დიზაინის გიგანტი Figma ხელოვნური ინტელექტის კომპანია Weavy-ს ყიდულობს

ცნობილმა დიზაინ-პლატფორმამ Figma-მ ხელოვნურ ინტელექტზე დაფუძნებული მედიაგენერაციის კომპანია Weavy-ს შეძენის შესახებ განაცხადა. სტარტაპი Figma-ს ახალი ბრენდის, Figma Weave-ის სახელით შეუერთდება. კომპანიის ცნობით, Weavy-ს 20-კაციანი გუნდი Figma-ში გადაინაცვლებს, თუმცა გარიგების ფინანსური დეტალები არ ხმაურდება.

თელ-ავივში დაფუძნებული სტარტაპი Weavy 2024 წელს შეიქმნა და ივნისში, საწყის ეტაპზე, 4 მილიონი დოლარის ინვესტიცია მოიზიდა. დაფინანსების რაუნდს Entrée Capital უძღვებოდა, რომელშიც ასევე მონაწილეობდნენ Designer Fund, Founder Collective და Fiverr-ის დამფუძნებელი მიკა კაუფმანი.

Figma-ს განცხადებით, Weavy ამ ეტაპზე დამოუკიდებელ პროდუქტად დარჩება, თუმცა მომავალში მისი ინტეგრაცია Figma Weave-ის ბრენდის ქვეშ და Figma-ს მთავარ პლატფორმაში იგეგმება. ეს ნაბიჯი კომპანიის ეკოსისტემის გაფართოებაზე მიუთითებს.

Weavy-ს ვებ-ინსტრუმენტები მომხმარებლებს საშუალებას აძლევს, სხვადასხვა ხელოვნური ინტელექტის მოდელი ერთმანეთთან დააკავშირონ და პროფესიონალური რედაქტირების ხელსაწყოები გამოიყენონ. ამ ტექნოლოგიით შესაძლებელია მაღალი ხარისხის ფოტოებისა და ვიდეოების შექმნა პროდუქტის მაკეტებისა თუ ბრენდის სტილისთვის.

მომხმარებლებს შეუძლიათ შექმნილი მედიაფაილების რედაქტირება ფენების (layers) გამოყენებით, განათების კორექტირება, ფერების შეცვლა და კუთხეების მორგება ტექსტური ბრძანებების (prompts) მეშვეობით. ეს მათ საშუალებას აძლევს, ზუსტად ის საბოლოო შედეგი მიიღონ, რომელიც სურთ.

მუშაობის პროცესი უსასრულო ტილოზე (infinite canvas) იწყება, სადაც მომხმარებელი ფოტოს გენერაციისთვის ბრძანებას წერს, ათვალიერებს სხვადასხვა მოდელის მიერ შემოთავაზებულ შედეგებს, ირჩევს ერთ-ერთს და შემდეგ ამატებს ახალ ბრძანებას ვიდეოს შესაქმნელად. ნებისმიერ ეტაპზე შესაძლებელია რედაქტირების ინსტრუმენტების გამოყენება ვიზუალის შესაცვლელად.

სტარტაპი მომხმარებლებს ვიდეოს გენერაციისთვის ისეთ მოდელებს სთავაზობს, როგორებიცაა Seedance, Sora და Veo, ხოლო ფოტოების შესაქმნელად – Flux, Ideogram, Nano-Banana და Seedream. დიზაინერებს ასევე შეუძლიათ რამდენიმე ბრძანებისა და მოდელის კომბინირება სასურველი შედეგის მისაღებად.

„ეს კვანძოვან მიდგომაზე (node-based) დაფუძნებული მეთოდი ხელოვნური ინტელექტის გენერაციაში კონტროლისა და ოსტატობის ახალ დონეს ქმნის. Weavy-ს გუნდმა შთაგვაგონა იმ ბალანსით, რომელიც მათ სიმარტივეს, ხელმისაწვდომობასა და სიმძლავრეს შორის იპოვეს. მათ შექმნეს ინსტრუმენტი, რომლის გამოყენებაც უბრალოდ სასიამოვნოა“, – განაცხადა Figma-ს აღმასრულებელმა დირექტორმა, დილან ფილდმა.

ხელოვნურ ინტელექტზე დაფუძნებულ დიზაინ-პლატფორმებზე, რომლებიც მედიის გენერაციისა და სამუშაო პროცესების ავტომატიზაციის შესაძლებლობებს იძლევა, მოთხოვნა სულ უფრო იზრდება. ამ თვის დასაწყისში, AI საძიებო პლატფორმა Perplexity-მ დიზაინ-პლატფორმა Visual Electric-ის გუნდი შეიძინა, ხოლო აპრილში კომპანია Krea-მ სხვადასხვა რაუნდში 83 მილიონი დოლარის დაფინანსება მოიზიდა ისეთი ფირმებისგან, როგორებიცაა Bain Capital, a16z და Abstract Ventures.