Fitbit-ის დამფუძნებლებმა ოჯახის ჯანმრთელობაზე ზრუნვისთვის AI პლატფორმა Luffu შექმნეს

Fitbit-ის დამფუძნებლებმა, ჯეიმს პარკმა და ერიკ ფრიდმანმა, ახალი სტარტაპის, Luffu-ს შექმნის შესახებ განაცხადეს. ხელოვნურ ინტელექტზე დაფუძნებული ეს პლატფორმა მიზნად ისახავს ოჯახებს ჯანმრთელობის მდგომარეობის პროაქტიულ მონიტორინგში დაეხმაროს. დამფუძნებლები ავითარებენ „ოჯახზე ზრუნვის ინტელექტუალურ სისტემას“, რომელიც თავდაპირველად მობილური აპლიკაციის სახით იქნება ხელმისაწვდომი, სამომავლოდ კი ტექნიკური მოწყობილობების (Hardware) გამოშვებაც იგეგმება.

Google-იდან წამოსვლიდან ორი წლის შემდეგ, პარკი და ფრიდმანი ფსონს ხელოვნურ ინტელექტზე დებენ, რათა შეამსუბუქონ ის მენტალური ტვირთი, რომელიც ოჯახის წევრებზე ზრუნვას ახლავს თან. ბოლო მონაცემებით, აშშ-ში ყოველი მეოთხე ზრდასრული ადამიანი (დაახლოებით 63 მილიონი პირი) ოჯახის მომვლელის როლშია, რაც 10 წლის წინანდელ მაჩვენებელზე 45%-ით მეტია.

Luffu ფონურ რეჟიმში იყენებს ხელოვნურ ინტელექტს ოჯახის წევრების შესახებ ინფორმაციის შესაგროვებლად და დასახარისხებლად. სისტემა სწავლობს ყოველდღიურ ჩვევებს და აფიქსირებს მნიშვნელოვან ცვლილებებს, რაც ოჯახის წევრებს საშუალებას აძლევს, იყვნენ ინფორმირებულები და დროულად აღმოფხვრან კეთილდღეობასთან დაკავშირებული პოტენციური პრობლემები.

პერსონალური გამოცდილება და ახალი ხედვა

ჯეიმს პარკმა პრესრელიზში აღნიშნა, რომ Fitbit-ში მუშაობისას აქცენტი პერსონალურ ჯანმრთელობაზე კეთდებოდა, თუმცა კომპანიის დატოვების შემდეგ მისი ხედვა შეიცვალა. მან საკუთარ გამოცდილებაზე ისაუბრა, როდესაც მშობლებზე დისტანციურად ზრუნავდა და უწევდა ინფორმაციის მოძიება სხვადასხვა პორტალსა თუ სამედიცინო დაწესებულებაში, რასაც ენობრივი ბარიერიც ართულებდა.

„Luffu სწორედ ის პროდუქტია, რომლის არსებობასაც ვისურვებდით — ის საშუალებას გვაძლევს თვალი ვადევნოთ ოჯახის ჯანმრთელობას, ვიცოდეთ რა შეიცვალა და როდის არის საჭირო ჩარევა, მუდმივი კონტროლისა და შეწუხების გარეშე“, — განაცხადა პარკმა.

პლატფორმის შესაძლებლობები და ფუნქციონალი

დამფუძნებლები მიიჩნევენ, რომ დღევანდელი სამომხმარებლო ბაზარი სავსეა ინდივიდუალური ხელსაწყოებით, თუმცა რეალურ ცხოვრებაში ჯანმრთელობაზე ზრუნვა საერთო პროცესია, რომელიც მოიცავს პარტნიორებს, ბავშვებს, მშობლებს, შინაურ ცხოველებსა და მომვლელებს. ამჟამად ოჯახის წევრების მონაცემები ხშირად გაფანტულია სხვადასხვა მოწყობილობაში, კალენდარში, ცხრილსა თუ ქაღალდის დოკუმენტებში.

Luffu-ს მეშვეობით მომხმარებლებს შეეძლებათ თვალყური ადევნონ მთელი ოჯახის მონაცემებს, მათ შორის:

• ჯანმრთელობის ზოგადი სტატისტიკა;
• კვების რაციონი და დიეტა;
• მედიკამენტების მიღების გრაფიკი;
• სიმპტომები და ლაბორატორიული ტესტების შედეგები;
• ექიმთან ვიზიტების ისტორია.

მონაცემების შეყვანა შესაძლებელია ხმოვანი შეტყობინების, ტექსტის ან ფოტოების საშუალებით. Luffu პროაქტიულად აკვირდება ცვლილებებს და მომხმარებელს აწვდის ანალიტიკურ ინფორმაციასა და გაფრთხილებებს, მაგალითად, სასიცოცხლო მაჩვენებლების ან ძილის რეჟიმის უჩვეულო ცვლილების შემთხვევაში.

ინტერაქცია ბუნებრივ ენაზე

Axios-თან საუბრისას დამფუძნებლებმა განმარტეს, რომ მომხმარებლებს შეეძლებათ დასვან კითხვები მარტივი, ყოველდღიური ენით. მაგალითად:

• „მოქმედებს თუ არა მამის ახალი კვების რაციონი მის არტერიულ წნევაზე?“
• „მისცა თუ არა ვინმემ ძაღლს კუთვნილი მედიკამენტი?“

ერიკ ფრიდმანის განცხადებით, სისტემა შექმნილია იმისთვის, რომ დააფიქსიროს დეტალები რეალურ დროში, მიაწოდოს ინფორმაცია ოჯახის წევრებს და გამოკვეთოს მნიშვნელოვანი საკითხები საჭირო დროს. ეს მიდგომა ზრუნვის პროცესს უფრო კოორდინირებულს ხდის და ამცირებს ქაოსს.