FedEx-ი ელექტრო სატვირთოების სტარტაპ Harbinger-ში 160 მილიონ დოლარს აბანდებს

ლოს-ანჯელესში დაფუძნებულმა ელექტრო სატვირთოების სტარტაპმა Harbinger-მა C სერიის დაფინანსების რაუნდში 160 მილიონი დოლარი მოიზიდა. რაუნდს სატრანსპორტო გიგანტი FedEx-ი ხელმძღვანელობდა, რომელიც კომპანიის კომერციული ავტომობილების პროგრამის გაფართოებას უჭერს მხარს. ინვესტიციის ფარგლებში, FedEx-მა უკვე შეუკვეთა Harbinger-ის 53 ელექტრო სატვირთოს შასი, რომელთა მიწოდებასაც სტარტაპი მიმდინარე წლის ბოლომდე გეგმავს.

Harbinger-ი 2022 წელს დააარსეს EV სტარტაპ Canoo-სა და ბატარეების მწარმოებელი QuantumScape-ის ყოფილმა თანამშრომლებმა. კომპანიის მთავარი მიზანი საშუალო კლასის კომერციული სატვირთოების შასის წარმოებაა და მეტი არაფერი. სწორედ ამ ვიწრო ფოკუსმა და სიმარტივემ შეუწყო ხელი კომპანიას, იანვარში B სერიის რაუნდში 100 მილიონი დოლარი მოეზიდა და დაარსებიდან სულ რაღაც სამ წელიწადში წარმოება დაეწყო.

FedEx-ი Harbinger-ის ყველაზე ცნობილი კლიენტია დღემდე, თუმცა სტარტაპი ბოლო რამდენიმე წელია ასევე თანამშრომლობს RV-მწარმოებელ THOR Industries-თან. FedEx-თან ერთად, C სერიის დაფინანსების რაუნდს THOR-იც ხელმძღვანელობდა. მათ შეუერთდა Capricorn-ის Technology Impact Fund-ი, რომელიც Tesla-ს ერთ-ერთი ადრეული ინვესტორი იყო. რაუნდში ასევე მონაწილეობდნენ Harbinger-ის წინა ინვესტორები, მათ შორის Leitmotif-ი (Volkswagen-ის მხარდაჭერით შექმნილი ახალი სარისკო კაპიტალის ფირმა), Tiger Global-ი, Maniv Mobility და Schematic Ventures-ი.

FedEx-ი უკვე ათი წელია ცდილობს, თავის ეროვნულ მიწოდების ქსელში ელექტრო სატვირთოები დანერგოს. 2018 წელს ლოგისტიკურმა გიგანტმა გარისკა და ლოს-ანჯელესში დაფუძნებულ სხვა სტარტაპთან, Chanje-სთან, გააფორმა ხელშეკრულება 1000 ჩინური ფურგონის შეკვეთაზე. ეს გარიგება საბოლოოდ სასამართლო დავით დასრულდა, Chanje კი მალევე გაკოტრდა.

მას შემდეგ კომერციული ელექტრო სატვირთოებისა და ფურგონების ბაზარი მომწიფდა, თუმცა ამ სფეროში მოთამაშეთა რაოდენობა კვლავ მცირეა. General Motors-მა რამდენიმე წარუმატებელი წლის შემდეგ უარი თქვა BrightDrop-ის მიწოდების ფურგონების პროგრამაზე. Ford-ის E-Transit ფურგონის გაყიდვები მკვეთრად დაეცა. Rivian-მა Amazon-ს დაახლოებით 25,000 ელექტრო ფურგონი მიაწოდა, მაგრამ ჯერჯერობით სხვა მსხვილი კომერციული კლიენტი ვერ მოიზიდა.

Harbinger-ი ფოკუსირებულია BrightDrop-ის, Ford-ის ან Rivian-ის ფურგონებზე უფრო დიდ სატვირთოებზე და ბაზრის ამ სეგმენტში მან უკვე მიაღწია საწყის წარმატებას. კომპანიამ მხოლოდ წელს 200-ზე მეტი შასი გაყიდა და ცოტა ხნის წინ კანადის ბაზარზე გაფართოების შესახებაც გამოაცხადა.

„FedEx-ის მონაწილეობა მიუთითებს საშუალო კლასის სატვირთოების სექტორში ინოვაციების მოთხოვნაზე და ისეთ ელექტრო მოდელზე, რომელიც ერთდროულად ეხმარება ბიზნესისა და მდგრადობის მიზნების მიღწევას“, — განაცხადა დიპენდერ სალუჯამ, Capricorn Investment Group-ის Technology Impact Fund-ის მმართველმა პარტნიორმა. „ბოლო ორი ათწლეულის განმავლობაში, საშუალო კლასის სატვირთოების ავტოპარკები, როგორც წესი, მცირე რაოდენობით იყენებდნენ სადემონსტრაციო ელექტრო სატვირთოებს. ინდუსტრია ახლა მზად არის მასობრივ დანერგვაზე გადასასვლელად და ამ მასშტაბირებას Harbinger-ი უძღვება“.