ჩრდილოეთ კორეელი ჰაკერები 290 მილიონი დოლარის კრიპტოვალუტის მოპარვაში არიან ეჭვმიტანილნი

გასულ უქმეებზე ჰაკერებმა Kelp DAO-ს პროტოკოლიდან 290 მილიონ დოლარზე მეტი ღირებულების კრიპტოვალუტის მოპარვა შეძლეს. აღნიშნული პლატფორმა მომხმარებლებს საშუალებას აძლევს, მიიღონ სარგებელი თავიანთი თავისუფალი კრიპტოინვესტიციებიდან. ორშაბათისთვის LayerZero-მ, ერთ-ერთმა პროექტმა, რომელიც ამ თავდასხმის შედეგად დაზარალდა, მომხდარში ჩრდილოეთ კორეა დაადანაშაულა.ეს შემთხვევა მიმდინარე წლის ყველაზე მასშტაბური კრიპტოქურდობაა. მან გადაასწრო აპრილში კრიპტო ბირჟა Drift-ზე განხორციელებულ თავდასხმას, რომლის დროსაც ჰაკერებმა დაახლოებით 285 მილიონი დოლარი მიითვისეს. LayerZero-ს მიერ X-ზე გამოქვეყნებული პოსტის თანახმად, თავდამსხმელებმა Kelp DAO-ს წვდომა LayerZero-ს ე.წ. „ხიდის“ (bridge) მეშვეობით მოიპოვეს, რომელიც სხვადასხვა ბლოკჩეინს შორის ინფორმაციის გაცვლას უზრუნველყოფს.ჰაკერებმა ისარგებლეს თავად Kelp-ის უსაფრთხოების კონფიგურაციით, რომელიც ტრანზაქციების დასამტკიცებლად მრავალჯერად ვერიფიკაციას არ მოითხოვდა. ამ ხარვეზმა მათ საშუალება მისცა, თაღლითური ტრანზაქციების გზით თანხები მიეთვისებინათ. კომპანია მიუთითებს „წინასწარ ინდიკატორებზე“, რომლებიც დამნაშავედ ჩრდილოეთ კორეას, კერძოდ კი კრიპტო სექტორზე ორიენტირებულ ჰაკერულ ჯგუფს, TraderTraitor-ს ასახელებს.Kelp DAO-მ LayerZero-ს ბრალდებებს უპასუხა და ქურდობაში თავად ეს უკანასკნელი დაადანაშაულა. აღსანიშნავია, რომ ბოლო წლებში კიმ ჩენ ინის რეჟიმის დაქვემდებარებაში მყოფი ჩრდილოეთ კორეელი ჰაკერები კრიპტოვალუტის მოპარვაში განსაკუთრებით გააქტიურდნენ. გასულ წელს მათ 2 მილიარდ დოლარზე მეტი ღირებულების კრიპტო აქტივები მიითვისეს, ხოლო 2017 წლიდან დღემდე ჩრდილოეთ კორეის მიერ მოპარული თანხების საერთო მოცულობა დაახლოებით 6 მილიარდ დოლარს შეადგენს.