Google ჩინურ კიბერდაჯგუფებას უჩივის: როგორ გამოიყენებოდა AI მასშტაბური თაღლითობისთვის

Google სასამართლო გზით ცდილობს იმ ინფრასტრუქტურის დემონტაჟს, რომელიც მასშტაბური, ხელოვნური ინტელექტის (AI) მეშვეობით მართული კიბერდანაშაულებრივი ოპერაციის უკან დგას. ტექნოლოგიურმა გიგანტმა სარჩელი შეიტანა ჩინური კიბერდანაშაულებრივი ქსელის, Outsider Enterprise-ის წინააღმდეგ. კომპანიის განცხადებით, აღნიშნული ჯგუფი AI-ს იყენებს თაღლითური კამპანიების საწარმოებლად, რომლის ფარგლებშიც მომხმარებლებს Google-ისა და სხვა ცნობილი ბრენდების სახელით ყალბ შეტყობინებებს უგზავნიან.ამ კამპანიების მთავარი მიზანი მომხმარებლების პაროლებისა და საკრედიტო ბარათების მონაცემების მოპარვაა. Google-ის მონაცემებით, Outsider Enterprise-მა ფინანსური ზიანი მიაყენა „ასობით ათას მსხვერპლს“, ხოლო მიყენებული ზარალი ჯამში „მილიონობით დოლარად არის შეფასებული“.დაჯგუფების ოპერაციების მასშტაბები შთამბეჭდავია: მხოლოდ ორკვირიან პერიოდში მათ გამოიყენეს 9 000 ყალბი ვებგვერდი, ერთი მილიონი თაღლითური ვებ-დომენი და Android-ის მომხმარებლებთან 2,5 მილიონი ტექსტური შეტყობინება გაგზავნეს. კომპანიაში აღნიშნავენ, რომ გასული წლის მაისში, სულ რაღაც ორ კვირაში, მომხმარებლებმა 55 000 სპამ-შეტყობინება მონიშნეს, რაც წუთში ორზე მეტ საჩივარს უდრის.საკუთარი მომხმარებლების დასაცავად, Google იყენებს „AI-ზე დაფუძნებულ ინსტრუმენტებს AI-ზე დაფუძნებული თაღლითობის წინააღმდეგ“. ეს ტექნოლოგიები საშუალებას იძლევა, დროულად მოხდეს თაღლითური სქემების იდენტიფიცირება და მომხმარებლების გაფრთხილება საეჭვო ზარებისა თუ შეტყობინებების შესახებ. ამ მეთოდით კომპანია ყოველთვიურად 10 მილიარდზე მეტ თაღლითურ შეტყობინებას ბლოკავს.ამასთანავე, Google აქტიურად თანამშრომლობს ისეთ მსხვილ სატელეკომუნიკაციო კომპანიებთან, როგორებიცაა AT&T, T-Mobile და Verizon, რათა ერთობლივი ძალისხმევით აღკვეთონ თაღლითური შეტყობინებების გავრცელება. პარალელურად, მიმდინარეობს კოორდინაცია გამოძიების ფედერალურ ბიუროსთან (FBI), რომელიც ამ საქმეზე სამართალდამცავ ღონისძიებებს ატარებს. FBI-ს ამ ეტაპზე ოფიციალური კომენტარი არ გაუკეთებია.