Daytona Platforms-მა პარასკევს გამოაცხადა, რომ B სერიის დაფინანსების რაუნდში 60 მილიონი დოლარი მოიზიდა, რის შედეგადაც კომპანიის საბაზრო შეფასებამ 1 მილიარდ დოლარს მიაღწია. აღნიშნულ რაუნდს FirstMark Growth ხელმძღვანელობდა. კომპანიის ინფორმაციით, ამ დროისთვის მათ მიერ მოზიდული კაპიტალის საერთო რაოდენობა 91 მილიონ დოლარს შეადგენს.
ნიუ-იორკში დაფუძნებულმა სტარტაპმა არა მხოლოდ FirstMark-ის ყურადღება მიიპყრო (რომელმაც თებერვალში კომპანიის 24 მილიონიანი A სერიის რაუნდიც დააფინანსა), არამედ ამ უკანასკნელ რაუნდში არაერთი გავლენიანი „ანგელოზი ინვესტორიც“ დააინტერესა. Daytona-ს განცხადებით, ინვესტორთა შორის არიან პატრიკ კოლისონი (Stripe), ტობი ლუტკე (Shopify), არავინდ სრინივასი (Perplexity), ერიკ იუანი (Zoom), ოლივიე პომელი (Datadog), ადამ დ’ანჯელო (Quora-ს დამფუძნებელი და OpenAI-ის საბჭოს წევრი) და ბრენდან ფუდი (Mercor). დაფინანსებაში ასევე მონაწილეობდნენ Qualcomm Ventures, Samsung Next და Okta Ventures.
სამი წლის წინ დაარსებული Daytona ქმნის ღრუბლოვან პლატფორმას, რომელიც სპეციალურად ხანგრძლივად მომუშავე აგენტებისთვისაა (long-running agents) განკუთვნილი. სტარტაპის მტკიცებით, ამ ტიპის აგენტებს სრულიად განსხვავებული ინფრასტრუქტურული საჭიროებები აქვთ, ვიდრე წინა თაობის პროგრამულ უზრუნველყოფას.
„აგენტები არ მუშაობენ ისე, როგორც დღევანდელი ღრუბლოვანი სერვისები, რომლებიც ხანგრძლივი სერვისებისთვის (long-lived services) შეიქმნა. ისინი აგენერირებენ ათასობით მოკლე, მდგომარეობაზე დაფუძნებულ (stateful) დავალებას, რომელთა წინასწარ დაგეგმვა შეუძლებელია. მათ სჭირდებათ ღრუბელი, რომელიც სწორედ ამისთვისაა აშენებული“, — აღნიშნა დამფუძნებელმა ივან ბურაზინმა ახალი რაუნდის შესახებ გამოქვეყნებულ ბლოგპოსტში.
ბურაზინის განმარტებით, Daytona-ს ღრუბლოვანი სისტემა თითოეულ აგენტს საკუთარ კომპიუტერს აძლევს. ერთიან პლატფორმაზე აგენტებს წვდომა აქვთ Linux-ის, Windows-ის, macOS-ისა და GPU-ების იზოლირებულ (sandboxed) ვერსიებზე, ისევე როგორც სხვა მნიშვნელოვან სერვისებზე.
