აფრიკულმა თავდაცვითმა სტარტაპმა Terra Industries-მა ერთ თვეში დამატებით 22 მილიონი დოლარის ინვესტიცია მოიზიდა

ჯო ლონსდეილის 8VC-ის მიერ დაფინანსებული 11.75 მილიონი დოლარის რაუნდიდან სულ რაღაც ერთ თვეში, აფრიკულმა თავდაცვითმა ტექნოლოგიურმა კომპანიამ, Terra Industries-მა, დამატებით 22 მილიონი დოლარის მოზიდვის შესახებ გამოაცხადა. ამჯერად რაუნდს Lux Capital-ი ხელმძღვანელობდა.

Terra Industries 2024 წელს 22 წლის ნათან ნვაჩუკუმ და 24 წლის მაქსველ მადუკამ დააფუძნეს. კომპანიის მიზანია შექმნას ინფრასტრუქტურა და ავტონომიური სისტემები, რომლებიც აფრიკულ ქვეყნებს საფრთხეების მონიტორინგსა და მათზე რეაგირებაში დაეხმარება. ტერორიზმი აფრიკის ერთ-ერთ უდიდეს საფრთხედ რჩება, თუმცა უსაფრთხოების სადაზვერვო მონაცემების უმეტესობა, რომლებსაც კონტინენტის ქვეყნები ეყრდნობიან, რუსეთიდან, ჩინეთიდან ან დასავლეთიდან მოდის.

იანვარში კომპანიის აღმასრულებელმა დირექტორმა, ნვაჩუკუმ განაცხადა, რომ მისი მიზანია აფრიკის პირველი მსხვილი თავდაცვითი კონტრაქტორი კომპანიის (defense prime) შექმნა, რომელიც ავტონომიურ თავდაცვისა და სხვა სისტემებს ააგებს კრიტიკული ინფრასტრუქტურისა და რესურსების შეიარაღებული თავდასხმებისგან დასაცავად. იმ დროისთვის Terra-ს უკვე მოპოვებული ჰქონდა პირველი ფედერალური კონტრაქტი.

კომპანიას ჰყავს როგორც სამთავრობო, ისე კომერციული კლიენტები. ნვაჩუკუს თქმით, Terra-მ უკვე გამოიმუშავა 2.5 მილიონ დოლარზე მეტი კომერციული შემოსავალი და იცავს დაახლოებით 11 მილიარდი დოლარის ღირებულების აქტივებს. მისივე განმარტებით, დაფინანსების ეს დამატებითი რაუნდი „ძლიერი იმპულსის“ გამო ძალიან სწრაფად განხორციელდა.

რაუნდში მონაწილეობა მიიღეს სხვა ინვესტორებმაც, მათ შორის 8VC-მ, Nova Global-მა და Resilience17 Capital-მა, რომელიც Flutterwave-ის აღმასრულებელი დირექტორის, ოლუგბენგა აგბოლას მიერ არის დაფუძნებული. ნვაჩუკუმ აღნიშნა, რომ ინვესტორებმა გარიგებებისა და პარტნიორობების კუთხით „მოსალოდნელზე სწრაფი პროგრესი“ დაინახეს, რამაც მათი მხრიდან ვალდებულებების გაზრდის აუცილებლობა შექმნა. რაუნდი ორ კვირაზე ნაკლებ დროში დაიხურა, რის შედეგადაც კომპანიის მთლიანმა დაფინანსებამ 34 მილიონ დოლარს მიაღწია.

დაფინანსების ასეთი ზრდა გასაკვირი არ არის, რადგან თავდაცვის სფეროში მომუშავე კომპანიის მშენებლობა დიდ ხარჯებთანაა დაკავშირებული. შედარებისთვის, Anduril-მა 2.5 მილიარდ დოლარზე მეტი ინვესტიცია მოიზიდა, ShieldAI-მ — დაახლოებით 1 მილიარდი დოლარი, დრონების მწარმოებელმა Skydio-მ — 740 მილიონი დოლარი, ხოლო საზღვაო ავტონომიური ხომალდების მწარმოებელმა Saronic-მა — დაახლოებით 830 მილიონი დოლარი.

იანვრის შემდეგ, ნვაჩუკუს თქმით, კომპანიამ დაიწყო გაფართოება აფრიკის სხვა ქვეყნებშიც (Terra-ს სათავო ოფისი ნიგერიაში მდებარეობს), რომელთა სახელებიც ჯერჯერობით არ საჯაროვდება. კომპანიამ ასევე გააფორმა ახალი სამთავრობო და კომერციული კონტრაქტები, მათ შორის AIC Steel-თან. AIC Steel-თან პარტნიორობა საშუალებას აძლევს Terra-ს, საუდის არაბეთში შექმნას ერთობლივი საწარმო, რომელიც ორიენტირებული იქნება სათვალთვალო ინფრასტრუქტურისა და უსაფრთხოების სისტემების მშენებლობაზე.

„ეს არის ჩვენი პირველი მნიშვნელოვანი საწარმოო გაფართოება აფრიკის ფარგლებს გარეთ. პრიორიტეტია მუშაობა იმ ქვეყნებთან, სადაც ტერორიზმი და ინფრასტრუქტურის უსაფრთხოება ეროვნული მნიშვნელობის პრობლემას წარმოადგენს“

ნვაჩუკუმ განსაკუთრებით გამოყო სუბსაჰარული აფრიკისა და საჰელის რეგიონები. მან აღნიშნა, რომ ბევრმა ამ ქვეყანამ ბოლო ათწლეულების განმავლობაში არა მხოლოდ მილიარდობით დოლარის ინფრასტრუქტურა, არამედ ათასობით ადამიანის სიცოცხლეც დაკარგა. „ჩვენი ფოკუსი მიმართულია იმ მსხვილ ეკონომიკებზე, სადაც ინფრასტრუქტურის დაცვის გადაუდებელი საჭიროებაა და სადაც ჩვენს გადაწყვეტილებებს რეალური ცვლილებების მოტანა შეუძლია. სწორედ ასე ვგეგმავთ გაფართოებას“.