დელავერის უზენაესმა სასამართლომ ილონ მასკის 56 მილიარდ დოლარიანი ანაზღაურების პაკეტი აღადგინა

დელავერის უზენაესმა სასამართლომ ილონ მასკის 2018 წლის 56 მილიარდ დოლარიანი ანაზღაურების პაკეტი აღადგინა. პარასკევს გამოქვეყნებული გადაწყვეტილების თანახმად, გაუქმდა შტატის კანცლერის სასამართლოს (Chancery Court) გასული წლის დადგენილება, რომელმაც აღნიშნული შეთანხმება ბათილად ცნო.
დელავერის უმაღლესი სასამართლოს მოსამართლეებმა გადაწყვეტილება ერთხმად მიიღეს. მათი განმარტებით, მასკის ანაზღაურების პაკეტის გაუქმება მას ექვსწლიანი შრომისა და ძალისხმევის სანაცვლოდ კომპენსაციის გარეშე ტოვებდა. Tesla-ს აქციების ამჟამინდელი ფასის გათვალისწინებით, რომელმაც ამ კვირაში ისტორიულ მაქსიმუმს მიაღწია, აღდგენილი პაკეტის ღირებულება Bloomberg-ის მონაცემებით დაახლოებით 140 მილიარდ დოლარს შეადგენს.
შტატის უზენაესი სასამართლოს ეს გადაწყვეტილება, სავარაუდოდ, წერტილს უსვამს მრავალწლიან სამართლებრივ დავას. ამ პროცესმა იმდენად უარყოფითი გავლენა იქონია მასკზე, რომ მან Tesla-ს იურიდიული მისამართი დელავერიდან ტეხასში გადაიტანა, რასაც მოგვიანებით სხვა კომპანიებმაც მიბაძეს. „სამართლიანობა აღდგა“, — დაწერა მასკმა პარასკევს პლატფორმა X-ზე ამ სიახლის საპასუხოდ. მან ასევე მადლობა გადაუხადა ერთ-ერთ აქტიურ აქციონერს, ალექსანდრა მერცს, მხარდაჭერისთვის.
სასამართლო გადაწყვეტილების შემდეგ, Tesla, სავარაუდოდ, გააუქმებს 29 მილიარდ დოლარიან ანაზღაურების პაკეტს, რომელიც მასკს მიმდინარე წლის დასაწყისში შესთავაზეს. ეს პაკეტი ერთგვარი დაზღვევა იყო იმ შემთხვევისთვის, თუ კომპანია დელავერის უზენაეს სასამართლოში დავას წააგებდა. აღსანიშნავია, რომ ნოემბერში მასკისთვის მინიჭებული 1 ტრილიონი დოლარის ღირებულების კომპენსაციის პაკეტი ამისგან დამოუკიდებელია და კვლავ ძალაში რჩება. ის მასკს მთელი რიგი ამბიციური მიზნების მიღწევას ავალდებულებს სრული ღირებულების გამოსასყიდად.
2018 წლის შეთანხმება ასევე ითვალისწინებდა კონკრეტულ ეტაპებს (milestones), რომლებიც მასკს სრული ანაზღაურების მისაღებად უნდა დაეძლია. მასკმა და Tesla-მ ყველა დასახულ მიზანს მიაღწიეს, თუმცა მანამდე, 2018 წელს, ერთ-ერთმა აქციონერმა სარჩელი შეიტანა. მოსარჩელე ამტკიცებდა, რომ პაკეტზე მოლაპარაკებები არასწორად წარიმართა და აქციონერები სათანადოდ არ იყვნენ ინფორმირებულნი ინტერესთა კონფლიქტის შესახებ.
მასკი და Tesla-ს მრავალი მხარდამჭერი ამ სარჩელს აბსურდულად მიიჩნევდნენ, განსაკუთრებით იმ ფაქტის გათვალისწინებით, რომ მოსარჩელე — კორპორაციული დაცვის ყოფილი ადვოკატი და მძიმე მეტალის დრამერი რიჩარდ ტორნეტა — კომპანიის მხოლოდ ცხრა აქციას ფლობდა. მრავალწლიანი დავისა და სასამართლო პროცესების შემდეგ, სადაც თავად მასკმაც მისცა ჩვენება, კანცლერის სასამართლოს მოსამართლე მოსარჩელეს დაეთანხმა და 2024 წლის იანვარში ანაზღაურების პაკეტი გააუქმა.
მიუხედავად იმისა, რომ 2024 წლის ყოველწლიურ კრებაზე Tesla-ს აქციონერებმა პაკეტი ხელახლა დაამტკიცეს, მოსამართლემ თავისი გადაწყვეტილება 2024 წლის დეკემბერში მაინც ძალაში დატოვა. ამის შემდეგ Tesla-მ საქმე დაუყოვნებლივ გაასაჩივრა უზენაეს სასამართლოში, რამაც საბოლოოდ მასკის გამარჯვება გამოიწვია.