Tesla უარყოფს ავტოპილოტის ბრალეულობას ტეხასში მომხდარ ფატალურ ავარიაში

ტეხასის შტატის ქალაქ ქეითიში მომხდარმა ტრაგიკულმა ავარიამ, რომლის დროსაც Tesla-ს ავტომობილი აგურის სახლს შეეჯახა და 76 წლის ქალბატონის სიცოცხლე იმსხვერპლა, კიდევ ერთხელ გაამწვავა დისკუსია კომპანიის მძღოლის დამხმარე ტექნოლოგიების შესახებ. ორშაბათს კომპანია Tesla-მ აქტიურად დაიწყო მომხდარის შესახებ გავრცელებული ინფორმაციის უარყოფა.

ინციდენტი პარასკევს ღამით მოხდა, როდესაც მაიკლ ბატლერის მიერ მართული Tesla Model 3 გზიდან გადავიდა და მარტა ავილას სახლს დაეჯახა. დაშავებული ქალი ვერტმფრენით საავადმყოფოში გადაიყვანეს, თუმცა მისი გადარჩენა ვერ მოხერხდა. ბატლერმა ჰარისის ოლქის შერიფის მოადგილეებს განუცხადა, რომ შეჯახების მომენტში ავტომობილი ავტოპილოტის რეჟიმში იმყოფებოდა.

ეს დეტალი მედიაში სწრაფად გავრცელდა და Tesla-ს Autopilot-ისა და Full Self-Driving (Supervised) სისტემების ირგვლივ მიმდინარე ხანგრძლივი დებატების ცენტრში მოექცა. მიუხედავად იმისა, რომ Tesla-მ წლების წინ გააუქმა პიარ განყოფილება და ჩვეულებრივ დუმილს ამჯობინებს, ამჯერად კომპანიამ პოზიცია საჯაროდ დააფიქსირა.

აშოკ ელუსვამიმ, Tesla-ს ხელოვნური ინტელექტის პროგრამული უზრუნველყოფის ვიცე-პრეზიდენტმა და ავტოპილოტის გუნდის პირველმა ინჟინერმა, სოციალურ ქსელ X-ზე მონაცემების სრულიად განსხვავებული ვერსია წარადგინა.

„ამ შემთხვევაში, მძღოლმა თვითმართვის სისტემა ხელით შეცვალა და საცხოვრებელ ზონაში აქსელერატორის პედალს ბოლომდე, 100%-ით დააჭირა“

— დაწერა მან. მისივე თქმით, შეჯახების მომენტში ავტომობილის სიჩქარე საათში 73 მილს (დაახლოებით 117 კმ/სთ) აღწევდა და მძღოლი პედალს შეჯახების შემდეგაც კი არ უშვებდა.

კომპანიის პოზიციით, მიუხედავად იმისა, თუ რომელი სისტემა იყო ჩართული, მომხდარზე პასუხისმგებელი მძღოლია, რომელმაც სიჩქარეს მაქსიმალურად მოუმატა და არა თავად ავტომობილი. ილონ მასკმა მალევე გაიზიარა ელუსვამის პოზიცია და დასძინა:

„ეს ბრალდება ალოგიკურია. FSD სისტემა საცხოვრებელ უბნებში ნელა გადაადგილდება, ეს კი მაღალი სიჩქარით გამოწვეული შეჯახება იყო!“

იანვარში Tesla-მ შეწყვიტა თავისი საბაზისო დამხმარე სისტემისთვის „Autopilot“-ის წოდება კალიფორნიის სასამართლოს გადაწყვეტილების შემდეგ, რომლის მიხედვითაც ეს სახელი მომხმარებელს შეცდომაში შეჰყავდა. Full Self-Driving (Supervised) სისტემა, რომელიც თვეში 99 დოლარიან გამოწერას მოითხოვს, მართავს მანევრებს, მათ შორის მარშრუტის ნავიგაციას, საჭეს, ზოლების შეცვლას და პარკირებას, თუმცა მძღოლისგან მუდმივ ყურადღებასა და ზედამხედველობას მოითხოვს.

ფედერალური მარეგულირებლები საკუთარი დასკვნების გამოტანას აპირებენ. საგზაო მოძრაობის უსაფრთხოების ეროვნულმა ადმინისტრაციამ (NHTSA) დაადასტურა, რომ ამ შემთხვევაზე სპეციალურ გამოძიებას იწყებს. ეს არის ერთ-ერთი იმ 40-ზე მეტი გამოძიებიდან, რომელიც სააგენტომ ბოლო წლებში Tesla-ს იმ ავარიებთან დაკავშირებით წამოიწყო, სადაც მძღოლის დამხმარე სისტემების მონაწილეობა ივარაუდება.

ჰარისის ოლქის შერიფის ოფისმა განაცხადა, რომ გამოძიების შედეგებს ადგილობრივ პროკურატურას წარუდგენს, რათა დადგინდეს, იკვეთება თუ არა სისხლის სამართლის დანაშაული. საბოლოო პასუხი იმის შესახებ, ნამდვილად იყო თუ არა ავტოპილოტი აქტიური, თუ მძღოლმა მართვა საკუთარ თავზე აიღო, მხოლოდ ავტომობილის მონაცემების სრული გაშიფვრის შემდეგ გახდება ცნობილი.