, სანამ საბოლოოდ სააბონენტო გადახდების იდეაზე არ გადაერთო (pivot). სამ წელიწადში მან კომპანიის წლიური განმეორებადი შემოსავალი (ARR) 10 მილიონ დოლარამდე გაზარდა და სტარტაპი მომგებიანი გახადა. მისი თქმით, მოგვიანებით გუნდმა ეს საწყისი წარმატება ნამდვილ კომპანიად აქცია.მისი YC მრჩეველი, გუსტაფ ალსტრომერი, X-ზე ადასტურებს გაყიდვის პირობებს. ალსტრომერმა აღწერა, თუ როგორ უჭირდა დამფუძნებელს აქსელერატორში ყოფნისას, თუმცა მას ფარ-ხმალი არასდროს დაუყრია. გაყიდვის მომენტისთვის კომპანიის წლიური განმეორებადი შემოსავალი (ARR) 32 მილიონ დოლარს შეადგენდა, ხოლო დამუშავებული გადახდების მოცულობამ 4 მილიარდ დოლარს მიაღწია. ამჟამად ფროსტი თავის ახალ სტარტაპზე, Icon-ზე მუშაობს, რომელიც AdMaker-ის მეშვეობით სარეკლამო კამპანიების გენერირებასა და მათ თვალყურის დევნებას სთავაზობს მომხმარებლებს.