აქციონერები Uber-ის დირექტორთა საბჭოს სექსუალური ძალადობისა და უსაფრთხოების ნორმების დარღვევის გამო უჩივიან

დეტროიტის საპენსიო ფონდის მიერ ინიცირებული სასამართლო სარჩელი Uber-ის ხელმძღვანელობასა და მის დირექტორთა საბჭოს უსაფრთხოებისა და რეგულაციების დაცვის ნაცვლად, მოგების პრიორიტეტულად ქცევაში ადანაშაულებს. მოსარჩელეთა მტკიცებით, მსგავსმა გადაწყვეტილებებმა კომპანია და მისი აქციონერები სერიოზული რისკების წინაშე დააყენა.

ორშაბათს, სან-ფრანცისკოში, კალიფორნიის ჩრდილოეთ ოლქის ფედერალურ სასამართლოში შეტანილ სარჩელში აღნიშნულია, რომ Uber რეგულაციების „სერიული დამრღვევია“, რომელიც შეგნებულად უგულებელყოფდა დადგენილ ნორმებს. საჩივრის თანახმად, შესაბამისობის კულტურის ნაკლებობამ გამოიწვია ათასობით სასამართლო დავა მსხვერპლთა მხრიდან, რომლებიც მძღოლების მხრიდან სექსუალურ ძალადობასა და შევიწროებაზე მიუთითებენ.

სარჩელში, სადაც მოპასუხედ აღმასრულებელი დირექტორი დარა ხოსროშაჰიც არის დასახელებული, ნათქვამია, რომ საბჭოს წევრებმა დაარღვიეს თავიანთი ფიდუციური ვალდებულება კომპანიისა და აქციონერების წინაშე. მათ უგულებელყვეს არაერთი გაფრთხილება უსაფრთხოებისა და რეგულაციების დაცვის მექანიზმების ხარვეზების შესახებ.

მოსარჩელე მხარე მოითხოვს, რომ Uber-ის ლიდერებმა კომპანიას მიყენებული ზიანი პირადი სახსრებით აუნაზღაურონ, დააბრუნონ მიღებული კომპენსაციების ნაწილი და დანერგონ ზედამხედველობისა და კონტროლის უფრო მკაცრი ზომები.

Uber-მა ბრალდებები კატეგორიულად უარყო. კომპანიის წარმომადგენლის მიერ ელექტრონული ფოსტით გავრცელებულ განცხადებაში ნათქვამია:

„ეს სარჩელი უგულებელყოფს მნიშვნელოვან ფაქტებს და ეფუძნება მცდარ, შეცდომაში შემყვან ნარატივებს სხვა უსაფუძვლო დავებიდან, რომლებსაც ჩვენ უკვე გავეცით პასუხი საჯაროდ და სასამართლო დარბაზში“.

Uber-ის მსგავსი კომპანიებისთვის წარმოებული სარჩელები (derivative lawsuits), როდესაც აქციონერი კორპორაციის სახელით უჩივის მის დირექტორებს, იშვიათობას არ წარმოადგენს. მაგალითად, მიმდინარე წელს მსგავსი სამართლებრივი დავები Adobe-ს, Apple-ისა და Intel-ის წინააღმდეგაც დაიწყო.